Автомобилларни ювиш шохобчаларида профилактик тадбирлар ўтказилмоқда
Жамиятда тинчлик ва осойишталикни мустаҳкамлаш, фуқароларнинг шахсий ҳамда мулкий хавфсизлигини ҳимоя қилиш ва ҳуқуқбузарликларнинг барвақт олдини олиш бугунги кунда энг устувор вазифаларидан саналади. Айниқса, сўнгги пайтларда автотранспорт воситалари билан боғлиқ кўнгилсиз ҳодисаларнинг олдини олиш мақсадида кенг қамровли профилактик тадбирлар тизимли равишда амалга оширилмоқда. Жорий йилнинг 1 июль кунидан 1 август санасига қадар бутун республикамиз бўйлаб ўтказилаётган "Хавфсиз ва соғлом юрт" ойлиги доирасида бу каби тадбирлар қамрови янада ортмоқда.
Мазкур ойлик профилактик тадбирлар доирасида Нукус шаҳрида ҳам ички ишлар органлари ходимлари томонидан аҳоли ўртасида, хусусан, ҳайдовчилар ва хизмат кўрсатиш соҳаси вакиллари билан мунтазам равишда тушунтириш ҳамда тарғибот ишлари олиб борилмоқда. Жумладан, Нукус шаҳрида жойлашган автотранспорт воситаларини ювиш шохобчаларида ўтказилаётган учрашувлар бунинг яққол далилидир.
Ушбу жараёнда масъул ходимлар томонидан автотранспорт бошқарувчиларига ўзларига тегишли бўлган мулкни кўздан қочирмаслик, автомобилларни қаровсиз ва назоратсиз қолдирмаслик юзасидан қатъий тавсиялар берилмоқда. Айниқса, транспорт воситаларининг эшикларини қулфламасдан, калитларини ичида қолдириб кетиш ҳолатлари турли кўнгилсизликларга, жумладан, автомобилни ўғирлаш ва олиб қочиш каби оғир турдаги жиноятларга сабаб бўлиши мумкинлиги кундалик ҳаётий мисоллар ёрдамида тушунтириб ўтилмоқда. Бундай эътиборсизлик ва бепарволик нафақат мулкдорга жуда катта миқдорда моддий зарар етказади, балки бутун жамият хавфсизлигига ҳам жиддий таҳдид солади. Шу сабабли, ҳар бир ҳайдовчи ўз транспорт воситасига нисбатан ҳушёр ва масъулиятли бўлиши шартлиги уқтирилмоқда.
Тадбирлар давомида фақатгина ҳайдовчилар эмас, балки автомобилларни ювиш шохобчаларининг масъул раҳбарлари ҳамда у ерда меҳнат қилаётган ишчи-хизматчилар билан ҳам алоҳида суҳбатлар ўтказилиб, уларга ҳам зарур тавсиялар берилмоқда. Уларга ўз кундалик иш фаолиятлари давомида атрофдаги ҳар қандай шубҳали ҳолатларга асло бефарқ қарамасликлари бўйича зарур кўрсатмалар берилмоқда.
Хусусан, хизмат кўрсатиш ва тозалаш учун олиб келинган транспорт воситаларини кўздан кечириш вақтида уларда қон доғлари ёки бошқа турдаги йўл-транспорт ҳодисалари ҳамда турли авария излари, яъни шубҳали ва кескин шикастланишлар мавжудлиги аниқланса, бу ҳақда ҳудудий Ички ишлар бўлимларига хабар бериш тизими ва унинг тартиб-қоидалари тушунтирилмоқда. Чунки, бу каби шубҳали излар ва белгилар қандайдир оғир жиноятнинг ёки жабрланувчини ҳодиса жойида ёрдамсиз ташлаб кетиш билан боғлиқ бўлган мудҳиш авариянинг асосий ашёвий далили бўлиши мумкин. Автомобилларни ювиш шохобчалари ходимларининг вақтида ва тезкорлик билан берган хабари туфайли содир этилган жиноятларни иссиқ изидан фош этиш ёки жабрланган фуқароларга тезкорлик билан тиббий ёрдам кўрсатиш имконияти яратилади.
Нукус шаҳридаги автомобилларни ювиш шохобчаларида ўтказилган тушунтириш ишлари одамларни янада ҳушёрликка чақиришга ва энг асосийси, эҳтимолий жиноятлар ҳамда бахтсиз ҳодисаларнинг олдини олишга қаратилгани билан ғоят аҳамиятлидир. Ҳар бир мулкдор ва фуқаро ўз шахсий хавфсизлиги ҳамда мулки учун биринчи навбатда ўзи жавобгар эканлигини унутмаслиги, атрофдагилар эса шубҳали ҳолатларда фаол фуқаролик позициясини намоён этиши бугунги кун талабидир.
"Хавфсиз ва соғлом юрт" ойлиги доирасида амалга оширилаётган бу каби тарғибот ва профилактик чора-тадбирлар ҳар бир фуқаронинг тинч ва осойишта ҳаётини таъминлашга, уларнинг хавфсизлигини кафолатлашга хизмат қилади.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
