Бўш иш ўринлари меҳнат ярмаркасида 39 нафар ишсиз фуқароларнинг бандлиги таъминланди

Мамлакатимизда аҳоли, айниқса, ёшларнинг муносиб иш ўринларига эга бўлишида ҳар томонлама кўмаклашиш ҳамда уларнинг бандлигини таъминлаш мақсадида тизимли ишлар амалга оширилмоқда. Жорий йилнинг 27 июль куни Ўзбекистон Маҳаллалар уюшмаси Амударё тумани бўлими маъмурий биносида ташкил этилган бўш иш ўринлари меҳнат ярмаркаси ҳам шулар жумласидандир.

Тадбирда Амударё тумани прокурори катта ёрдамчиси Шарьяр Жолдасов, Мажбурий ижро бюроси туман бўлими бошлиғи Қуаниш Есенбаев, туман Камбағалликни қисқартириш ва бандликка кўмаклашиш бўлими бошлиғи Рашид Салаев, овул ва маҳаллалардаги ҳоким ёрдамчилари ҳамда ҳамкор ташкилотлар, тижорат банклари вакиллари иштирок этишди.

Шунингдек, меҳнат ярмаркасида тумандаги 69та корхона ва ташкилот вакиллари томонидан 407та мавжуд бўш иш ўринлари таклиф қилинди. Ярмаркада 83 нафар, жумладан, ишсиз фуқаролар, алимент тўловчилар, ногиронлиги бўлган шахслар, битирувчи ёшлар қатнашди.

Тадбирни туман Камбағалликни қисқартириш ва бандликка кўмаклашиш бўлими бошлиғи Рашид Салаев очди ва олиб борди.

Ярмаркада иштирокчиларга туман Камбағалликни қисқартириш ва бандликка кўмаклашиш бўлими ходимлари томонидан бўш иш ўринлари ва уларга аҳолини ишга жойлаштириш, ишсиз аҳолини касб-ҳунарга ўқитиш, аҳолини хорижий давлатларга ишга юборишга доир маълумотлар берилди. Шунингдек, масъуллар томонидан аҳолининг меҳнат ҳуқуқлари ва меҳнат муҳофазасини таъминлаш масалалари бўйича ҳуқуқий маслаҳат ва маълумотлар олишлари учун барча шароитлар яратилди. Жумладан, видеороликлар намойиш қилиниб, баннерлар орқали маълумотлар берилди ҳамда брошюралар ва буклетлар тарқатилди.

Тадбир давомида ҳоким ёрдамчиларининг тегишли тавсиялари билан Куюккўпир, Тошёп, Қиличбой овуллари ҳамда Аёқчи, Хизрэли, Ойбек маҳаллаларида истиқомат қилувчи 7 нафар ишсиз фуқарога ўзини ўзи банд қилиш орқали даромадга эга бўлишлари учун субсидия асосида фаолияти учун зарур иш қуроллари, шунингдек, аёллар учун гўзаллик салонида ишлатиладиган асбоб-ускуналар берилиб, уларнинг бандлиги таъминланди.

Бундан ташқари, Қипчоқ овул фуқаролар йиғини биносида жойлашган касб-ҳунарга ўқитиш марказида тикувчилик йўналиши бўйича 3 ойлик ўқув курсини битирган 10 нафар ишсиз хотин-қизларга сертификатлар топширилди ҳамда уларга субсидия асосида тикув машиналари олиш учун тавсиялар берилди.

Меҳнат ярмаркасида 39 нафар фуқаро доимий ишга жойлаштирилди. Уларнинг 10 нафари алимент тўловчи ишсиз фуқаролар, 1 нафари меҳнат мигранти, 1 нафари ногиронлиги бўлган шахс, 17 нафари хотин-қизлар, 10 нафари ёшлар, шу жумладан, 3 нафари олий таълим муассасаси битирувчиларидир. Шунингдек, 5 нафар фуқарога жамоат ишларига йўлланмалар берилиб, 10 нафар ишсиз фуқаролар касб-ҳунарга ўқитладиган бўлди.

Тадбир давомида иштирокчиларига 3та мониторлар орқали тумандаги салоҳиятли иш берувчи корхона ва ташкилотлар томонидан тақдим қилинган бўш (вакант) иш ўринлари, хорижий давлатларда йирик иш берувчи компаниялар томонидан таклиф қилинган иш ўринлар, Тошкент ва Нукус шаҳарларидаги “Ишга марҳамат” мономарказлари, Нукус қурилиш коллежи, туман Камбағалликни қисқартириш ва бандликка кўмаклашиш бўлимига қарашли касб-ҳунарга ўқитиш масканлари фаолиятлари тўғрисида видеороликлар намойиш этиб борилди.

Шунингдек, мутахассислар томонидан 27 нафар фуқарога бўш иш ўринлари ҳамда уларга аҳолини ишга жойлаштириш тартиби ҳақида, 18 нафар фуқарога ишсиз аҳолини касб-ҳунар ва тадбиркорликка ўқитиш тартиби бўйича, 23 нафар фуқарога аҳолини хорижий давлатларда ишга юбориш тўғрисида, 11 нафар фуқарога эса аҳолининг меҳнат ҳуқуқлари ва меҳнат муҳофазасини таъминлаш бўйича ҳуқуқий маслаҳатлар, зарур маълумот ва тавсиялар берилди. Чет давлатларда ишлаш истагини билдирган фуқароларга ZOOM платформаси орқали тўғридан-тўғри иш берувчилар билан суҳбатларда қатнашиш имкониятлари мавжудлиги тўғрисида ҳам ахборот берилди.

Рашид Салаев, Амударё тумани Камбағалликни қисқартириш ва бандликка кўмаклашиш бўлими бошлиғи