Tor yop mahallasida hokim yordamchisi koʻmagi bilan yangi ish oʻrinlari yaratilmoqda

Mamlakatimizning har bir goʻshasida, eng chekka hududlar va ovullarda ham iqtisodiyotni jadal rivojlantirish, aholi bandligini taʼminlash hamda turmush farovonligini yuksaltirish bugungi islohotlarning ustuvor yoʻnalishlaridan biriga aylangan. Ushbu ezgu maqsadlarni bevosita mahallabay tizimida hayotga tatbiq etishda hokim yordamchilari institutining oʻrni beqiyosdir. Aynan ular xalq ichiga kirib borib, odamlarning dardu tashvishlarini tinglamoqda, bandlik va tadbirkorlik masalalarida yaqin koʻmakchi boʻlib, yurtdoshlarimizning hayotdan rozi boʻlib yashashlari uchun mustahkam zamin yaratmoqda.

Amudaryo tumanidagi Tor yop mahallasida hokim yordamchisi sifatida faoliyat yuritayotgan Qahramon Murodovning faoliyati yuqoridagi fikrimizning yaqqol tasdigʻidir. Uning tashabbusi bilan qisqa vaqt oraligʻida mahallada ulkan oʻzgarishlar boʻy koʻrsatdi, qator oilalarning doimiy daromad manbai shakllandi.

Joriy yil boshidan beri 14 nafar fuqaro hokim yordamchisiga oilaviy tadbirkorlik faoliyatini yoʻlga qoʻyish istagini bildirib murojaat qilgan edi. Quvonarlisi shundaki, ularning barchasiga imtiyozli kreditlar ajratilishi taʼminlandi. Natijada, hududda chorvachilik, parrandachilik, tikuvchilik, shuningdek, xizmat koʻrsatish va ishlab chiqarish yoʻnalishlarida yangi faoliyat turlari boshlandi. Bundan tashqari, bandlik masalasiga alohida eʼtibor qaratilib, mahalladagi ishsiz fuqarolarning 11 nafari mavsumiy va doimiy ish oʻrinlariga joylashtirildi.

Tomorqadan unumli foydalanish oila daromadlarini oshirish, qolaversa, bozorlarimizdagi toʻkin-sochinlik va oziq-ovqat xavfsizligini taʼminlashning eng samarali yoʻlidir. Bugungi kunda Tor yop mahallasida yashovchi Yunus Ismoilov, shuningdek, Sadulla Qodirov va uning rafiqasi Mehribon Qodirovalar kabi mirishkor yurtdoshlarimiz oʻz tomorqalaridan unumli foydalanib, elga ibrat boʻlib kelmoqdalar. Hokim yordamchisi bu jarayonda ularga zamonaviy agrotexnik tadbirlar boʻyicha zarur maslahat va tavsiyalarini berib, doimiy ravishda amaliy koʻmak koʻrsatib kelmoqda.

Hududda xotin-qizlar bandligini taʼminlash borasida ham salmoqli ishlar qilinmoqda. Misol uchun, Muhabbat Taneshovaga hokim yordamchisining tavsiyasi va koʻmagi asosida 20 million soʻm miqdorida imtiyozli kredit ajratildi. Ushbu mablagʻ hisobidan oʻz tikuvchilik tsexini ochgan tadbirkor ayol nafaqat oʻz oilasini tebratmoqda, balki shogirdi Kumushoy Rajapovani ham ish bilan taʼminlab, uning doimiy daromad manbaiga ega boʻlishiga ham sababchi boʻldi.

Hokim yordamchisi yana bir mahalladoshi Dilorom Erimbetovaga ham bevosita amaliy yordam koʻrsatib, hududda non va non mahsulotlari tayyorlash faoliyatini yoʻlga qoʻyishiga koʻmaklashdi. Bu orqali Dilorom Erimbetova oʻzi hamda yaqin qarindoshlarining bandligini taʼminlashga erishdi va aholi dasturxoniga kundalik isteʼmol mahsulotlarini yetkazib bermoqda.

Mahalla yoshlarining tashabbuslarini qoʻllab-quvvatlash ham hokim yordamchisining eʼtiboridan chetda qolmagan. Jumladan, Sardor Butanov 312-sonli qaror asosida 100 million soʻm miqdorida kredit olib, zamonaviy avtomobillarni yuvish shoxobchasini barpo etdi. Salomat Jumaboyev esa avtomobillarga ehtiyot qismlar sotish doʻkonini ochib, oʻz biznesini boshladi. Umuman olganda, 2026-yilning birinchi choragida mahallada uchta yangi tadbirkorlik subʼekti – oziq-ovqat savdo shoxobchasi, xizmat koʻrsatish va umumiy ovqatlanish maskanlari tashkil qilindi.

Alohida taʼkidlash joizki, chekka ovul va mahallalarda bu kabi servis va savdo shoxobchalarining ochilishi ham iqtisodiy, ham ijtimoiy jihatdan ulkan ahamiyatga ega. Bu aholining uzogʻini yaqin qiladi, shahar markaziga borishga ketadigan vaqt va mablagʻni tejaydi hamda mahalla infratuzilmasini yangi bosqichga olib chiqadi.

Maʼlumki, aholi bandligini taʼminlash kambagʻallikni qisqartirishning eng asosiy omili hisoblanadi. Joriy 2026-yilda Tor yop mahallasida ijtimoiy reyestrga kiritilgan 78 ta oilaning turmush sharoiti chuqur oʻrganilib, ularni kambagʻallikdan chiqarish boʻyicha maxsus «Individual dastur» ishlab chiqildi. Ushbu dastur doirasida ishsiz fuqarolarni ishga joylashtirish, kasb-hunarga oʻqitish, kredit va subsidiyalar berish, dehqonchilik uchun yer maydonlari ajratish, uy sharoitlarini yaxshilash kabi kompleks chora-tadbirlar koʻrilmoqda.

Hokim yordamchisining bevosita ishtirokida ishsizlarning 4 nafarini doimiy ishga, 3 nafarini jamoat ishlariga jalb etish, shuningdek, norasmiy sektorda ishlayotganlarni rasmiy roʻyxatdan oʻtkazish tizimli reja qilib olingan edi. Hozirning oʻzidayoq ushbu maqsadli ishlar oʻz mevasini berib, kambagʻal oilalardan 3 kishi doimiy ish bilan taʼminlandi, 7 kishi esa oʻzini oʻzi band qilib, 4 nafar fuqaroga imtiyozli kreditlar ajratildi. Natijada ushbu oilalarning daromadi oshib, ular kambagʻallik reyestridan chiqarilmoqda. Yoshlar bandligi yoʻnalishida esa kasb-hunar va tadbirkorlikka qiziquvchi jami 9 nafar fuqaroning 2 nafari tadbirkorlik sir-asrorlarini, 5 nafari esa muayyan kasb-hunarni oʻrganish maqsadida maxsus oʻquv kurslariga yoʻnaltirildi.

Amudaryo tumanining Tor yop mahallasida hokim yordamchisi tomonidan olib borilayotgan bunday samarali ishlar aholining hayot darajasini yuksaltirishga, hududda tadbirkorlik muhitini yaxshilashga hamda har bir insonning jamiyatda oʻz oʻrnini topishiga xizmat qilmoqda.