Чақирувга қадар бошланғич тайёргарлик раҳбарлари учун уч кунлик семинар ўтказилди

Ёшларни ҳарбий хизматга пухта тайёрлаш, уларда Ватан ҳимояси билан боғлиқ масъулият туйғусини камол топтириш бугунги кунда таълим тизими ва мудофаа идоралари олдида турган устувор вазифалардан ҳисобланади. Бу йўналишдаги ишлар самараси эса кўп жиҳатдан ўқувчилар билан бевосита ишлайдиган мутахассисларнинг билими, тайёргарлиги ва методик маҳоратига боғлиқ бўлади.

Мамлакатимизда амалга оширилаётган ҳарбий ислоҳотлар доирасида умумтаълим муассасаларидаги чақирувга қадар бошланғич тайёргарлик тизимини такомиллаштириш, бу соҳада фаолият юритаётган раҳбарларнинг касбий даражасини мунтазам ошириб бориш масаласига алоҳида эътибор қаратилмоқда. Айнан шу мақсадда ҳудудларда ўқув-услубий машғулотлар, семинарлар ва амалий тренинглар изчил йўлга қўйилган. Бундай тадбирлар раҳбарларга ўз билимларини янгилаш, амалиётда учрайдиган саволларга аниқлик киритиш имконини беради.

Ўзбекистон Республикаси Мудофаа вазирининг 2026 йил 25 июль кунидаги "Ўзбекистон Республикаси Мудофаа вазирлиги тизимидаги умумтаълим муассасаларига бириктирилган Чақирувга қадар бошланғич тайёргарлик раҳбарлари билан ўқув-услубий семинарлар ўтказиш тўғрисида"ги буйруғи ижросини таъминлаш мақсадида Амударё туманида навбатдаги ўқув-услубий семинар ташкил этилди.

Семинар жорий йилнинг 18-20 август кунлари, яъни уч кун давомида бўлиб ўтди. Унда туман ҳудудидаги ўрта умумтаълим мактабларининг чақирувга қадар бошланғич тайёргарлик раҳбарлари иштирок этиб, машғулотлар назарий ва амалий йўналишларни ўзаро уйғунлаштирган ҳолда олиб борилди. Дастур шундай тузилганки, ҳар бир назарий мавзудан кейин унинг амалиётдаги ифодаси кўриб чиқилди.

Тадбирни Амударё тумани мудофаа ишлари бўлими бошлиғи подполковник Шуҳрат Маматов очиб берди. Ўқув-услубий семинарда туман мудофаа ишлари бўлими бошлиғи ўринбосари Закир Садуллаев, чақирувга қадар бошланғич тайёргарлик раҳбари услубчиси Ғайрат Юлдашев ҳамда 85 та ўрта умумтаълим мактабининг тегишли раҳбарлари қатнашишди.

Машғулотларда энг аввало Ўзбекистон Республикаси Президенти, Вазирлар Маҳкамаси ва тегишли вазирликларнинг ёшларни ҳарбий хизматга тайёрлашга доир меъёрий ҳужжатлари мазмун-моҳияти иштирокчиларга батафсил етказилди ҳамда уларнинг амалиётда янада сифатли ижро этилишини таъминлаш масаласи кўриб чиқилди. Ҳужжатларда белгиланган талаблар мактаб шароитида қандай бажарилиши лозимлиги аниқ мисоллар асосида тушунтирилди.

Шунингдек, минтақадаги ҳарбий-сиёсий вазият ва замонавий таҳдидлар таҳлили асосида ёшларда Ватанни ҳимоя қилиш туйғусини мустаҳкамлаш йўллари муҳокама қилинди. Бугунги кунда ахборот майдонидаги ўзгаришлар тезлигини инобатга олган ҳолда, бу масала алоҳида кўрсатиб ўтилди. Иштирокчиларга ёшлар онгини ҳар қандай бегона таъсирлардан асраш, уларга тўғри ва ишончли ахборот етказиб бориш зарурлиги таъкидланди.

Семинарнинг муҳим йўналишларидан бири чақирувга қадар бошланғич тайёргарлик раҳбарларининг методик маҳоратини замонавий рақамли технологиялар ва сунъий интеллект имкониятларидан фойдаланиш орқали ривожлантиришга бағишланди. Дарс жараёнларида янги воситаларни қўллаш ўқувчиларнинг мавзуга қизиқишини оширишдаги омил сифатида таҳлил этилди. Иштирокчиларга бундай воситалардан ўринли ва мақсадли фойдаланиш йўллари кўрсатиб ўтилди.

Шунингдек, машғулотлар давомида иштирокчиларда умумқўшин жангини бошқариш, тезкор қарор қабул қилиш ҳамда амалий ўқ отиш машғулотларини ташкил этиш бўйича мустаҳкам кўникмалар шакллантиришга ҳам алоҳида эътибор қаратилди. Бу йўналишдаги тайёргарлик мактаб шароитидаги машғулотлар сифатига бевосита таъсир кўрсатади. Айниқса, хавфсизлик қоидаларига қатъий амал қилиш масаласи доимий диққат марказида бўлиши лозимлиги таъкидланди.

Шу билан бирга, семинарда чақирувга қадар бошланғич тайёргарлик раҳбарларининг ёшлар психологияси, педагогик этика ва тенглик тамойиллари бўйича билими оширилиб, уларнинг мулоқот маданиятини юксалтириш масаласига ҳам жиддий эътибор берилди.

Таъкидлаш керакки, ўқувчи-ёшлар билан ишлашда фақат ҳарбий билим эмас, балки педагогик ёндашув ва самимий мулоқот кўникмаси ҳам муҳим аҳамият касб этади. Шу боис мазкур мавзулар машғулотлар дастурида кенг ёритилди. Чунки ўсмирлик ёшидаги ўқувчи билан мулоқот тилини топа олган раҳбар унга ҳарбий билимларни ҳам осонроқ сингдира олади. Бу эса дарсларнинг самарадорлигини оширибгина қолмай, ўқувчиларда фанга нисбатан барқарор қизиқиш уйғотишга ҳам замин яратади.

Уч кунлик семинарнинг яна бир мақсади иштирокчиларда ҳарбий интизом, масъулият ва ватанпарварлик фазилатларини мустаҳкамлаб, уларни ёш авлодга намуна бўлувчи тарбиячи сифатида шакллантиришдан иборат бўлди. Шунингдек, раҳбарлар ўртасида ўзаро тажриба алмашиш учун қулай муҳит яратилишига эришилди.

Жумладан, машғулотлар давомида мактабларда тўпланган амалий тажрибалар ўзаро таққосланиб, самарали иш усуллари бўйича фикр алмашилди. Бу эса ҳудуддаги барча таълим масканларида чақирувга қадар бошланғич тайёргарлик дарсларининг ягона талаблар асосида олиб борилишига хизмат қилади. Бундай мулоқот, айниқса, тажрибали ва фаолиятни энди бошлаган раҳбарлар учун бирдек фойдали ҳисобланади.

Ана шундай ўқув-услубий машғулотлар мактаб ва ҳарбий идора ўртасидаги ҳамкорликни мустаҳкамлаб, ёшларни ҳарбий хизматга тайёрлаш тизимининг узвийлигини таъминлайди. Билими ва тажрибаси мунтазам янгиланиб борадиган раҳбар эса ўз ўқувчиларига чинакам устоз бўла олади.