Энерготежамкор ускуналар ресурсларни тежашга хизмат қилади
Барчамизга яхши маълумки, бугунги кунда табиий газ ва электр энергиясига бўлган талаб кундан кунга ошиб бормоқда. Барқарор энергия таъминоти, албатта, самарадорлик ва тежамкорлик масалалари билан чамбарчас боғлиқ ҳисобланади. Шу маънода овул ва маҳаллаларда масъуллар томонидан истеъмолчиларга энергияни тежаш, табиий газ ва электр энергияси ресурсларидан оқилона фойдаланиш, энергия самарадорлигини ошириш юзасидан олиб борилаётган тушунтириш-тарғибот ишлари муҳим аҳамият касб этмоқда. Амударё туманининг Беруний маҳалласида аҳоли вакиллари билан ташкил этилган учрашувлар ҳам шулар жумласидандир.
Мазкур тадбирда туман прокуратураси масъуллари, Фавқулодда вазиятлар бўлими ходимлари, электр таъминоти корхонаси вакиллари, Беруний маҳалласидаги “еттилик” вакиллари ва бошқалар иштирок этишди.
Таъкидланганидек, мамлакатимизда энергетика фаровонлигини таъминлаш учун электр энергияси ва табиий газдан оқилона фойдаланиш, ёшларни тежамкорликка ўргатиш ҳар бир фуқаронинг муҳим вазифаларидан бири бўлиши лозим. Халқимизнинг истеъмол маданиятини оширишда энергия самарадорлиги ва тежамкорлик масаласига жамоатчилик эътиборини жалб этиш ҳар жиҳатдан мақсадга мувофиқ саналади. Акс ҳолда, энергия ресурсларидан оқилона фойдаланмаслик оқибатида келгусида кўплаб муаммолар юзага келиши мумкин.
Тадбирда мутахассислар томонидан энерготежамкор газ иситиш тизими ускуналари, электр энергияси ишлаб чиқарувчи қуёш панеллари ва бошқа энерготежамкор буюмлар тақдимот қилинди ва уларнинг афзалликлари тўғрисида батафсил ахборот берилди.
Таъкидлаш жоизки, инсоният фойдаланаётган табиий энергия ресурслари аста-секин тугаб боряпти, бирламчи ёқилғи-энергетика ресурсларини қазиб олиш ва қайта ишлаш харажатлари ошиб, улардан оқилона фойдаланмаслик атроф-муҳитга салбий таъсир кўрсатмоқда. Мамлакатимизда бу муаммонинг ечими сифатида қурилишда инновацион ёндашувлар асосида ресурслардан самарали фойдаланиш устувор йўналишлардан бирига айланган.
Шубҳасиз, энерготежамкор газ қурилмалари орқали нафақат табиий газ иқтисод қилинади, балки истеъмол учун тўловлар қиймати анча камаяди. Шунингдек, замонавий қурилмалар ёнғин хавфининг олдини олишда ҳам хизмат қилади.
Маълумки, бугунги кунда энерготежамкор уйлар қуриш муҳим аҳамиятга эга ҳисобланади. Хонадонларга, ижтимоий объектларга ўрнатилган қуёш панеллари асосий эҳтиёжлардан бири бўлган ёритиш чироқлари, қувватлаш мосламалари, телевизор ва музлаткич ишлаши учун зарур электр энергияси билан таъминлайди. Шунингдек, атроф-муҳитга хавфсизлиги сабаб қайта тикланадиган энергия манбалари тезлик билан ривожланмоқда.
Сир эмаски, сўнгги йилларда энергияни тежаш нафақат мамлакатимиз давлат сиёсатининг устувор йўналишига, балки бутун дунёда ҳам асосий масалалардан бирига айланган. Биз истеъмолчи сифатида ўз ҳақ-ҳуқуқларимиздан тўлиқ фойдаланишни истар эканмиз, мамлакат фуқароси сифатида энергия тежамкорлиги ва самарадорлиги бўйича ўз мажбуриятларимизни ҳам тўла бажаришни унутмайлик. Зеро, Бош Қомусимизнинг 68-моддасида таъкидланганидек, ер, ер ости бойликлари, сув, ўсимлик ва ҳайвонот дунёси ҳамда бошқа табиий ресурслар умуммиллий бойликдир, улардан оқилона фойдаланиш зарур ва улар давлат муҳофазасидадир.
Шоҳзод Қурбонбоев
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
