Тор ёп маҳалласида ҳоким ёрдамчиси кўмаги билан янги иш ўринлари яратилмоқда

Мамлакатимизнинг ҳар бир гўшасида, энг чекка ҳудудлар ва овулларда ҳам иқтисодиётни жадал ривожлантириш, аҳоли бандлигини таъминлаш ҳамда турмуш фаровонлигини юксалтириш бугунги ислоҳотларнинг устувор йўналишларидан бирига айланган. Ушбу эзгу мақсадларни бевосита маҳаллабай тизимида ҳаётга татбиқ этишда ҳоким ёрдамчилари институтининг ўрни беқиёсдир. Айнан улар халқ ичига кириб бориб, одамларнинг дарду ташвишларини тингламоқда, бандлик ва тадбиркорлик масалаларида яқин кўмакчи бўлиб, юртдошларимизнинг ҳаётдан рози бўлиб яшашлари учун мустаҳкам замин яратмоқда.

Амударё туманидаги Тор ёп маҳалласида ҳоким ёрдамчиси сифатида фаолият юритаётган Қаҳрамон Муродовнинг фаолияти юқоридаги фикримизнинг яққол тасдиғидир. Унинг ташаббуси билан қисқа вақт оралиғида маҳаллада улкан ўзгаришлар бўй кўрсатди, қатор оилаларнинг доимий даромад манбаи шаклланди.

Жорий йил бошидан бери 14 нафар фуқаро ҳоким ёрдамчисига оилавий тадбиркорлик фаолиятини йўлга қўйиш истагини билдириб мурожаат қилган эди. Қувонарлиси шундаки, уларнинг барчасига имтиёзли кредитлар ажратилиши таъминланди. Натижада, ҳудудда чорвачилик, паррандачилик, тикувчилик, шунингдек, хизмат кўрсатиш ва ишлаб чиқариш йўналишларида янги фаолият турлари бошланди. Бундан ташқари, бандлик масаласига алоҳида эътибор қаратилиб, маҳалладаги ишсиз фуқароларнинг 11 нафари мавсумий ва доимий иш ўринларига жойлаштирилди.

Томорқадан унумли фойдаланиш оила даромадларини ошириш, қолаверса, бозорларимиздаги тўкин-сочинлик ва озиқ-овқат хавфсизлигини таъминлашнинг энг самарали йўлидир. Бугунги кунда Тор ёп маҳалласида яшовчи Юнус Исмоилов, шунингдек, Садулла Қодиров ва унинг рафиқаси Меҳрибон Қодировалар каби миришкор юртдошларимиз ўз томорқаларидан унумли фойдаланиб, элга ибрат бўлиб келмоқдалар. Ҳоким ёрдамчиси бу жараёнда уларга замонавий агротехник тадбирлар бўйича зарур маслаҳат ва тавсияларини бериб, доимий равишда амалий кўмак кўрсатиб келмоқда.

Ҳудудда хотин-қизлар бандлигини таъминлаш борасида ҳам салмоқли ишлар қилинмоқда. Мисол учун, Муҳаббат Танешовага ҳоким ёрдамчисининг тавсияси ва кўмаги асосида 20 миллион сўм миқдорида имтиёзли кредит ажратилди. Ушбу маблағ ҳисобидан ўз тикувчилик цехини очган тадбиркор аёл нафақат ўз оиласини тебратмоқда, балки шогирди Кумушой Ражаповани ҳам иш билан таъминлаб, унинг доимий даромад манбаига эга бўлишига ҳам сабабчи бўлди.

Ҳоким ёрдамчиси яна бир маҳалладоши Дилором Эримбетовага ҳам бевосита амалий ёрдам кўрсатиб, ҳудудда нон ва нон маҳсулотлари тайёрлаш фаолиятини йўлга қўйишига кўмаклашди. Бу орқали Дилором Эримбетова ўзи ҳамда яқин қариндошларининг бандлигини таъминлашга эришди ва аҳоли дастурхонига кундалик истеъмол маҳсулотларини етказиб бермоқда.

Маҳалла ёшларининг ташаббусларини қўллаб-қувватлаш ҳам ҳоким ёрдамчисининг эътиборидан четда қолмаган. Жумладан, Сардор Бутанов 312-сонли қарор асосида 100 миллион сўм миқдорида кредит олиб, замонавий автомобилларни ювиш шохобчасини барпо этди. Саломат Жумабоев эса автомобилларга эҳтиёт қисмлар сотиш дўконини очиб, ўз бизнесини бошлади. Умуман олганда, 2026 йилнинг биринчи чорагида маҳаллада учта янги тадбиркорлик субъекти – озиқ-овқат савдо шохобчаси, хизмат кўрсатиш ва умумий овқатланиш масканлари ташкил қилинди.

Алоҳида таъкидлаш жоизки, чекка овул ва маҳаллаларда бу каби сервис ва савдо шохобчаларининг очилиши ҳам иқтисодий, ҳам ижтимоий жиҳатдан улкан аҳамиятга эга. Бу аҳолининг узоғини яқин қилади, шаҳар марказига боришга кетадиган вақт ва маблағни тежайди ҳамда маҳалла инфратузилмасини янги босқичга олиб чиқади.

Маълумки, аҳоли бандлигини таъминлаш камбағалликни қисқартиришнинг энг асосий омили ҳисобланади. Жорий 2026 йилда Тор ёп маҳалласида ижтимоий реестрга киритилган 78 та оиланинг турмуш шароити чуқур ўрганилиб, уларни камбағалликдан чиқариш бўйича махсус «Индивидуал дастур» ишлаб чиқилди. Ушбу дастур доирасида ишсиз фуқароларни ишга жойлаштириш, касб-ҳунарга ўқитиш, кредит ва субсидиялар бериш, деҳқончилик учун ер майдонлари ажратиш, уй шароитларини яхшилаш каби комплекс чора-тадбирлар кўрилмоқда.

Ҳоким ёрдамчисининг бевосита иштирокида ишсизларнинг 4 нафарини доимий ишга, 3 нафарини жамоат ишларига жалб этиш, шунингдек, норасмий секторда ишлаётганларни расмий рўйхатдан ўтказиш тизимли режа қилиб олинган эди. Ҳозирнинг ўзидаёқ ушбу мақсадли ишлар ўз мевасини бериб, камбағал оилалардан 3 киши доимий иш билан таъминланди, 7 киши эса ўзини ўзи банд қилиб, 4 нафар фуқарога имтиёзли кредитлар ажратилди. Натижада ушбу оилаларнинг даромади ошиб, улар камбағаллик реестридан чиқарилмоқда. Ёшлар бандлиги йўналишида эса касб-ҳунар ва тадбиркорликка қизиқувчи жами 9 нафар фуқаронинг 2 нафари тадбиркорлик сир-асрорларини, 5 нафари эса муайян касб-ҳунарни ўрганиш мақсадида махсус ўқув курсларига йўналтирилди.

Амударё туманининг Тор ёп маҳалласида ҳоким ёрдамчиси томонидан олиб борилаётган бундай самарали ишлар аҳолининг ҳаёт даражасини юксалтиришга, ҳудудда тадбиркорлик муҳитини яхшилашга ҳамда ҳар бир инсоннинг жамиятда ўз ўрнини топишига хизмат қилмоқда.