Аҳоли хонадонларида фавқулодда ҳолатларнинг олдини олиш мақсадида тушунтириш-тарғибот ишлари амалга оширилмоқда
Мамлакатимизда аҳоли фаровонлигини ошириш, муносиб шароитларда яшашларини таъминлашга қаратилган саъй-ҳаракатлар туфайли қишлоқ ва маҳаллалардаги аҳоли хонадонлари тобора обод ва кўркам қиёфа касб этмоқда. Айниқса, мутасадди ташкилотлар масъулларининг ўзаро ҳамкорлиги боис, энг чекка ҳудудлардаги хонадонларда ўтказилаётган назорат тадбирлари ўзининг ижобий самарасини бермоқда.
Чунки ана шундай назорат тадбирлари доирасида аҳоли хонадонларининг куз-қиш мавсумига тайёргарлиги, иситиш тизимларининг қай даражада созлиги, шу билан бирга фавқулодда вазиятлар юз берган тақдирда ҳимоя воситалари билан таъминланганлик ҳолатлари ўрганилиб, аҳоли ўртасида кенг тушунтириш ишлари амалга оширилмоқда. Зарур пайтларда эса амалий ёрдамлар ҳам кўрсатилмоқда.
Ана шундай тарғибот-ташвиқот мақсадидаги назорат тадбирларидан бири жорий йилнинг Манғит шаҳрининг Чордара маҳалласида ҳам ўтказилди. Унда Қорақалпоғистон Республикаси Фавқулодда вазиятлар бошқармаси бошлиғининг ўринбосари, полковник Маҳмуд Сейдуллаев, Амударё тумани ҳокимининг ўринбосари Баҳодир Эрназаров, Фавқулодда вазиятлар бўйича Амударё туман бўлими бошлиғи капитан Зафар Аҳмедовлар ҳамда фавқулодда вазиятлар бўйича туманда фаолият олиб борувчи ишчи гуруҳ аъзолари иштирок этишди.
Тадбирда масъуллар Қорақалпоғистон Республикаси Вазирлар Кенгашининг 2024 йил 21 май кунги фармойиши ижросини таъминлаш мақсадида тумандаги овул ва маҳаллалар ҳудудларидаги барча турар жойларда мавжуд бўлган иситиш қозонлари, агар уй ичкарисида жойлаштирилган бўлса, уларни ташқарига ўрнатиш бўйича режага мувофиқ олиб борилаётган ишлар билан яқиндан танишдилар.
Тадбир давомида масъуллар Чордара маҳалласининг Озодлик кўчасида истиқомат қилувчи хонадон эгалари билан учрашиб, куз-қиш мавсумига тайёргарлик кўриш, иситиш қозонхоналарининг созлиги, қозонхоналардаги ҳаво алмашиш ускуналарининг техник ҳолати, шунингдек, мўриларнинг қай даражада талабга мослиги, фавқулодда вазиятлар содир бўлганда амал қилиш лозим бўлган бирламчи вазифалар юзасидан фуқароларга зарур тавсиялар, тушунчалар бердилар.
Айни пайтда Амударё тумани ҳудудида 2024-2025 йиллар куз-қиш мавсуми даврида турли кўринишдаги фавқулодда вазиятларнинг олдини олиш мақсадида якка тартибдаги ҳамда кўп қаватли уйларда икки контурли иситиш қозонларини ўрнатиш ва уларнинг самарадорлиги, хавфсизликни таъминлаш борасидаги алоҳида афзалликлари юзасидан аҳоли ва тадбиркорлик субъектлари ўртасида кенг тушунтириш ишлари ҳам олиб борилмоқда.
Амалга оширилаётган бу каби тадбирлар туфайли туманнинг барча ҳудудларида истиқомат қилувчи аҳоли ўз хонадонларидаги иситиш тизимлари ва қозонхоналарини куз-қиш мавсумига тайёрлаб, уй ичкарисига ўрнатилган қозонхоналарни хонадон ташқарисига, хавфсиз жойга ўрнатиш ишларини амалга оширмоқда. Кўрилаётган барча чора-тадбирлар аҳолини фавқулодда вазиятларда ишончли ҳимоя қилишга қаратилгани билан муҳим аҳамият касб этмоқда. Бундай тадбирлар аҳолининг мавсумий шароитларга мослашиши ва уларнинг турмуш сифатини янада яхшилашга қаратилгани билан ҳам аҳамиятлидир. Муҳими, бу каби тадбирлар аҳоли ўртасида мавсумий муаммоларнинг ҳамда турли нохуш ҳолатларнинг олдини олиш, фавқулодда ҳолатлар содир бўлганда уларга тезкор ёрдам кўрсатиш имконини беради.
Робия Йўлдошева.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
