Yaqin yillar ichida tumanda isteʼmolchilarni ichimlik suvi bilan taʼminlash darajasi keskin yaxshilanadi

Oʻzbekiston Respublikasi Prezidentining 2019-yil 9-aprel kungi “Osiyo taraqqiyot banki ishtirokida “Oʻzbekistonning gʻarbiy qismida ichimlik suvi taʼminoti tizimlarini rivojlantirish” loyihasini amalga oshirish chora-tadbirlari toʻgʻrisida”gi Qarorida mazkur bank kredit mablagʻlari hisobidan Qoraqalpogʻiston Respublikasining Amudaryo, Beruniy, Qoraoʻzak, Qoʻngʻirot, Nukus va Moʻynoq tumanlaridagi aholi va xoʻjalik yurituvchi subʼektlarning sifatli ichimlik suvi taʼminotini yanada yaxshilash koʻzda tutilgan.

Qarorga asosan Amudaryo tumanidagi quvvati sutkasiga 40 ming kubometr boʻlgan “Mangʻit” suv tozalash inshootini yangidan qurish rejalashtirilgan. Joriy yil 5-iyunda “Obi hayot injiniring” MChJ va “Uy-jay Qurilis” MChJ bilan 12,98 mln dollarlik shartnoma imzolandi. Bugungi kunda ushbu shartnomaga asosan loyiha-smeta hujjatlarini ishlab chiqish va qurilish-taʼmirlash ishlarini olib borish tashkilot tomonidan amalga oshirilmoqda.

Bundan tashqari, 25,6 mln dollar mablagʻ hisobidan “Amudaryo tumanining ichimlik suv taʼminotini yaxshilash” loyihasi doirasida 68,5 km uzunlikdagi aholiga ichimlik suvi yetkazib beruvchi magistral suv tarmoqlari va 289,2 km ichki ichimlik suvi tarmoqlari, shuningdek 3ta ichimlik suvi inshootlarini qurish va rekonstruktsiya qilish belgilangan. Jumladan, “Mangʻit” suv tozalash inshootidan “RU-1” suv inshootiga 22,6 km, “RU-1” suv inshootidan “Kuyuk koʻpir” suv taqsimlash inshootigacha 11,4 km, “Kuyuk koʻpir” suv inshootidan “Yarimchi” suv taqsimlash inshootigacha 6,4 km, Qizil choli aholi punktidagi suv inshootigacha 5,4 km, “RU-1” inshootidan “Qilichboy” suv taqsimlash inshootigacha 17,3 km, “Kuyuk koʻpir” suv inshootidan “Jumur ovul” aholi punktigacha 5,36 km masofadagi aholiga ichimlik suvi yetkazib beruvchi suv tarmoqlarini qurish ishlari ham rejalashtirilgan.

Shuningdek, Mangʻit shahriga 107 km va Yuqori Tubulgʻa, Qoramon, Ozodlik, Birlashgan, Oʻrta qalʼa, Arnaboʻyi, Bujuk koʻl, Xoʻja ovul, Yangi qishloq, Nukus ovul, Seyt ovul, Xitoy, Mulkdor, Eshon ovul, Vaxum, Panasham, Yusuf xoʻja, Qilichboy qishloq aholi punktlariga 182,2 km masofadagi ichimlik suvi tarmoqlarini qurish ishlarini ham amalga oshirish belgilangan.

Bundan tashqari, “RU-1” va “Qilichboy” suv taqsimlash inshootlarini rekonstruktsiya qilish, “Kuyuk koʻpir” suv taqsimlash inshootini yangidan qurish ishlari ham amalga oshirilishi koʻzda tutilgan.      

Aholiga toza, sifatli ichimlik suvi yetkazib berish kvartsli qum yordamida filtrlanib, maxsus quvurlar orqali bir nechta murakkab jarayonlar orqali amalga oshiriladi. Avvalo oddiy, tozalanmagan suv Amudaryodan kanal orqali yangidan qurilishi rejalashtirilayotgan suv tindirgich, yaʼni suv havzalariga kelib tushadi va maxsus mexanizmlar yordamida quvurlar orqali suvni qabul qilish kamerasiga uzatiladi. Ushbu jarayondan soʻng, mexanik kameraga oʻtkazilib, zarur pigmentlar qoʻshiladi va suv tindirgich havzasida tindiriladi. Tindirilgan suvga xlor bilan ishlov berilib, filtrlash stantsiyasida          quvurlar orqali 3000 kubometrlik zahira omborlariga tushadi. Zahira omborlaridan esa nasoslar orqali soʻrilib, aholi punktlariga, koʻchalarga uzatiladi. Ana shunday murakkab jarayonlar, mashaqqatli mehnatlar evaziga aholi xonadonlariga beminnat yetkazib berilayotgan obi hayot manbai — suvning har bir qatrasidan avaylab-asrab foydalanish har birimizning zimmamizdagi masʼuliyatli vazifamizdir.

Ayni paytda “Mangʻit” suv tozalash inshootini yangidan qurish jarayonlari amalga oshirilayotgan obʼektda 120 nafar malakali mutaxassislar va ishchilar mehnat qilishmoqda. 3ta avtokran, 4ta samosval, 2ta ekskavator, 2ta “MTZ” rusumli transport traktorlari, 2ta buldozer, payvandlash agregatlari va boshqa texnika hamda uskunalar toʻla quvvat bilan ishlatilmoqda.

Ishchi-xizmatchilar uchun maxsus transport vositasi — avtobus ajratilgani, yaratilgan namunali mehnat sharoiti ish unumining oshishini taʼminlamoqda. Umumiy qiymati salkam 12 mln dollarlik mablagʻ hisobiga bunyod etilayotgan mazkur suv tozalash inshootini 2025-yilning noyabr oyida qurib, bitkazish va foydalanishga topshirish rejalashtirilgan boʻlib, shu kungacha 1 mln. 900 ming dollar hajmidagi qurilish ishlari amalga oshirildi.          

Suv tozalash inshooti toʻla quvvat bilan ishga tushirilgach, aholi ehtiyojlari uchun sutkasiga 40 ming kubometr tozalangan ichimlik suvi yetkazib berish imkoniyati yaratiladi.

Robiya Yoʻldosheva.