Бу ерда “лагер”дан қочмайдиган, зукко болажонлар бор...
“Қалдирғоч” ёзги дам олиш оромгоҳидаги таассуротлар
Дунёнинг энг гўзал табиатга эга жойи Швейцария бўлса, Амударёнинг энг гўзал, баҳаво жойи Дўрман овули бўлса ажаб эмас. Ижодий гуруҳимиз билан “Қалдирғоч” болалар ёзги дам олиш оромгоҳи томон йўлга тушар эканмиз, Дўрманнинг сулув кўчаларида кўнглимиздан ажиб туйғулар кечди: тоза ҳаво, ям яшил табиат, бахтли болакайларнинг шодон қийқириғи...
Яқинда “Тараққиёт кўзгуси” газетаси таҳририятининг “Билимли ва маънавиятли ёшлар билан Учинчи Ренессанс сари” номли грант лойиҳаси доирасида ушбу оромгоҳга ташриф буюрдик. Ташрифдан мақсад – болажонларни туманимиздаги ёзувчи ва шоирларнинг, журналистларнинг ижод маҳсулларидан баҳраманд қилиш ва уларнинг маданий ҳордиқ чиқаришига ҳисса қўшиш.
Дастлаб, оромгоҳнинг мусиқа тўгараги фаолияти билан танишдик. Руслан Исмаилов раҳбарлик қилаётган ушбу тўгаракда болажонлар “Онажон – Ватан” қўшиғини биргаликда жўр бўлиб куйлашди. Сўнг, таҳририят ходимлари, ижодкорлар Шаҳзод Анвар ва Азиза Мадраҳимова болакайларнинг қизиқишлари билан ўртоқлашди. Болажонлар ёд олган шеърларидан, ўқиган эртакларидан парчалар ўқиб беришди.
Шундан сўнг, давра суҳбати бошланди. Давра суҳбатини туманимиздаги 84-сонли мактаб директори, “Қалдирғоч” болалар ёзги дам олиш оромгоҳи раҳбари Эркинбой Қурбонбоев очиб берди ва олиб борди.
Ижодий ва кўтаринки кайфиятда бошланган давра суҳбати туманимизнинг истеъдодли ижодкори, шоир Шомурод Хўжанов шеърлари билан давом этди. Кейин эса, навбат Шаҳзод Анвар шеърларига берилди. Ижодкор болажонларнинг орзу интилишлари, китобларга бўлган меҳри, китоб ўқишнинг аҳамияти тўғрисида айтиб ўтди. Ва даврадаги болажонларнинг ёд олган шеърларини мароқ билан тингладик. Умиджон Шукуруллаев, Бобуржон Ражапов, Севинчой Ҳамроева, Нодирбек Ибрагимов, Севинчой Ражаббаева, Беҳрузбек Фарҳодов ҳамда Сарвар Янгибоев каби оромгоҳ дам олувчилари ўзларининг беғубор орзуларини баён этиб, Ватанни мадҳ этувчи шеърларидан ўқишди.
Ижодкор Азиза Мадраҳимова эса болажонларга “Ўзбекистон болалари мадҳияси” номли шеъридан парча ўқиб бериб, кичкинтойларни келажакда комил инсон бўлиш учун илм олишга, китобларга дўст тутинишга даъват этди.
Дарвоқе, бугунги кунда ушбу оромгоҳда туманимизнинг турли ҳудудларидан ташриф буюрган 500 нафар болажонлар мириқиб дам олишмоқда. Тонгни эрталабки бадантарбия билан бошлайдиган шўх болакайлар кун давомида компьютер, спорт, мусиқа тўгаракларига қатнашишади. Кечқурун эса болажонларга шеърият кечалари уюштирилиб турилади.
Дунёнинг қайсидир бурчагидаги бир жажжи қалб ўқ овозидан чўчиб уйғонади, яна бири қорни тўйиб овқат емайди... Бизнинг она Ўзбекистонимизда эса жажжиларимиз ёзда мана шундай дам олиш оромгоҳларида, истироҳат боғларида, ота-оналари бағрида бахтли болалик гаштини суриб улғаймоқда. Бунинг учун эса, фақат шукур қилиш керак. Қўлдан келганича яхшилик қилмоқ, эзгулик улашмоқ жоиз.
Азиза Мадраҳимова
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
