“Манғит савдо комплекси” МЧЖда тактик-амалий ўқув машғулотлари ўтказилди

Маълумки, шу кунларда республикамизнинг барча ҳудудларида, жумладан, Амударё туманида ҳам 1 июлдан 1 августга қадар “Ёнғин хавфсизлигини таъминлаш бўйича долзарб 30 кунлик” доирасида турли тадбирлар ташкил этилмоқда. Туман Фавқулодда вазиятлар бўлими ва тегишли ташкилотлар билан ҳамкорликда жойларда ўтказилаётган тактик-амалий ўқув машғулотлари натижасида ходимлар ва фуқароларнинг фавқулодда вазиятлар содир бўлганда тўғри ҳаракатланишга доир билим-тажрибалари янада мустаҳкамланаяпти.

Ойлик доирасида “Манғит савдо комплекси” МЧЖга қарашли савдо дўконларида ёнғин хавфсизлигини таъминлаш, фуқароларнинг ҳаёти ва мол-мулкинининг дахлсизлигини сақлаш мақсадида тактик-амалий ўқув машғулотлари ўтказилди. Бунда тумандаги Фавқулодда вазиятлар бўлими, Электр таъминоти корхонаси, тез тиббий ёрдам бўлими ходимлари ва бошқалар иштирок этишди.

Дастлаб масъуллар томонидан тадбир иштирокчиларига “Ёнғин хавфсизлигини таъминлаш бўйича “Долзарб 30 кунлик” доирасида ўтказилаётган тактик-амалий ўқув машғулотларининг аҳамияти тўгрисида маълумотлар берилди. Шунингдек, ёз мавсумида минтақамиздаги юқори ҳаво ҳарорати сабабли объектлардаги кутилмаган ёнғин ҳолатларига шай туриш лозимлиги таъкидланди ва бундай вазиятларнинг олдини олиш ҳамда фавқулотда ҳолатларни кам талафот билан ўтказишга доир зарур тавсиялар берилди.

Шундан сўнг фавқулодда ҳолат ҳақида барча тезкор хизматларга хабар бериш ва огоҳлантириш сигнали чалинди. Кейинги босқичда эса “Манғит савдо комплекси” МЧЖ ҳудудидаги савдо дўконларидан бирида туман Фавқулодда вазиятлар бўлими ходимлари тегишли ташкилотлар билан ҳамкорликда шартли равишда содир бўлган ёнғинни зудлик билан бартараф этиш, ёнғин ўчоғидан жабрланганларни ташқарига хавфсиз олиб чиқиш ва биринчи тиббий ёрдам кўрсатиш, ҳудуддан фуқароларни эвакуация қилиш каби тактик-амалий ўқув машғулотларни бажаришди.

Шунингдек, дўконларда меҳнат муҳофазаси, хавфсизлик техникаси, ёнғин хавфсизлиги талабларига риоя этилиши, объектларнинг бирламчи ёнғин ўчириш воситалари билан таъминланиши, автоматик ёнғин ўчириш ва ёнғиндан автоматик дарак бериш тизими ва шу каби бошқа мосламалар созлиги текширувдан ўтказилди.

Бундан ташқари, мазкур тадбир доирасида табиий ва техноген тусдаги юзага келиши мумкин бўлган фавқулодда вазиятларни бартараф этиш, инсон ҳаётига хавф туғдириши мумкин бўлган ҳолатларни ва бошқа шошилинч ишларни аниқлаш мақсадида профилактик тадбирлар ўтказилди.

Маълумот ўрнида, бугунги кунда жойларда тактик-амалий ўқув машғулотларини ташкил этиш билан бир қаторда туман Фавқулодда вазиятлар бўлими ходимлари томонидан туман ҳудудида жойлашган объектларда қонунда белгиланган тартибда текширувлар ўтказиш, жамоат жойларида ёнғин хавфсизлигига доир тарғибот баннерларини ўрнатиш ва шу каби бир қатор чора-тадбирлар иш режасига мувофиқ амалга оширилмоқда.

Дарҳақиқат, ёнғин ҳолатлари қисқа фурсатларда содир бўлиб, фуқаролар ҳаёти ва мол-мулкига жиддий зиён етказади. Айниқса, ёзнинг иссиқ кунларида объектларни ва маҳсулотларни салқин қилиш мақсадида электр энергияси билан ишловчи қурилмалардан мунтазам фойдаланамиз. Агар объектларни электр энергияси билан таъминлаш мақсадида тортилган симлар ва қурилмалар талабга жавоб бермаса, юқори кучланиш сабаб ёнғин содир бўлиши мумкин. Шундай экан, ёнғин хавфсизлигини таъминлашга қаратилган “Долзарб 30 кунлик” тадбирлари фавқулодда вазиятларнинг олдини олишда муҳим аҳамиятга эга. Бу жараёнларда ҳар биримиз фаол иштирок этишимиз лозим.

Шоҳзод Қурбонбоев