ТИНЧЛИК УЧУН КУРАШГАН БОБО
Мен яқинда ойнаи жаҳон орқали Иккинчи жаҳон уруши ҳақидаги фильмни томоша қилдим. Кинофильмдаги уруш манзараларини кўриб, жуда таъсирландим. Чунки, Иккинчи жаҳон урушида қаҳрамонларча жанг қилган минглаб ўзбек ўғлонлари ҳар гал алангаи-оташ бўлиб турган қирғинбарот жанг майдонига кирганларида:
- Она Ватан учун, олға! Халқлар тинчлиги, бахт-саодати учун олға! Фашизмга ўлим, эркпарвар халқларга омонлик! – дея бор овозлари билан ҳайқиришиб, шижоат ва дадиллик ила ёв устига ёпирилиб боришар, жонларини аямай жанг қилишарди.
Шу фильм таъсиридан чиқолмай, анча вақтгача хаёл суриб юрдим. Менда ҳозирги кунда ҳаёт бўлган уруш иштирокчилари билан учрашиш истаги туғилди. Устозларим ва ота-онамнинг кўмаги билан Иккинчи жаҳон уруши иштирокчиси, Қипчоқ қишлоғида яшовчи 91 ёшли Ўтемурод бобо Бозорбоев билан учрашиб, суҳбатда бўлдим.
Ўтемурод бобо 1925 йилда Қипчоқ қишлоғида таваллуд топганлар. У 1943 йилнинг май ойида, 18 ёшида бутун ер юзини яксон қилмоққа шайланиб, "яшин тезлигида” уруш бошлаган фашизмга қарши урушга отланди. Бир йил давомида Украина фронтида немис босқинчиларига қарши аёвсиз жангларда иштирок этди. У Украина шаҳар ва қишлоқларини душмандан тозалаш, Днепр дарёсини кечиб ўтишдек машаққатли жанглардаги қаҳрамонликлари учун қўмондонлик томонидан жанговар орден ва медаллар билан тақдирланди.
- Биз турли миллат фарзандлари эдик, - дейди Ўтемурод бобо даҳшатли уруш хотиралари ҳақида сўзларкан. – Энг оғир дамларда бир-биримизга суяниб, бир-биримизни асраб-авайлаб яшадик. Уйқу, ором нималигини умуман билганимиз йўқ. Ҳатто қорнимиз очганини ҳам сезмасдик. Халқимизнинг тинчлигини асрашдек улуғ ният барчамизни бирлаштириб турарди. Кўз олдимиздан туғилиб ўсган она тупроқ, ота-она, ёр-у бродарларимиз, жажжи болажонлар бир зум ҳам нари кетган эмас.
Бу – буюк ватанпарварлик, тинчлик туйғуси эди. Ана шу туйғуни юраги тўрида авайлаб-асраб, жанг майдонларида қон кечиб, фидойиликлар қилган бобомиз халқи тинч, гуллаб-яшнаган Ватанда яшаётганидан шукроналар айтадилар:
- Кўплаб қуролдош дўстларимиз жанг майдонларида қаҳрамонларча ҳалок бўлдилар, - дейди бобо сафдош дўстларини хотирларкан. – Бугунгидай дориломон, тўкин-сочин замон халқимиз тарихида умуман бўлган эмас. Ватандаги тинчлик-осойишталикнинг, фаровонликнинг қадрига етинг, болаларим! Ўқинглар, касб-корли бўлинглар, Ўзбекистондай жаннатмакон юртнинг ҳар қарич ерини обод этиб яшанглар!
Ўтемурод бобо айни пайтда 91 ёшга тўлдилар. Ҳамон тетик, хотираси тиниқ бобомиз Қипчоқ қишлоғининг пир-у бадавлат отахонларидан.
- Бизнинг бахтимиз, бугунги саодатли кунларимиз учун фидойилик қилган азиз бобожонимиз, ҳамиша омон бўлинг, - деймиз!
Муяссар ТУРСУНБОЕВА,
Нукус ҳуқуқшунослик коллежи ўқувчиси.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
