Грант лойиҳаси доирасида саҳналаштирилган спектакль ҳуқуқни муҳофаза қилиш органлари ходимларига намойиш қилинди

“Жайхун илҳомлари” нодавлат нотижорат ташкилотининг Қорақалпоғистон Республикаси Жўқорғи Кенгеси ҳузуридаги нодавлат нотижорат ташкилотларини ва фуқаролик жамиятининг бошқа институтларини қўллаб-қувватлаш жамоат фонди томонидан молиялаштирилган грант лойиҳаси доирасида Қорақалпоқ давлат ёш томошабинлар театрида “Давр дарди” номли спектакль саҳналаштирилган эди. Лойиҳа иш режасига мувофиқ мазкур саҳна асари прокуратура ва бошқа ҳуқуқни муҳофаза қилувчи органлар ходимлари учун намойиш қилинди.

Коррупциянинг давлат ва жамият тараққиётига салбий таъсири ва порахўр ҳамда таъмагир инсонларнинг тақдири қанчалик аянчли тугаши ҳаётий мисоллар орқали ифода этилган мазкур саҳна асари Байжан Узақов сценарийси асосида режиссёр Марс Нуратдинов томонидан саҳналаштирилган.

Спектаклда олий таълим муассасаларидан бирида ишловчи таъмагир ўқитувчининг жиноий хатти-ҳаракатлари фош этилади. У талабалардан бирига “Сени ўқишга мен киритдим” деб, пора талаб қилади, белгиланган пулни бермаса, ўқишдан четлатишини айтиб, талабага босим ўтказади. Факультет раҳбарияти, ҳамкасблари ҳамда ҳалол ва тўғрисўз ўқитувчиларнинг огоҳлантиришларига қарамасдан қинғир йўлдан қайтмаган “қаҳрамон”, ниҳоят ҳуқуқни муҳофаза қилиш органлари ходимлари томонидан қўлга олинади ва жазога тортилади.  

Дарҳақиқат, таълим муассасаларида академик интизом ва ҳалолликни сақлаш муҳим аҳамиятга эга. Бу каби спектакллар, баъзи ғараз ниятли ўқитувчиларнинг кирдикорларини фош этиш орқали талабалар ва ўқитувчилар ўртасидаги муносабатларда шаффофликни таъминлашга хизмат қилади. Спектаклни намойиш қилишдан кўзланган бош мақсад ҳам таъмагирлик, коррупция каби зарарли иллатларга қарши курашиш ва аҳоли онгида ушбу иллатларга нисбатан муросасизлик туйғусини шакллантиришдир. Бу каби асарлар, томошабинларни ўйлантириб, уларнинг виждонига таъсир қилади ва ижтимоий адолат учун курашишга ундайди.

Спектаклга ҳуқуқни муҳофаза қилиш органлари ходимларининг таклиф этилиши ҳам бежиз эмас. Сабаби, ҳуқуқни муҳофаза қилиш органлари томонидан жамиятда ва ўз ходимлари орасида коррупциянинг олдини олиш мақсадида қатор амалий ишлар қилинмоқда. Ходимларнинг малакасини ошириш, уларнинг иш фаолиятини назорат қилиш ва жавобгарликни кучайтириш каби чоралар бунга яққол мисолдир.

Коррупцияга қарши курашиш – бу узоқ муддатли ва мураккаб жараён бўлиб, унда ҳамма даражадаги фуқароларнинг иштироки ва жамиятнинг барча қатламлари билан ҳамкорлик зарур. Жамиятда коррупцияга нисбатан муросасизлик маданиятини шакллантириш ва фуқароларнинг ҳуқуқий онгини ошириш орқали коррупцияга қарши курашиш самарадорлигини янада ошириш мумкин. Зеро, коррупция – бу жамият ва давлат ривожланишига жиддий тўсиқ бўлувчи иллатдир. У иқтисодий ўсишни секинлаштиради, адолатсизликни кучайтиради ва давлат институтларининг самарадорлигини пасайтиради. Коррупция инвестицияларнинг камайиши, қонун устуворлигининг заифлашиши ва жамиятдаги ишончнинг йўқолиши каби салбий оқибатларга ҳам олиб келади.

Қорақалпоқ давлат ёш томошабинлар театрининг истеъдодли актёр ва актрисалари спектаклдаги ўз ролларини маромига етказиб ижро қилиш орқали томошабинларни ҳалолликка, ўз хизмат вазифасини виждонан бажаришга чорлаган бўлса ажаб эмас.