Qilichboy ovulida huquq-tartibot organi tomonidan otaliqqa olingan yoshlar uchun kontsert dasturi tashkil qilindi

Bugungi kunda mamlakatimiz boʻylab yoshlarda vatanparvarlik, jamiyat hayotiga daxldorlik va qonunlarga hurmat kabi tuygʻularni shakllantirishga qaratilgan manzilli chora-tadbirlar amalga oshirilmoqda.

Maʼlumki, Oʻzbekiston Respublikasi Prezidenti Shavkat Mirziyoyev raisligida 2024-yilning 12-yanvar kuni Xavfsizlik Kengashining kengaytirilgan yigʻilishida hamda Mahallalarda yoshlar bilan ishlash masalalarini muvofiqlashtirish boʻyicha respublika komissiyasining 2024-yil 29-yanvar kungi “Huquq-tartibot va mudofaa organlari tomonidan 2024-yilda yoshlarni otaliqqa olish va ular bilan manzilli ishlash toʻgʻrisida”gi yigʻilish bayoniga koʻra, yoshlar bilan ishlash masalalari boʻyicha huquq-tartibot organlariga qator vazifalar yuklatilgan edi. Xususan, endilikda respublika miqyosida yoshlarni huquq-tartibot va mudofaa organlariga biriktirib, ularni otaliqqa olish tizimini joriy etish belgilangandi.

Ushbu yoʻnalishda Amudaryo tumanida ham qator amaliy ishlar qilinmoqda. 14-avgust kuni tumanning 2-sektori hududida joylashgan Qilichboy madaniyat markazi binosi hovlisida tashkil etilgan madaniy-maʼrifiy kontsert dasturi ham shular jumlasidandir. Tadbirda Amudaryo tumani hokimi oʻrinbosari Nodir Kamolov, tuman prokurori, adliya maslahatchisi Abat Jumamuratov, Majburiy ijro byurosi tuman boʻlimi boshligʻi Quanishbek Yesenbekov, tuman Ichki ishlar boʻlimi boshligʻi Muhammad Xoʻjamuratov va tuman prokurori yordamchisi Sanjar Abdullayevlar ishtirok etishdi.

Taʼkidlanganidek, mamlakatimizda yoshlar bilan ishlash boʻyicha mutlaqo yangi tizim yaratilgani natijasida ularning ijtimoiy faolligi, Vatan va xalq taqdiriga daxldorlik hissi kuchayib, Yangi Oʻzbekistonni bunyod etish yoʻlida munosib xizmat qilishmoqda.

Darhaqiqat, kelajak egalari boʻlgan yoshlarning qonuniy huquq va manfaatlarini taʼminlash, ularning orzu-intilishlari, qobiliyat va salohiyatini roʻyobga chiqarish davlatimiz siyosatining eng ustuvor yoʻnalishi hisoblanadi. Mamlakatimizda xalqimizning haq-huquqlari va erkinliklari himoya qilinayotgani ertangi kunga ishonchimizni yanada oshirmoqda.

Ayniqsa, yoshlarimizning ezgu intilish va tashabbuslarini, innovatsion gʻoyalarini qoʻllab-quvvatlash, ularga mos boʻlgan zamonaviy ish oʻrinlarini koʻpaytirish, hayotiy muammolariga yanada koʻproq eʼtibor qaratish barcha darajadagi davlat idoralarining eng asosiy vazifasiga aylandi.

Mamlakatimizda yaratilayotgan imkoniyatlarga javoban yoshlarimiz ham munosib harakat qilishmoqda. Sportchilarimizning Parij Olimpiadasidagi ulkan tarixiy zafarlari qalbimizga cheksiz iftixor baxsh etmoqda. Musobaqada qahramonlarimiz yuksak matonat, mahorat va iroda koʻrsatib, dunyoda 13-oʻrin, Osiyoda 4-oʻrin, turkiy va MDH davlatlari orasida 1-oʻrinni egalladilar. Bir yoʻla 3 nafar sportchimiz “ikki karra Olimpiada chempioni” degan yuksak sharafli nomga sazovor boʻlishdi.

Tadbirida tuman Madaniyat boʻlimining xushovoz xonandalari ijrosida Vatan madhi, yurt mustaqilligi, xalqlar doʻstligi tarannum etilgan kuy-qoʻshiqlar qalblarga shukronalik tuygʻularini olib kirdi. Darhaqiqat, Vatan – yagona, Vatan – barchamizniki!

“Jayxun moʻʼjizasi” anʼanaviy sahna tsirk jamoasi badiiy rahbari Hayitboy Jumaniyozov ijrosidagi tsirk tomoshalari ham yoshlarda katta qiziqish uygʻotdi. Tsirk ijodkorining sirli va nozik harakatlari barchani hayratlantirdi.

Qiziqarli oʻtgan tadbir butun ovul ahliga koʻtarinkilik baxsh etdi.

Sanjar Abdullayev, Amudaryo tuman prokurori yordamchisi