ЕРГА МЕҲР БЕРИБ, БАРАКА ТОПАЁТГАНЛАР
Ёз — азалдан деҳқоннинг сабр-қаноати ва матонатини синовдан ўтказади. Жазирама иссиқни ҳам писанд қилмай бирин-кетин, изчиллик асосида амалга ошириладиган агротехник тадбирларни сифатли ўтказишни ният қилган деҳқон аҳли учун бу фаслнинг ҳар бир дақиқаси ҳисобда. Айниқса, чилла киргач, бажариладиган агротехник амаллар ўз вақтида сифатли амалга оширилмаса, кўзланган мақсадга эришиш қийин. Шунинг учун ҳам тажрибали, омилкор деҳқонлар, ҳарорат жуда юқори бўлган кезларда ҳам дала юмушларини асло ортга суриб , "куннинг тафти бироз пасайсин", қабилида иш тутишмайди. Буни биз ижодий гуруҳимиз билан Амударё туманининг Хизр эли маҳалла фуқаролар йиғини ҳудудидаги "Ражапов Омонбой" фермер хўжалиги ишчилари фаолияти билан танишиш асносида яққол ҳис этдик.
Ўтган 2024 қишлоқ хўжалик йилини барча йўналишлар бўйича муваффақиятли якунлаган фермер хўжалиги аъзоларининг жорий йилги режалари ҳам баланд. Омонбой Ражабов раҳбарлигидаги мазкур фермер хўжалиги ерлари 26 нафар ижарачи-деҳқонга бўлиб берилган. Эрта баҳорда 40 гектар майдонга "Султон" навли тез пишар чигит экилган далалар айни пайтда ҳосилга кирган. Хўжалик ижарачи-деҳқонларининг ўзаро аҳилликлари, агротехник тадбирларни амалга оширишда ҳамжиҳатлик билан иш юритишлари натижасида ғўза ниҳоллари баравж ривожланмоқда. Ёз мавсумининг ҳарорат энг юқори бўлган кунлари хўжалик ишчилари дала ишларини эрталабки ва кечки салқин пайтларида амалга оширишгани ғўзага чилла сувини тарашда муҳим аҳамият касб этди. Жўякларда сувнинг узоқ вақт туриб қолишининг олди олиниб, юқори ҳарорат таъсирида ҳосил нишоналарининг нобуд бўлишига йўл қўйилмади. Айни кунларда эса бегона ўтлардан тозаланиб, чилла сувига қондириб суғорилган ва тобига келган далаларда ғўза қатор ораларига ишлов бериш, чилпиш ишлари амалга оширилмоқда.
Соғлом ва дуркун ривожланаётган ғўзаларнинг ҳосил туганаклари кўзларни қувонтиради. Биринчи сувдан кейинги шудгорлаш ишларининг сифатли олиб борилишини таъминлаш мақсадида мавжуд техника воситаларини таъмирлаш, мавсумий ишларга шайлашга алоҳида эътибор қаратилгани боис, бу борада муаммо йўқ ҳисоби. Фермер хўжалиги ихтиёридаги 2 та МТЗ—80-11 русумли ва "Орион" тракторлари деҳқонлар учун ҳамиша қўл-қанот.
Фермер хўжалигида пахтадан ташқари 10 гектар майдонда буғдой ҳам етиштирилади. Хўжалик ғаллакорлари жорий деҳқончилик йилида ғалладан юқори ҳосил олдилар. 62 тоннадан зиёд аъло навли қирмизи дон йиғиштириб олиниб, 2025 йилги контрактация шартномаси режасига мувофиқ давлатга 31 тонна ҳосил етказиб берилди. Етиштирилган ҳосилнинг 31 тоннадан зиёди фермер хўжалиги ихтиёрида қолгани боис, ижарачи-деҳқонлар ва ишчиларнинг манфаатдорлиги ҳам ошди. Жами 12 тонна буғдой хўжалик ишчиларига тақсимлаб берилди. Хўжаликда пахта ва ғалладан ташқари, мойли экинлар экишга ҳам алоҳида эътибор қаратилади.
Айни пайтда 3,5 гектар майдондаги кунжут ҳам мўл ҳосилдан дарак бериб турибди. Бундан ташқари, 2 гектар майдондаги тарвуз ва 1,5 гектар ердаги қовун пайкаллари ҳосил нишоналаридан фермер хўжалиги раҳбари Омонбой Ражабовнинг ҳам, ижарачи-деҳқонларнинг ҳам кўнгиллари тўқ. Ишни "Даладан—дастурхонга" тамойили асосида ташкил қилган хўжалик деҳқонлари томонидан етиштирилган полиз маҳсулотлар ҳар доимгидай бу йил ҳам харидоргир. Айни пайтда тарвуз ва қовун пайкалларида пишиб-етилган ҳосилни ички бозорга йўналтириш орқали халқимиз дастурхонининг тўкинлигига ҳисса қўшиш мақсадида ҳосил йиғиш ишлари олиб борилмоқда.
Ерга меҳр берган инсон асло кам бўлмайди, балки барака топади. Фидойи меҳнатлари туфайли ўзининггина эмас, халқнинг ҳам ҳаётига файз бағишлайди. Хизр эли маҳалласининг ҳар бир кунига, эл-юртга қут-барака бахш этиш мақсадида меҳнат қилаётган Омонбой Ражабов раҳбарлигидаги фермер хўжалиги далаларини оралаб, ортга, шаҳарга қайтарканмиз, хўжалик далаларида барқ уриб турган файз-у тароватдан кўнгилларимиз янада юксалди.
Робия Йўлдошева.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
