Isteʼmolchilar suyultirilgan gaz bilan uzluksiz taʼminlanmoqda

Mamlakatimizda tabiiy gazni quvurlar orqali yetkazish qiyin boʻlgan hududlarda yashovchi isteʼmolchilarga suyultirilgan gaz yetkazib berish boʻyicha samarali tizim yaratilgan. Bu borada aniq qoidalar va standartlar mavjud boʻlib, ular isteʼmolchilarning xavfsizligini taʼminlash va gaz taʼminotining uzluksizligini kafolatlashga xizmat qiladi. Suyultirilgan gazni yetkazib berish gaz taʼminoti tashkilotlari va isteʼmolchilar oʻrtasida tuziladigan shartnomalar asosida amalga oshiriladi. Bu shartnomalarda gazning yetkazib berilish muddatlari, miqdori va sifati kabi muhim parametrlar aniq belgilab qoʻyiladi.

Gaz taʼminoti tashkilotlari, shuningdek, xonadonlar soni va tabiiy gazga boʻlgan ehtiyojni, gaz ballonlarining mavjudligini hisobga olgan holda kelgusi yil uchun suyultirilgan gazning prognozlashtiriladigan hajmini aniqlab, yuqori tashkilotlarga buyurtma beradi va yil davomida taʼminotning uzluksizligiga masʼul hisoblanadi.

Amudaryo tumanida ham isteʼmolchilarni suyultirilgan gaz bilan taʼminlash borasida tizimli ishlar amalga oshirilmoqda. Tuman boʻyicha suyultirilgan gaz isteʼmolchilari soni 25 ming 33tani tashkil qilib, shundan 24 ming 993tasi aholi isteʼmolchilari va 40tasi maishiy soha isteʼmolchilari hisoblanadi. Tuman boʻyicha 38ta ovul va mahallalardagi isteʼmolchilar suyultirilgan gazga moslashtirilgan boʻlib, ularga 1 ta servis markazi va 7 ta shaxobcha orqali suyultirilgan gaz uzluksiz ravishda yetkazib beriladi.

Markaziy gaz ballonlarni qabul qilish va tarqatish shoxobchasi orqali tumanning Choykoʻl, Toʻlqin, Oʻrta qalʼa, Amir Temur nomli va Tosh yop ovullari, shuningdek, Bosuv, Arna boʻyi, Bogʻ mahallalari hududidagi isteʼmolchilarga suyultirilgan gaz yetkazib beriladi.

Xolimbeg ovulidagi servis markazi orqali Xolimbeg va Qilichboy ovullari hamda Ayoqchi mahallasi hududidagi, Kuyuk koʻpir ovulidagi shoxobcha orqali esa Kuyuk koʻpir, Bobur nomli ovullar hamda Oʻzbekiston mahallasi hududidagi isteʼmolchilar suyultirilgan gaz bilan taʼminlanadi.

Bundan tashqari, tumanning Qipchoq ovulida joylashgan shoxobcha orqali Qipchoq ovuli, Daryo boʻyi, Uyshin va Beshtom mahallalari hamda Qipchoq shaharchasi hududidagi aholi isteʼmolchilariga suyultirilgan gaz yetkazib beriladi.

Oq oltin ovuli va Jumurtov shaharchasidagi isteʼmolchilar Oq oltin shoxobchasi orqali, Qangli ovuli va Qum yop mahallasidagi isteʼmolchilar esa Qangli shoxobchasi orqali suyultirilgan gaz bilan taʼminlanadi.

Aytish kerakki, maishiy gaz ballonlarini aholiga va ijtimoiy soha obʼektlariga taqsimlash va yetkazib berish tasdiqlangan jadvalga muvofiq amalga oshiriladi. Bu jarayonda gaz ballonlarini gaz taʼminoti tashkiloti va isteʼmolchi oʻrtasida tuzilgan shartnoma asosida, maxsus avtotransport vositalari va rezervuar sigʻimlari yordamida yetkazib berish koʻzda tutilgan.

Oʻzbekiston Respublikasi Vazirlar Mahkamasining 2018-yil 10-avgustdagi 646-sonli qaroriga asosan suyultirilgan uglevodorod gazini yetkazib berish tizimini takomillashtirish va yagona tashkiliy-texnik talablarni belgilash maqsadida “Aholi va ijtimoiy soha obʼektlariga kundalik hayotda foydalanish uchun suyultirilgan uglevodorod gazini yetkazib berish tartibi toʻgʻrisida”gi nizom tasdiqlangan. Bu nizomda gaz yetkazib berishning samarali tizimini yaratish, huquqiy asoslarini aniqlash va ushbu sohada yagona tashkiliy-texnik talablarni belgilash kabi masalalar qamrab olingan.

“Hududgazta’minot” aktsiyadorlik jamiyatining “Hududgaz Qoraqalpogʻiston” gaz taʼminoti filialiga qarashli Amudaryo tumani gaz taʼminoti korxonasi xodimlari ham aholini suyultirilgan gaz bilan taʼminlashda ushbu texnik qoidalarga qatʼiy amal qilmoqda.

Korxona xodimlari tumanning eng chekka hududlaridagi isteʼmolchilarga ham oʻz vaqtida va  sifatli xizmat koʻrsatib kelishmoqda. Doʻrman shoxobchasi orqali Doʻrman ovuli, Boʻz solma va Qoramon mahallalari, Boʻz yop shoxobchasi orqali esa Boʻz yop ovuli hududidagi isteʼmolchilarga suyultirilgan gaz tasdiqlangan jadval asosida uzluksiz yetkazib berilmoqda.

Bundan tashqari, Xitoy va Nazarxon ovullari, Tosh qalʼa, Besh ovul, Yuqori qishloq, Hizr eli, Tor yop, Namuna, Qizilcholi, Jumur ovul mahallalari hududidagi isteʼmolchilarga suyultirilgan gaz jadval asosida, maxsus avtomashinalarda aylanma tarzda tashib yetkazib berilmoqda.

Birgina joriy 2024-yilning 1-choragi uchun jami 1 ming 80 tonnaga yaqin, shu jumladan aholi isteʼmolchilari uchun 1 ming 70 tonnaga yaqin, maishiy soha isteʼmolchilari uchun esa 10,5 tonna suyultirilgan gaz fondi belgilangan boʻlsa, amalda jami 1 ming 100,5 tonna suyultirilgan gaz isteʼmolchilarga yetkazib berildi. Bu hajmning 1 ming 96 tonnasi aholi isteʼmolchilariga, 4,68 tonnasi esa maishiy soha isteʼmolchilariga toʻgʻri keladi.

Suyultirilgan gazning aholiga yetkazib berilishi murakkab va koʻp qirrali jarayon boʻlib, unda qatʼiy qoidalar va standartlarga amal qilish talab etiladi. Bu esa tizimning samarali ishlashi, aholining xavfsizligi va farovonligi uchun juda muhim boʻlib, mamlakatning energetika xavfsizligi va iqtisodiy barqarorligini taʼminlashda hal qiluvchi rol oʻynaydi.

Q.Matirzayev, “Amudaryotumangaz”ning suyultirilgan gaz xizmati boshligʻi.