Халқлар дўстлиги куни кенг нишонланди

2011 йил 3 майда БМТ Бош ассамблеяси томонидан 30 июль санасини Халқлар дўстлиги куни сифатида эълон қилинган. Ушбу сана 2021 йил 10 февраль куни қабул қилинган Ўзбекистон Республикасининг Қонунига мувофиқ мамлакатимизда ҳам Халқлар дўстлиги куни этиб белгиланган ва шундан буён ҳар йили миллатларо тотувлик куни сифатида тантанали равишда нишонланиб келмоқда.

Сана муносабати билан Амударё тумани Хотира майдонида катта байрам тадбири, гала концерт дастури бўлиб ўтди. Тадбирда туман ҳокими Собир Хўжаметов, секторлар раҳбарлари, ҳоким ўринбосарлари, бўлимлар масъуллари, нуронийлар ҳамда аҳоли вакиллари иштирок этдилар.

Меҳмонлар дастлаб тадбир доирасида ташкил этилган ижодкор ёшларнинг қўл меҳнатлари, ижод намуналари, турли миллат вакилларининг урф-одатлари ва анъаналарини акс эттирувчи миллий кийимлари, тақинчоқларидан иборат кўргазма билан танишдилар.

Тадбирни туман ҳокими Собир Хўжаметов очиб, миллатлараро тотувликнинг жамият ҳаётидаги аҳамияти, Ўзбекистон кўп миллатли юрт эканлиги, барча миллат вакиллари ўзаро ҳурмат, меҳр-оқибатда, ҳамжиҳатликда яшаб келаётганини алоҳида таъкидлади. Шундан сўнг тадбир туман Маданият бўлими томонидан тайёрланган шўх-шодон куй-қўшиқлар ҳамда бетакрор рақслар билан давом этди.

Туман ҳокими ўз сўзида таъкидлаганидек, Ўзбекистонда бугунги кунда 130дан ортиқ миллат ва элат ҳамда 16та диний конфессия вакиллари тинч-тотув, аҳил-иноқ, ҳамжиҳат бўлиб яшамоқда. 157та миллий маданий марказ ва 38та дўстлик жамияти фаолият кўрсатмоқда.

Шунингдек, мамлакатимиздаги таълим муассасаларида ўқув-тарбия жараёнлари ўзбек, қорақалпоқ, рус, тожик, қозоқ, қирғиз ва туркман тилларида олиб борилмоқда, қардош тилли мактабларда ўқиётган фарзандларимиз давлат ҳисобидан дарслик ва бадиий адабиётлар билан таъминланмоқда. “Ўзбекистон – умумий уйимиз” деган эзгу ғоя барча миллат ва элатларни ўзаро бирлаштириб, тобора ҳаётий шиорга айланиб бормоқда. Бу жамиятимизда ҳукм сураётган миллатлараро тотувлик ва бағрикенглик муҳити, тинчлик ва осойишталикнинг амалий ифодасидир.

Гала концерт дастури республикамизнинг ёрқин юлдузлари, истеъдодли санъаткорлар ижросидаги она юртни мадҳ этувчи куй-қўшиқлар билан юқори байрамона кайфиятда ўтди. Концерт дастури меҳмони истеъдодли хонанда Бобурбек Арапбоев ажойиб чиқишлари ва шўх қўшиқлари билан кўнгилларни хушнуд этди. Шунингдек, туман Маданият бўлимининг раққоса қизлари ижросидаги турли миллатларнинг миллий рақслари, элимиз суйган умидли хонандалар Нурбекжон Ражабов, Ғайратжон Янгибоев, Давлатёр Шомуратов, Ойбекжон Нурмоновлар каби ижодкорлар ўзларининг дўстлик, муҳаббат, Ватанни мадҳ этувчи куй-қўшиқлари билан байрам дастурининг файзли ўтишига муносиб ҳисса қўшдилар.

Ушбу сана муносабати билан халқлар дўстлиги, миллатлараро тотувликни янада мустаҳкамлаш мақсадида юртимиз бўйлаб бир ҳафта давомида ўтказиладиган Дўстлик фестиваллари халқимизни янада бирлаштиришга, минтақамиздаги тинчлик ва осойишталик, миллатлараро ҳамжиҳатлик ва диний бағрикенглик муҳитини янада мустаҳкамлашга хизмат қилиши, шубҳасиз.

Чарос Арслонова, туман ҳокимлигининг Ахборот хизмати раҳбари.