“Oʻzagroinspektsiya”ning tuman boʻlimi tomonidan sayyor qabul oʻtkazildi
Qishloq xoʻjaligi sohasidagi dolzarb masalalarni joyida oʻrganish va fermerlarga amaliy yordam koʻrsatish maqsadida Amudaryo tumanidagi Amir Temur nomli ovulda “Oʻzagroinspektsiya”ning tuman boʻlimi tomonidan navbatdagi sayyor qabul oʻtkazildi.
Sayyor qabul davomida hududdagi bir qator fermer xoʻjaliklari va tadbirkorlik subʼektlari rahbarlari oʻzlarini qiynayotgan muammolar hamda takliflar bilan murojaat qilishdi. Xususan, “Sultonov Sobir” fermer xoʻjaligi rahbari tuman hokimligining qishloq xoʻjaligi boʻlimi tomonidan 2027-yil hosili uchun 16 gektar maydonga gʻalla ekish rejalashtirilganini taʼkidlab, 2026-yilda yetishtirilgan texnik gʻalla urugʻligidan oʻz hisobidan ekish mumkinligi yuzasidan ruxsat va maslahat soʻradi.
Shuningdek, tumanning Nazarxon ovuli hududida faoliyat yurituvchi “Mang‘it amu briket” masʼuliyati cheklangan jamiyati rahbari paxta maydonlarida defoliatsiya tadbirlarini oʻtkazish tartiblari toʻgʻrisida batafsil maʼlumot berishni soʻrab murojaat qildi.
Bundan tashqari, “Allaberganov Izzatjon” fermer xoʻjaligi rahbari Umidjon Allaberganov 2026-yilgi paxta yigʻim-terimi mavsumida paxta xomashyosini qabul qilish maskanlariga betalafot yetkazib berish maqsadida xoʻjalikning qoʻshimcha tirkamalari uchun vaqtinchalik davlat raqam belgilarini olish masalasida amaliy yordam koʻrsatilishini soʻradi.
Mutasaddilar tomonidan har bir murojaat atroflicha oʻrganilib, qonunchilikda belgilangan tartibda huquqiy tushuntirishlar berildi va koʻtarilgan masalalarni tezkor hal etish boʻyicha tegishli chora-tadbirlar belgilandi. Bu kabi sayyor qabullar soha vakillarining muammolarini tinglash va ularni vaqtida qoʻllab-quvvatlash orqali yurtimizda agrar tarmoqni yanada rivojlantirishga xizmat qiladi.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
