Истеъмолчилар суюлтирилган газ билан узлуксиз таъминланмоқда

Мамлакатимизда табиий газни қувурлар орқали етказиш қийин бўлган ҳудудларда яшовчи истеъмолчиларга суюлтирилган газ етказиб бериш бўйича самарали тизим яратилган. Бу борада аниқ қоидалар ва стандартлар мавжуд бўлиб, улар истеъмолчиларнинг хавфсизлигини таъминлаш ва газ таъминотининг узлуксизлигини кафолатлашга хизмат қилади. Суюлтирилган газни етказиб бериш газ таъминоти ташкилотлари ва истеъмолчилар ўртасида тузиладиган шартномалар асосида амалга оширилади. Бу шартномаларда газнинг етказиб берилиш муддатлари, миқдори ва сифати каби муҳим параметрлар аниқ белгилаб қўйилади.

Газ таъминоти ташкилотлари, шунингдек, хонадонлар сони ва табиий газга бўлган эҳтиёжни, газ баллонларининг мавжудлигини ҳисобга олган ҳолда келгуси йил учун суюлтирилган газнинг прогнозлаштириладиган ҳажмини аниқлаб, юқори ташкилотларга буюртма беради ва йил давомида таъминотнинг узлуксизлигига масъул ҳисобланади.

Амударё туманида ҳам истеъмолчиларни суюлтирилган газ билан таъминлаш борасида тизимли ишлар амалга оширилмоқда. Туман бўйича суюлтирилган газ истеъмолчилари сони 25 минг 33тани ташкил қилиб, шундан 24 минг 993таси аҳоли истеъмолчилари ва 40таси маиший соҳа истеъмолчилари ҳисобланади. Туман бўйича 38та овул ва маҳаллалардаги истеъмолчилар суюлтирилган газга мослаштирилган бўлиб, уларга 1 та сервис маркази ва 7 та шахобча орқали суюлтирилган газ узлуксиз равишда етказиб берилади.

Марказий газ баллонларни қабул қилиш ва тарқатиш шохобчаси орқали туманнинг Чойкўл, Тўлқин, Ўрта қалъа, Амир Темур номли ва Тош ёп овуллари, шунингдек, Босув, Арна бўйи, Боғ маҳаллалари ҳудудидаги истеъмолчиларга суюлтирилган газ етказиб берилади.

Холимбег овулидаги сервис маркази орқали Холимбег ва Қиличбой овуллари ҳамда Аёқчи маҳалласи ҳудудидаги, Куюк кўпир овулидаги шохобча орқали эса Куюк кўпир, Бобур номли овуллар ҳамда Ўзбекистон маҳалласи ҳудудидаги истеъмолчилар суюлтирилган газ билан таъминланади.

Бундан ташқари, туманнинг Қипчоқ овулида жойлашган шохобча орқали Қипчоқ овули, Дарё бўйи, Уйшин ва Бештом маҳаллалари ҳамда Қипчоқ шаҳарчаси ҳудудидаги аҳоли истеъмолчиларига суюлтирилган газ етказиб берилади.

Оқ олтин овули ва Жумуртов шаҳарчасидаги истеъмолчилар Оқ олтин шохобчаси орқали, Қангли овули ва Қум ёп маҳалласидаги истеъмолчилар эса Қангли шохобчаси орқали суюлтирилган газ билан таъминланади.

Айтиш керакки, маиший газ баллонларини аҳолига ва ижтимоий соҳа объектларига тақсимлаш ва етказиб бериш тасдиқланган жадвалга мувофиқ амалга оширилади. Бу жараёнда газ баллонларини газ таъминоти ташкилоти ва истеъмолчи ўртасида тузилган шартнома асосида, махсус автотранспорт воситалари ва резервуар сиғимлари ёрдамида етказиб бериш кўзда тутилган.

Ўзбекистон Республикаси Вазирлар Маҳкамасининг 2018 йил 10 августдаги 646-сонли қарорига асосан суюлтирилган углеводород газини етказиб бериш тизимини такомиллаштириш ва ягона ташкилий-техник талабларни белгилаш мақсадида “Аҳоли ва ижтимоий соҳа объектларига кундалик ҳаётда фойдаланиш учун суюлтирилган углеводород газини етказиб бериш тартиби тўғрисида”ги низом тасдиқланган. Бу низомда газ етказиб беришнинг самарали тизимини яратиш, ҳуқуқий асосларини аниқлаш ва ушбу соҳада ягона ташкилий-техник талабларни белгилаш каби масалалар қамраб олинган.

“Hududgazta’minot” акциядорлик жамиятининг “Ҳудудгаз Қорақалпоғистон” газ таъминоти филиалига қарашли Амударё тумани газ таъминоти корхонаси ходимлари ҳам аҳолини суюлтирилган газ билан таъминлашда ушбу техник қоидаларга қатъий амал қилмоқда.

Корхона ходимлари туманнинг энг чекка ҳудудларидаги истеъмолчиларга ҳам ўз вақтида ва  сифатли хизмат кўрсатиб келишмоқда. Дўрман шохобчаси орқали Дўрман овули, Бўз солма ва Қорамон маҳаллалари, Бўз ёп шохобчаси орқали эса Бўз ёп овули ҳудудидаги истеъмолчиларга суюлтирилган газ тасдиқланган жадвал асосида узлуксиз етказиб берилмоқда.

Бундан ташқари, Хитой ва Назархон овуллари, Тош қалъа, Беш овул, Юқори қишлоқ, Ҳизр эли, Тор ёп, Намуна, Қизилчоли, Жумур овул маҳаллалари ҳудудидаги истеъмолчиларга суюлтирилган газ жадвал асосида, махсус автомашиналарда айланма тарзда ташиб етказиб берилмоқда.

Биргина жорий 2024 йилнинг 1-чораги учун жами 1 минг 80 тоннага яқин, шу жумладан аҳоли истеъмолчилари учун 1 минг 70 тоннага яқин, маиший соҳа истеъмолчилари учун эса 10,5 тонна суюлтирилган газ фонди белгиланган бўлса, амалда жами 1 минг 100,5 тонна суюлтирилган газ истеъмолчиларга етказиб берилди. Бу ҳажмнинг 1 минг 96 тоннаси аҳоли истеъмолчиларига, 4,68 тоннаси эса маиший соҳа истеъмолчиларига тўғри келади.

Суюлтирилган газнинг аҳолига етказиб берилиши мураккаб ва кўп қиррали жараён бўлиб, унда қатъий қоидалар ва стандартларга амал қилиш талаб этилади. Бу эса тизимнинг самарали ишлаши, аҳолининг хавфсизлиги ва фаровонлиги учун жуда муҳим бўлиб, мамлакатнинг энергетика хавфсизлиги ва иқтисодий барқарорлигини таъминлашда ҳал қилувчи рол ўйнайди.

Қ.Матирзаев, “Амударётумангаз”нинг суюлтирилган газ хизмати бошлиғи.