Бепул кардиоскрининг: мобил ангиограф ёрдамида мураккаб диагностика амалиётлари ўтказилмоқда
Юрак-қон томир касалликлари бутун дунёда энг кўп учрайдиган ва инсон ҳаётига жиддий хавф туғдирадиган хасталиклар сирасига киради. Шу боис, касалликни даволагандан кўра, унинг олдини олган маъқул, деган тамойил асосида юртимизда кенг кўламли профилактика ишлари олиб борилмоқда. Инсон қадрини улуғлаш ва унинг соғлиғини асраш мақсадида тиббиёт соҳасида амалга оширилаётган изчил ислоҳотлар бугун ўзининг амалий натижаларини бермоқда. Ана шундай хайрли ва муҳим тадбирлардан бири Амударё туманида ташкил этилди.
Пойтахтдан, хусусан, Миллий тиббиёт марказидан келган юқори малакали бир гуруҳ мутахассислар Амударё тумани тиббиёт бирлашмасида бўлиб, замонавий ва махсус ускуналар ёрдамида маҳаллий аҳолини чуқурлаштирилган тиббий кўрикдан ўтказдилар. Ушбу тиббий кўрикнинг асосий йўналиши халқ орасида кардиоскрининг деб аталувчи ўта муҳим жараён, яъни коронарография амалиётини бажаришга қаратилди. Мутахассислар томонидан олиб келинган махсус мобиль ангиограф аппарати ёрдамида юракнинг коронар томирларини аниқ ва тезкор текшириш имконияти яратилди.
Тиббиётда ушбу амалиёт инфарктгача бўлган ҳолатларни эрта аниқлаш ва ўлимга олиб келувчи оғир юрак хуружларининг олдини олишда энг самарали усул сифатида баҳоланади. Миллий тиббиёт маркази шифокорларининг чекка ҳудудларга ташрифи эса бундай мураккаб текширувларни марказга бормасдан, беморларнинг бевосита яшаш жойида амалга ошириш имконини бермоқда.
Мутахассисларнинг таъкидлашича, коронография бу юракни озиқлантирувчи қон томирларининг ҳолатини махсус контраст модда ва рентген аппарати ёрдамида текширишнинг энг ишончли усули ҳисобланади. Жараён давомида малакали шифокор беморнинг қўл артерияси орқали ингичка катетер киритади ва юрак томирларига контраст модда юборилади. Натижада рентген монитори орқали томирларнинг ички ҳолати, улардаги тиқилиш ёки торайиш даражаси жуда аниқ кўринади. Одатда 15 ёки 30 дақиқа давом этадиган бу текширув кўкрак қафасида оғриқ ёки сиқилиш ҳис қилган, жисмоний ҳаракат вақтида ҳансирашдан азият чекадиган, шунингдек, юрак инфаркти гумон қилинган беморлар учун ўта зарур амалиёт саналади. Ушбу аниқ ташхислаш усули шифокорларга кейинги даволаш тактикасини тўғри танлашга, зарур ҳолларда эса томирларга стент қўйиш орқали бемор ҳаётини сақлаб қолишга яқиндан ёрдам беради.
Энг қувонарлиси шундаки, мазкур чуқурлаштирилган тиббий кўрик ва мураккаб диагностика амалиётлари аҳолининг ижтимоий ҳимояга муҳтож қатламлари учун мутлақо бепул амалга оширилмоқда. Жараёнда биринчи навбатда барча нафақадаги фуқаролар, 1- ва 2-гуруҳ ногиронлиги бор шахслар, шунингдек, ижтимоий реестрда камбағал оила сифатида рўйхатга олинган юртдошларимиз қамраб олинди. Улардан ташқари, Афғон уруши ҳамда Чернобиль ҳалокати қатнашчилари ҳам ушбу бепул кардиоскрининг дастурига киритилган бўлиб, зарурат туғилганда уларга тиббий суғурта доирасида бепул стент қўйиш амалиёти ҳам бажарилиши кўзда тутилган. Бундай эътибор ва ғамхўрлик аҳолининг давлатга ва эртанги кунга бўлган ишончини янада мустаҳкамлашга хизмат қилиши шубҳасиздир.
Инсон саломатлиги бебаҳо бойликдир. Ўз вақтида ўтказилган тўғри ва аниқ текширувлар кўплаб оғир асоратларнинг олдини олишга, энг муҳими, инсон ҳаётини асраб қолишга хизмат қилади. Амударё туманида ташкил этилган бу галги тиббий акция ҳам юртдошларимизни ўз соғлиғига эътиборли бўлишга чақириб, давлатимиз томонидан халқ саломатлиги йўлида яратилаётган улкан имкониятларнинг яна бир амалий ифодаси бўлди.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
