Жалолиддин Мангуберди номидаги ҳарбий академик лицейи мутахассислари иштирокида семинар-тренинг ташкиллаштирилди
Мамлакатимизда ҳар бир вояга етаётган ўғил болани ҳарбий-ватанпарварлик руҳида тарбиялаш, она Ватан ҳимоячиси бўлишдек шарафли касбга йўналтириш борасида барча шарт-шароитлар, зарур имкониятлар яратилган. Айнан ана шу мақсадда мамлакатимизда бир неча йўналишлардаги олий ҳарбий билим юртлари, ҳарбий академик лицейлар, махсус ихтисослаштирилган мактаблар фаолият олиб бормоқда.
Амударё туманидаги 38-сонли умумтаълим мактаби биносида умумтаълим мактаблари ва ихтисослаштирилган мактабларнинг 9-синф битирувчилари орасидан ҳарбий соҳага қизиқувчи иқтидорли ўқувчиларни Жалолиддин Мангуберди номидаги ҳарбий академик лицейига ўқишга таклиф қилиш мақсадида мазкур академик лицейнинг малакали мутахассислари иштирокида семинар-тренинг ўтказилди.
Семинар-тренингда мазкур академик лицей ўқитувчилари ва бир гуруҳ ўқувчилари, ҳарбий хизматчилар ҳамда мактабларнинг чақириққа қадар бошланғич тайёргарлик фани ўқитувчилари, шунингдек, 38-сонли мактабнинг 9-синф ўқувчилари иштирок этдилар.
Тадбирда сўзга чиққанлар иштирокчиларга мамлакатимизда фаолият олиб борувчи олий ҳарбий билим юртлари ва уларга қабул қилиш тартиб-қоидалари ҳақида батафсил маълумотлар берди. Шу билан бирга, Жалолиддин Мангуберди номидаги ҳарбий академик лицейида ўқувчилар учун яратилган шарт-шароитлар, таълим-тарбия жараёнлари, назарий ва ҳарбий-амалий машғулотлар, спорт-соғломлаштириш ишлари жаҳон андозалари даражасида ташкил этилганлигини алоҳида таъкидлаб, айни пайтда мазкур ҳарбий билим юртини тамомлаб, мамлакатимизнинг турли ҳудудларида намунали хизмат қилаётган ҳарбий зобитлар, таниқли қўмондонлар борлигини мамнуният билан қайд этди.
Семинар-тренинг давомида мазкур ҳарбий академик лицей фаолияти ва Қуролли Кучлар жанговарлиги ҳақида ҳикоя қилувчи видеоролик намойиш этилиб, тарғибот буклетлари тарқатилди. Шунингдек, чақириққа қадар бошланғич тайёргарлик фани ўқитувчилари ҳамда ўқувчи-ёшлар томонидан тушган саволлар доирасида очиқ мулоқот ташкил этилиб, барча саволларга ҳарбий академик лицей ўқитувчилари батафсил жавоблар бердилар.
Шу куннинг ўзида ҳарбий академик лицей мутахассислари тумандаги 16-, 40-, 55-, 76- ва 82-сонли мактабларда ҳам бўлишиб, мазкур мактабларнинг 9-синф ўқувчилари билан учрашдилар. Бири-биридан қизиқарли таассуротларга бой ўтган учрашув тадбирларида ҳарбий-ватанпарварлик мавзусидаги тарғибот-ташвиқот суҳбатлари олиб борилиб, 9-синф битирувчиларига Қуролли Кучларимизнинг жанговар қудрати, она Ватан ҳимоячиси бўлишдек шарафли касбнинг масъулияти ҳақидаги тушунчалар берилди ҳамда махсус буклетлар тарқатилди.
Бу каби тарғибот тадбирлари чақириққа қадар бошланғич тайёргарлик фани ўқитувчилари ва ўқувчиларда катта таассурот қолдирди ҳамда улар қалбида ватанпарварлик туйғуларини янада мустаҳкамлади.
Робия Йўлдошева
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
