Қиличбой овулида ҳуқуқ-тартибот органи томонидан оталиққа олинган ёшлар учун концерт дастури ташкил қилинди
Бугунги кунда мамлакатимиз бўйлаб ёшларда ватанпарварлик, жамият ҳаётига дахлдорлик ва қонунларга ҳурмат каби туйғуларни шакллантиришга қаратилган манзилли чора-тадбирлар амалга оширилмоқда.
Маълумки, Ўзбекистон Республикаси Президенти Шавкат Мирзиёев раислигида 2024 йилнинг 12 январь куни Хавфсизлик Кенгашининг кенгайтирилган йиғилишида ҳамда Маҳаллаларда ёшлар билан ишлаш масалаларини мувофиқлаштириш бўйича республика комиссиясининг 2024 йил 29 январь кунги “Ҳуқуқ-тартибот ва мудофаа органлари томонидан 2024 йилда ёшларни оталиққа олиш ва улар билан манзилли ишлаш тўғрисида”ги йиғилиш баёнига кўра, ёшлар билан ишлаш масалалари бўйича ҳуқуқ-тартибот органларига қатор вазифалар юклатилган эди. Хусусан, эндиликда республика миқёсида ёшларни ҳуқуқ-тартибот ва мудофаа органларига бириктириб, уларни оталиққа олиш тизимини жорий этиш белгиланганди.
Ушбу йўналишда Амударё туманида ҳам қатор амалий ишлар қилинмоқда. 14 август куни туманнинг 2-сектори ҳудудида жойлашган Қиличбой маданият маркази биноси ҳовлисида ташкил этилган маданий-маърифий концерт дастури ҳам шулар жумласидандир. Тадбирда Амударё тумани ҳокими ўринбосари Нодир Камолов, туман прокурори, адлия маслаҳатчиси Абат Жумамуратов, Мажбурий ижро бюроси туман бўлими бошлиғи Қуанишбек Есенбеков, туман Ички ишлар бўлими бошлиғи Муҳаммад Хўжамуратов ва туман прокурори ёрдамчиси Санжар Абдуллаевлар иштирок этишди.
Таъкидланганидек, мамлакатимизда ёшлар билан ишлаш бўйича мутлақо янги тизим яратилгани натижасида уларнинг ижтимоий фаоллиги, Ватан ва халқ тақдирига дахлдорлик ҳисси кучайиб, Янги Ўзбекистонни бунёд этиш йўлида муносиб хизмат қилишмоқда.
Дарҳақиқат, келажак эгалари бўлган ёшларнинг қонуний ҳуқуқ ва манфаатларини таъминлаш, уларнинг орзу-интилишлари, қобилият ва салоҳиятини рўёбга чиқариш давлатимиз сиёсатининг энг устувор йўналиши ҳисобланади. Мамлакатимизда халқимизнинг ҳақ-ҳуқуқлари ва эркинликлари ҳимоя қилинаётгани эртанги кунга ишончимизни янада оширмоқда.
Айниқса, ёшларимизнинг эзгу интилиш ва ташаббусларини, инновацион ғояларини қўллаб-қувватлаш, уларга мос бўлган замонавий иш ўринларини кўпайтириш, ҳаётий муаммоларига янада кўпроқ эътибор қаратиш барча даражадаги давлат идораларининг энг асосий вазифасига айланди.
Мамлакатимизда яратилаётган имкониятларга жавобан ёшларимиз ҳам муносиб ҳаракат қилишмоқда. Спортчиларимизнинг Париж Олимпиадасидаги улкан тарихий зафарлари қалбимизга чексиз ифтихор бахш этмоқда. Мусобақада қаҳрамонларимиз юксак матонат, маҳорат ва ирода кўрсатиб, дунёда 13-ўрин, Осиёда 4-ўрин, туркий ва МДҲ давлатлари орасида 1-ўринни эгалладилар. Бир йўла 3 нафар спортчимиз “икки карра Олимпиада чемпиони” деган юксак шарафли номга сазовор бўлишди.
Тадбирида туман Маданият бўлимининг хушовоз хонандалари ижросида Ватан мадҳи, юрт мустақиллиги, халқлар дўстлиги тараннум этилган куй-қўшиқлар қалбларга шукроналик туйғуларини олиб кирди. Дарҳақиқат, Ватан – ягона, Ватан – барчамизники!
“Жайхун мўъжизаси” анъанавий саҳна цирк жамоаси бадиий раҳбари Ҳайитбой Жуманиёзов ижросидаги цирк томошалари ҳам ёшларда катта қизиқиш уйғотди. Цирк ижодкорининг сирли ва нозик ҳаракатлари барчани ҳайратлантирди.
Қизиқарли ўтган тадбир бутун овул аҳлига кўтаринкилик бахш этди.
Санжар Абдуллаев, Амударё туман прокурори ёрдамчиси
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
