Boʻsh ish oʻrinlari mehnat yarmarkasida 39 nafar ishsiz fuqarolarning bandligi taʼminlandi

Mamlakatimizda aholi, ayniqsa, yoshlarning munosib ish oʻrinlariga ega boʻlishida har tomonlama koʻmaklashish hamda ularning bandligini taʼminlash maqsadida tizimli ishlar amalga oshirilmoqda. Joriy yilning 27-iyul kuni Oʻzbekiston Mahallalar uyushmasi Amudaryo tumani boʻlimi maʼmuriy binosida tashkil etilgan boʻsh ish oʻrinlari mehnat yarmarkasi ham shular jumlasidandir.

Tadbirda Amudaryo tumani prokurori katta yordamchisi Sharyar Joldasov, Majburiy ijro byurosi tuman boʻlimi boshligʻi Quanish Yesenbayev, tuman Kambagʻallikni qisqartirish va bandlikka koʻmaklashish boʻlimi boshligʻi Rashid Salayev, ovul va mahallalardagi hokim yordamchilari hamda hamkor tashkilotlar, tijorat banklari vakillari ishtirok etishdi.

Shuningdek, mehnat yarmarkasida tumandagi 69ta korxona va tashkilot vakillari tomonidan 407ta mavjud boʻsh ish oʻrinlari taklif qilindi. Yarmarkada 83 nafar, jumladan, ishsiz fuqarolar, aliment toʻlovchilar, nogironligi boʻlgan shaxslar, bitiruvchi yoshlar qatnashdi.

Tadbirni tuman Kambagʻallikni qisqartirish va bandlikka koʻmaklashish boʻlimi boshligʻi Rashid Salayev ochdi va olib bordi.

Yarmarkada ishtirokchilarga tuman Kambagʻallikni qisqartirish va bandlikka koʻmaklashish boʻlimi xodimlari tomonidan boʻsh ish oʻrinlari va ularga aholini ishga joylashtirish, ishsiz aholini kasb-hunarga oʻqitish, aholini xorijiy davlatlarga ishga yuborishga doir maʼlumotlar berildi. Shuningdek, masʼullar tomonidan aholining mehnat huquqlari va mehnat muhofazasini taʼminlash masalalari boʻyicha huquqiy maslahat va maʼlumotlar olishlari uchun barcha sharoitlar yaratildi. Jumladan, videoroliklar namoyish qilinib, bannerlar orqali maʼlumotlar berildi hamda broshyuralar va bukletlar tarqatildi.

Tadbir davomida hokim yordamchilarining tegishli tavsiyalari bilan Kuyukkoʻpir, Toshyop, Qilichboy ovullari hamda Ayoqchi, Xizreli, Oybek mahallalarida istiqomat qiluvchi 7 nafar ishsiz fuqaroga oʻzini oʻzi band qilish orqali daromadga ega boʻlishlari uchun subsidiya asosida faoliyati uchun zarur ish qurollari, shuningdek, ayollar uchun goʻzallik salonida ishlatiladigan asbob-uskunalar berilib, ularning bandligi taʼminlandi.

Bundan tashqari, Qipchoq ovul fuqarolar yigʻini binosida joylashgan kasb-hunarga oʻqitish markazida tikuvchilik yoʻnalishi boʻyicha 3 oylik oʻquv kursini bitirgan 10 nafar ishsiz xotin-qizlarga sertifikatlar topshirildi hamda ularga subsidiya asosida tikuv mashinalari olish uchun tavsiyalar berildi.

Mehnat yarmarkasida 39 nafar fuqaro doimiy ishga joylashtirildi. Ularning 10 nafari aliment toʻlovchi ishsiz fuqarolar, 1 nafari mehnat migranti, 1 nafari nogironligi boʻlgan shaxs, 17 nafari xotin-qizlar, 10 nafari yoshlar, shu jumladan, 3 nafari oliy taʼlim muassasasi bitiruvchilaridir. Shuningdek, 5 nafar fuqaroga jamoat ishlariga yoʻllanmalar berilib, 10 nafar ishsiz fuqarolar kasb-hunarga oʻqitladigan boʻldi.

Tadbir davomida ishtirokchilariga 3ta monitorlar orqali tumandagi salohiyatli ish beruvchi korxona va tashkilotlar tomonidan taqdim qilingan boʻsh (vakant) ish oʻrinlari, xorijiy davlatlarda yirik ish beruvchi kompaniyalar tomonidan taklif qilingan ish oʻrinlar, Toshkent va Nukus shaharlaridagi “Ishga marhamat” monomarkazlari, Nukus qurilish kolleji, tuman Kambagʻallikni qisqartirish va bandlikka koʻmaklashish boʻlimiga qarashli kasb-hunarga oʻqitish maskanlari faoliyatlari toʻgʻrisida videoroliklar namoyish etib borildi.

Shuningdek, mutaxassislar tomonidan 27 nafar fuqaroga boʻsh ish oʻrinlari hamda ularga aholini ishga joylashtirish tartibi haqida, 18 nafar fuqaroga ishsiz aholini kasb-hunar va tadbirkorlikka oʻqitish tartibi boʻyicha, 23 nafar fuqaroga aholini xorijiy davlatlarda ishga yuborish toʻgʻrisida, 11 nafar fuqaroga esa aholining mehnat huquqlari va mehnat muhofazasini taʼminlash boʻyicha huquqiy maslahatlar, zarur maʼlumot va tavsiyalar berildi. Chet davlatlarda ishlash istagini bildirgan fuqarolarga ZOOM platformasi orqali toʻgʻridan-toʻgʻri ish beruvchilar bilan suhbatlarda qatnashish imkoniyatlari mavjudligi toʻgʻrisida ham axborot berildi.

Rashid Salayev, Amudaryo tumani Kambagʻallikni qisqartirish va bandlikka koʻmaklashish boʻlimi boshligʻi