МУСТАҚИЛЛИГИМИЗ МАНГУ БЎЛСИН!

Истиқлол туфайли ўз тақдиримизни ўз қўлимиз билан яратиш, ўз салоҳиятимизни ҳар томонлама намоён этиш, ўзимиз танлаган йўлдан мақсад сари оғишмай бориш имкониятига эга бўлдик.

Ҳадемай Ўзбекистонимизнинг истиқлолга эришганига ҳам 24 йил тўлади. Бугун истиқлол йилларида туғилган биз фарзандлар келажакка теран назар ташламоқдамиз. Биз тинч-фаровон замонда эркин камол топаяпмиз. Юртбошимиз таъ-кидлаганларидек: "Ватан – онамиз, Ватан ҳаммамизнинг талпиниб яшайдиган азиз саждагоҳимиз. Шу азиз Ватан учун яшайлик, шу азиз Ватанни ардоқлайлик, шу азиз Ватанни кўз қорачиғидек асрайлик!”

Ҳақиқатан ҳам, бу сўзлар замирида олам-олам маъно яширин. Буларнинг барчаси, энг аввало она заминимиздаги тинчлик ва осойишталик шарофатидан, танлаган йўли-мизнинг тўғрилиги, мақсадларимиз эзгулигидан, халқимизнинг Юртбошимиз атрофида жипс бўлиб, эртанги кун истиқболига ишонч ва ғурур билан, дадил, собитқадамлик билан бораётганлигидандир.

Юртимиз мустақил бўлгач, жамиятимизнинг барча соҳаларида янгиланиш, ўзгаришлар юзага келди. Янги бинолар, йўллар, кўприклар. Иншоотлар қурилди. Манзил-у маконларимиз обод бўлди. Халқимиз тинч, фаровон яшамоқда. Замонавий билим даргоҳларининг муҳташам бинолари бунёд этилмоқда. Қишлоқ ва шаҳарларимизнинг ҳар гўшаси-ю манзиллари обод бўлиб, чирой очмоқда, гуллаб-яшнамоқда. Пахта, донимиз мўл, хирмонимиз баракали. Маданий-маънавий, маърифий соҳаларда жиддий ўзгаришлар содир бўлмоқда.

Бугун биз бу кунларимизга қанча шукрона айтсак ҳам оз. Ҳозирда Ўзбекистонимиз энг ривожланган мамлакатлар қаторидан жой олмоқда. У кўпгина соҳаларда бошқа давлатларни орқада қолдирмоқда. Биз шундай жаннатмакон диёрда яшаяпмиз. Юртимиз тинч, кунларимиз осуда ўтади. Аллоҳ назари тушган бундай диёр ҳаммага ҳам насиб этавермайди. Мен шундай диёрда камол топаётганимдан беҳад мамнунман. Фурсатдан фойдаланиб, барча юртдошларимизни Мустақиллигимизнинг 24 йиллиги билан муборакбод этаман. Мустақиллигимиз мангу бўлсин!

Севара ИБРОҲИМОВА,

Амударё академик лицейи ўқувчиси.

(Фото - http://uza.uz)