Болаларни вирусли гепатит А касаллигига қарши бепул эмлаш ишлари давом этмоқда

Сўнгги йилларда республикамиз тиббиёт тизимида юқумли касалликларга қарши мунтазам профилактик эмлаш тадбирларининг кенг кўламда амалиётга татбиқ этилиши ва аҳолини бу муҳим жараёнга қамраб олиш кўрсаткичларининг юқори даражага етказилиши натижасида болалар ўртасида хавфли инфекциялар тарқалишининг олди олинмоқда. Хусусан, мақсадли ва тизимли тиббий профилактика туфайли бугунги кунга келиб шол, бўғма, қоқшол каби инсон ҳаётига хавф солувчи ҳамда ўта оғир асоратларга олиб келувчи касалликларни бутунлай йўқотишга эришилди. Бироқ, замонавий тиббиёт қанчалик ривожланмасин, айрим турдаги юқумли хасталиклар ҳануз жамият саломатлигига, хусусан, кичик ёшдаги болалар соғлиғига жиддий хавф туғдиришда давом этмоқда. Ана шундай долзарб хасталиклардан бири вирусли гепатит А касаллиги бўлиб, кейинги йилларда бутун республикамизда, шу жумладан, Қорақалпоғистон Республикасида ҳам ушбу инфекция билан касалланиш ҳолатларининг кўплаб қайд этилаётганлиги мутахассисларни жиддий ташвишга солмоқда.

Тиббий статистик маълумотларга кўра, вирусли гепатитнинг А тури умумий гепатит касалликларининг қарийб 95-96 фоизини ташкил этади. Энг ачинарлиси шундаки, ушбу хавфли инфекция билан касалланган беморларнинг 70-80 фоизини айнан 14 ёшгача бўлган болалар ташкил қилмоқда. Касаллик айниқса мактаб ўқувчилари, мактабгача таълим муассасаларига тарбияланувчилари ҳамда уюшмаган болалар орасида тезкорлик билан тарқалаётгани кузатилмоқда.

Жойларда соғлиқни сақлаш, халқ таълими ва санитария хизматлари томонидан доимий равишда санитария-гигиеник ҳамда эпидемияга қарши кенг кўламли тадбирлар ўтказилиб келинаётганига қарамасдан, касаллик кўрсаткичи ҳамон юқорилигича қолмоқда.

Мутахассисларнинг қатъий хулосасига кўра, вирусли гепатитга қарши курашишнинг энг самарали ва ишончли усулларидан бири — бу профилактик эмлашдир. Бироқ, ушбу турдаги вакцинация фақатгина эпидемик кўрсатмаларга асосан олиб борилганлиги сабабли, у ҳозирча «Миллий эмлаш календари»га расман киритилмаган. Натижада шу вақтга қадар болаларни вирусли гепатит А инфекциясига қарши эмлаш тадбирлари асосан ота-оналарнинг ўз ҳисобидан амалга оширилиши кўзда тутилган эди ва баъзи оилалар бу қўшимча молиявий харажатларни қоплашга қийналар эди.

Аҳоли, айниқса, ижтимоий ҳимояга муҳтож қатлам саломатлигини асраш мақсадида давлатимиз томонидан муҳим қадамлар ташланмоқда. Ҳурматли Президентимизнинг Қорақалпоғистон Республикасини ижтимоий-иқтисодий ривожлантириш ва аҳоли саломатлигини муҳофаза қилишга қаратаётган алоҳида эътибори натижасида “Қорақалпоғистон Республикасида тадбиркорликни янада қўллаб-қувватлаш ҳамда аҳоли фаровонлигини таъминлаш учун янги имкониятларни яратиш бўйича қўшимча чора-тадбирлар тўғрисида”ги Президент фармони қабул қилинди. Ушбу фармоннинг 29-бандида белгиланган вазифалар ижросини таъминлаш мақсадида давлат томонидан 8,4 миллиард сўм маблағ ажратилди. Мазкур молиявий кўмак натижасида Ўзбекистон Республикаси Санитария-эпидемиологик осойишталик ва жамоат саломатлиги қўмитаси томонидан Қорақалпоғистон Республикаси аҳолиси орасида вирусли гепатит А инфекцияси билан касалланиш ҳолатларини камайтириш мақсадида давлат бюджети ҳисобидан махсус вакциналар олиб келинди.

Ушбу ҳаётий муҳим препаратлар биринчи навбатда 6 ёшдаги болаларни ҳамда ижтимоий ҳимояга муҳтож оилаларнинг фарзандларини бепул эмлаш учун йўналтирилмоқда. Тиббий-профилактика тадбирлари ҳудудлар бўйлаб изчиллик билан амалга оширилиб, харид қилинган вакциналар Амударё туманига ҳам етиб келди.

Вакциналар махсус тиббий транспорт воситалари ёрдамида тумандаги мавжуд 14 та эмлаш пунктларига хавфсиз тарзда етказиб берилди. Айни пайтда жойлардаги муассасаларда 2019 йилда туғилган болаларни ва ижтимоий ҳимояга муҳтож оилаларнинг фарзандларини режали тарзда эмлаш ишлари жадал бошлаб юборилди.

Давлатимиз томонидан кўрилаётган бундай кенг қамровли ва тезкор чора-тадбирлар нафақат бугунги кундаги эпидемиологик вазиятни барқарорлаштиришга, балки эртанги кунимиз эгалари бўлган болаларимизнинг ҳар томонлама соғлом ва бекаму кўст вояга етишлари учун мустаҳкам пойдевор яратади. Миллат саломатлигини асраш эса доимо давлатнинг энг олий мақсади бўлиб қолади.