Яқин йиллар ичида туманда истеъмолчиларни ичимлик суви билан таъминлаш даражаси кескин яхшиланади

Ўзбекистон Республикаси Президентининг 2019 йил 9 апрель кунги “Осиё тараққиёт банки иштирокида “Ўзбекистоннинг ғарбий қисмида ичимлик суви таъминоти тизимларини ривожлантириш” лойиҳасини амалга ошириш чора-тадбирлари тўғрисида”ги Қарорида мазкур банк кредит маблағлари ҳисобидан Қорақалпоғистон Республикасининг Амударё, Беруний, Қораўзак, Қўнғирот, Нукус ва Мўйноқ туманларидаги аҳоли ва хўжалик юритувчи субъектларнинг сифатли ичимлик суви таъминотини янада яхшилаш кўзда тутилган.

Қарорга асосан Амударё туманидаги қуввати суткасига 40 минг кубометр бўлган “Манғит” сув тозалаш иншоотини янгидан қуриш режалаштирилган. Жорий йил 5 июнда “Оби ҳаёт инжиниринг” МЧЖ ва “Uy-jay Qurilis” МЧЖ билан 12,98 млн долларлик шартнома имзоланди. Бугунги кунда ушбу шартномага асосан лойиҳа-смета ҳужжатларини ишлаб чиқиш ва қурилиш-таъмирлаш ишларини олиб бориш ташкилот томонидан амалга оширилмоқда.

Бундан ташқари, 25,6 млн доллар маблағ ҳисобидан “Амударё туманининг ичимлик сув таъминотини яхшилаш” лойиҳаси доирасида 68,5 км узунликдаги аҳолига ичимлик суви етказиб берувчи магистраль сув тармоқлари ва 289,2 км ички ичимлик суви тармоқлари, шунингдек 3та ичимлик суви иншоотларини қуриш ва реконструкция қилиш белгиланган. Жумладан, “Манғит” сув тозалаш иншоотидан “РУ-1” сув иншоотига 22,6 км, “РУ-1” сув иншоотидан “Куюк кўпир” сув тақсимлаш иншоотигача 11,4 км, “Куюк кўпир” сув иншоотидан “Яримчи” сув тақсимлаш иншоотигача 6,4 км, Қизил чоли аҳоли пунктидаги сув иншоотигача 5,4 км, “РУ-1” иншоотидан “Қиличбой” сув тақсимлаш иншоотигача 17,3 км, “Куюк кўпир” сув иншоотидан “Жумур овул” аҳоли пунктигача 5,36 км масофадаги аҳолига ичимлик суви етказиб берувчи сув тармоқларини қуриш ишлари ҳам режалаштирилган.

Шунингдек, Манғит шаҳрига 107 км ва Юқори Тубулға, Қорамон, Озодлик, Бирлашган, Ўрта қалъа, Арнабўйи, Бужук кўл, Хўжа овул, Янги қишлоқ, Нукус овул, Сейт овул, Хитой, Мулкдор, Эшон овул, Вахум, Панашам, Юсуф хўжа, Қиличбой қишлоқ аҳоли пунктларига 182,2 км масофадаги ичимлик суви тармоқларини қуриш ишларини ҳам амалга ошириш белгиланган.

Бундан ташқари, “РУ-1” ва “Қиличбой” сув тақсимлаш иншоотларини реконструкция қилиш, “Куюк кўпир” сув тақсимлаш иншоотини янгидан қуриш ишлари ҳам амалга оширилиши кўзда тутилган.      

Аҳолига тоза, сифатли ичимлик суви етказиб бериш кварцли қум ёрдамида фильтрланиб, махсус қувурлар орқали бир нечта мураккаб жараёнлар орқали амалга оширилади. Аввало оддий, тозаланмаган сув Амударёдан канал орқали янгидан қурилиши режалаштирилаётган сув тиндиргич, яъни сув ҳавзаларига келиб тушади ва махсус механизмлар ёрдамида қувурлар орқали сувни қабул қилиш камерасига узатилади. Ушбу жараёндан сўнг, механик камерага ўтказилиб, зарур пигментлар қўшилади ва сув тиндиргич ҳавзасида тиндирилади. Тиндирилган сувга хлор билан ишлов берилиб, фильтрлаш станциясида          қувурлар орқали 3000 кубометрлик заҳира омборларига тушади. Заҳира омборларидан эса насослар орқали сўрилиб, аҳоли пунктларига, кўчаларга узатилади. Ана шундай мураккаб жараёнлар, машаққатли меҳнатлар эвазига аҳоли хонадонларига беминнат етказиб берилаётган оби ҳаёт манбаи — сувнинг ҳар бир қатрасидан авайлаб-асраб фойдаланиш ҳар биримизнинг зиммамиздаги масъулиятли вазифамиздир.

Айни пайтда “Манғит” сув тозалаш иншоотини янгидан қуриш жараёнлари амалга оширилаётган объектда 120 нафар малакали мутахассислар ва ишчилар меҳнат қилишмоқда. 3та автокран, 4та самосвал, 2та экскаватор, 2та “МТЗ” русумли транспорт тракторлари, 2та бульдозер, пайвандлаш агрегатлари ва бошқа техника ҳамда ускуналар тўла қувват билан ишлатилмоқда.

Ишчи-хизматчилар учун махсус транспорт воситаси — автобус ажратилгани, яратилган намунали меҳнат шароити иш унумининг ошишини таъминламоқда. Умумий қиймати салкам 12 млн долларлик маблағ ҳисобига бунёд этилаётган мазкур сув тозалаш иншоотини 2025 йилнинг ноябрь ойида қуриб, битказиш ва фойдаланишга топшириш режалаштирилган бўлиб, шу кунгача 1 млн. 900 минг доллар ҳажмидаги қурилиш ишлари амалга оширилди.          

Сув тозалаш иншооти тўла қувват билан ишга туширилгач, аҳоли эҳтиёжлари учун суткасига 40 минг кубометр тозаланган ичимлик суви етказиб бериш имконияти яратилади.

Робия Йўлдошева.