TINChLIK UChUN KURAShGAN BOBO
Men yaqinda oynai jahon orqali Ikkinchi jahon urushi haqidagi filmni tomosha qildim. Kinofilmdagi urush manzaralarini koʻrib, juda taʼsirlandim. Chunki, Ikkinchi jahon urushida qahramonlarcha jang qilgan minglab oʻzbek oʻgʻlonlari har gal alangai-otash boʻlib turgan qirgʻinbarot jang maydoniga kirganlarida:
- Ona Vatan uchun, olgʻa! Xalqlar tinchligi, baxt-saodati uchun olgʻa! Fashizmga oʻlim, erkparvar xalqlarga omonlik! – deya bor ovozlari bilan hayqirishib, shijoat va dadillik ila yov ustiga yopirilib borishar, jonlarini ayamay jang qilishardi.
Shu film taʼsiridan chiqolmay, ancha vaqtgacha xayol surib yurdim. Menda hozirgi kunda hayot boʻlgan urush ishtirokchilari bilan uchrashish istagi tugʻildi. Ustozlarim va ota-onamning koʻmagi bilan Ikkinchi jahon urushi ishtirokchisi, Qipchoq qishlogʻida yashovchi 91 yoshli Oʻtemurod bobo Bozorboyev bilan uchrashib, suhbatda boʻldim.
Oʻtemurod bobo 1925-yilda Qipchoq qishlogʻida tavallud topganlar. U 1943-yilning may oyida, 18 yoshida butun yer yuzini yakson qilmoqqa shaylanib, "yashin tezligida” urush boshlagan fashizmga qarshi urushga otlandi. Bir yil davomida Ukraina frontida nemis bosqinchilariga qarshi ayovsiz janglarda ishtirok etdi. U Ukraina shahar va qishloqlarini dushmandan tozalash, Dnepr daryosini kechib oʻtishdek mashaqqatli janglardagi qahramonliklari uchun qoʻmondonlik tomonidan jangovar orden va medallar bilan taqdirlandi.
- Biz turli millat farzandlari edik, - deydi Oʻtemurod bobo dahshatli urush xotiralari haqida soʻzlarkan. – Eng ogʻir damlarda bir-birimizga suyanib, bir-birimizni asrab-avaylab yashadik. Uyqu, orom nimaligini umuman bilganimiz yoʻq. Hatto qornimiz ochganini ham sezmasdik. Xalqimizning tinchligini asrashdek ulugʻ niyat barchamizni birlashtirib turardi. Koʻz oldimizdan tugʻilib oʻsgan ona tuproq, ota-ona, yor-u brodarlarimiz, jajji bolajonlar bir zum ham nari ketgan emas.
Bu – buyuk vatanparvarlik, tinchlik tuygʻusi edi. Ana shu tuygʻuni yuragi toʻrida avaylab-asrab, jang maydonlarida qon kechib, fidoyiliklar qilgan bobomiz xalqi tinch, gullab-yashnagan Vatanda yashayotganidan shukronalar aytadilar:
- Koʻplab quroldosh doʻstlarimiz jang maydonlarida qahramonlarcha halok boʻldilar, - deydi bobo safdosh doʻstlarini xotirlarkan. – Bugungiday dorilomon, toʻkin-sochin zamon xalqimiz tarixida umuman boʻlgan emas. Vatandagi tinchlik-osoyishtalikning, farovonlikning qadriga yeting, bolalarim! Oʻqinglar, kasb-korli boʻlinglar, Oʻzbekistonday jannatmakon yurtning har qarich yerini obod etib yashanglar!
Oʻtemurod bobo ayni paytda 91 yoshga toʻldilar. Hamon tetik, xotirasi tiniq bobomiz Qipchoq qishlogʻining pir-u badavlat otaxonlaridan.
- Bizning baxtimiz, bugungi saodatli kunlarimiz uchun fidoyilik qilgan aziz bobojonimiz, hamisha omon boʻling, - deymiz!
Muyassar TURSUNBOYeVA,
Nukus huquqshunoslik kolleji oʻquvchisi.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
