Ер бериш орқали ёшларнинг бандлиги таъминланмоқда

Давлатимиз раҳбарининг жорий йил 5 апрелдаги “Ёшларга ер ажратиш орқали уларнинг даромадларини ошириш ва бандлигини таъминлаш, шунингдек, янги ер майдонларини ўзлаштириш чора-тадбирлари тўғрисида”ги қарори ижросини таъмишлаш борасида Амударё туманида кенг кўламли ишлар амалга оширилмоқда. Қарор асосида банд бўлмаган ёшларни иш билан таъминлаш, қишлоқ хўжалигидаги ер ва сув ресурсларидан самарали фойдаланиш, озиқ-овқат экинлари етиштиришни кўпайтириш орқали аҳоли фаровонлигини таъминлаш юзасидан самарали чора-тадбирлар олиб борилмоқда.

Амударёлик юзлаб ёшлар қатори Оқ олтин овулида яшовчи ёш оила аъзолари Руслан Қозоқов ҳамда турмуш ўртоғи Марҳабо Янгибоеваларга ҳам ер берилиб, бандлиги таъминланди. Овулдаги “Полвонов Раҳмон” фермер хўжалигининг энг унумдор, яхши ҳосил берадиган экин ер майдонидан ҳар бири 50 сотихдан, жами 1 га ер олган ёш оила экин майдонига қовун-тарвуз каби полиз экинларини экиб, айни кунларда далада қизғин меҳнат қилишмоқда.

Шу ўринда маълумот тариқасида айтиш жоизки, туман бўйича 14-30 ёш оралиғидаги 53 минг 940 нафар ёшлар хатловдан ўтказилиб, “Ёшлар баланси” шакллантирилган. Туманда 1 минг 668 нафар ишсиз ёшнинг рўйхати шакллантирилиб, “Бандлик” дастури ишлаб чиқилган. Ушбу дастур асосида 420 нафар ёшлар ўз мутахассислиги, қизиқиши ва қобилиятидан келиб чиқиб, доимий ишга жойлаштирилган бўлса, 60 нафар ёшлар касб-ҳунарга ўқитилган. 15 нафар ёшларга эса ҳунармандчилик, тикувчилик, дуродгорлик қилиши, ўз уйида бирор маҳсулот ишлаб чиқариши ёки хизмат кўрсатиши учун субсидия асосида асбоб-ускуна олиб берилган. Қишлоқ хўжалигидаги ер ва сув ресурсларидан самарали фойдаланиш орқали озиқ-овқат экинлари етиштиришни кўпайтириш, аҳоли, шу жумладан, ёшлар бандлигини таъминлаш ва даромадларини ошириш мақсадида 1 минг 104 нафар ёшларга умумий майдони 400 гектар бўлган ерлар ажратилган. Бундан ташқари, ўз тадбиркорлигини бошламоқчи бўлган 545 нафар ёшларга хизмат кўрсатиш, ишлаб чиқариш ва бошқа соҳалар учун кредитлар ажратилган. Шунингдек, 114 нафар ёшлар жамоат ишларига жалб қилинган.

Жумуровул маҳалласида яшовчи Шоҳзод Камолов ҳам ер бериш орқали бандлиги таъминланган ёшлардан бири. Шоҳзод Президент қарори орқали ёшларга ер берилаётгани ҳақида эшитиб, маҳалла ёшлар етакчиси Зафар Отабоевга мурожаат қилган. Шоҳзод берилган ердан унумли фойдаланган ҳолда қовун, тарвуз, помидор каби полиз экинлари ва сабзавотлар экиб, парвариш қилмоқда.

Ёшлар манфаатларини кўзлаб амалга оширилаётган бу каби самарали ислоҳотлар келажак эгаларининг ҳаётда ўз ўринларини топишларида муҳим аҳамият касб этиши шубҳасиз.

Чарос Арслонова, туман ҳокимлигининг Ахборот хизмати раҳбари.