УМУМХАЛҚ ХАЙРИЯ ҲАШАРИ ҚИШЛОҚ ВА МАҲАЛЛАЛАРГА КЎРК БАҒИШЛАДИ

Ҳашар – халқимиз учун азалий бобомерос қадрият, бирдамлик, миллатларо тотувлик, меҳр-оқибат ва саховат рамзи. Ҳар йили анъанага айланган Наврўз – умумхалқ байрами арафасидаги хайрия ҳашарида мамлакатимиздаги 9 мингта маҳаллада бу йил ҳам ободонлаштириш, кўкаламзорлаштириш ишлари амалга оширилиб,  16 минг туп мевали ва манзарали дарахтлар экилди.

Амударё туманида ҳам умумхалқ хайрия ҳашари уюшқоқлик билан ўтказилди.

Туманнинг Қиличбой мавзесидан то Назархон қишлоғи кенгликларигача бўлган бепоён ҳудудларда 10дан ортиқ миллат вакилларини бир эзгу мақсад – Амударё туманини Ўзбекистоннинг янада обод ва фаровон, ҳавоси мусаффо, ери, суви экологик тоза ҳудудига айлантиришдек хайрли ниятлар янада жипслаштирди. Хитой ва Бўзёп овулларидан Жумуртов, Қипчоқ ва Қанглигача бўлган гузар йўллари, дала йўллари ва кўчалар бўйларида амалга оширилган ободонлаштириш ва кўкаламзорлаштириш тадбирларида минглаб туп дов-дарахтларга шакл берилди, туплари оқланиб, қуриганларининг ўрнига янги кўчатлар ўтқазилди.

Шунингдек, умумтаълим мактаблари, соғликни сақлаш муассасалари, маданий-маиший объектлар, тадбиркорлик субъектларининг атрофларидаги дарахтзорлар, арчазорларга алоҳида шакл берилиб, бу ҳудудларга ҳам мевали ва манзарали дарахт кўчатлари, гул кўчатлари экилди.

Айниқса, Амударё туман Тиббиёт бирлашмаси ходимлари ҳашарда ҳамжиҳатлик билан кенг миқёсли ободонлаштириш ишларини амалга оширдилар. Марказий шифохона ҳудудидаги арчазорлар, шифокорлар боғи тартибга келтирилиб, дарахтларга шакл берилди. Қиш ойларидаги қор-ёмғирлар туфайли ранглари кетиб қолган шифохона ҳудудидаги йўлаклар четларидаги бетон тўсиқларни бўяш, дарахтларни оқлаш, ариқларни чимлардан тозалаш ишлари амалга оширилди. Кўп тармоқли марказий поликлиника атрофи ва гулзорлар тозаланиб, экишга тайёрлаб қўйилди.

Ҳашар – элга ярашар, деб бежизга айтилмаган. Ўзлари яшаётган, меҳнат қилаётган ҳудудларни, қишлоқ ва маҳалла гузарларини, кўчалар ва иморатларини файзли, гўзал гўшага айлантириш истагида бўлган амударёликлар ҳашар баҳонасида хайр-саховат ишларини ҳам амалга оширдилар. Уй-жойларининг таъмирига рўзғор харажатларидан орттириб маблағ ажратолмаётган ҳамқишлоқлари, маҳалладошлари ҳолидан хабар олишиб, уларнинг хонадонларида таъмирлаш-тиклаш ишларида яқиндан кўмакдош бўлдилар.

Айниқса, бу борада эл-юртда юксак обрў-эътиборга эга нуронийларнинг умумхалқ ҳашарида иштирок этган 12566 нафар ёшларга бош-қош бўлиб, эҳтиёжманд оилаларнинг уй-жойларини тартибга келтириш, томорқа ерларида экиш-тикиш ишларига кўмаклашишдек хайр-саховат тадбирларини амалга оширганлари ўсиб келаётган ёш авлод вакиллари учун ҳақиқий ибрат бўлди.

Шу куни амударёликлар ота-боболари мангу қўним топган қабристонларда ҳам кенг кўламли  ободонлаштириш ишларини амалга оширдилар. Хусусан, Чойкўл қишлоғи ҳудудидаги Нўғай Эшон, Назарбобо, Бобо Рустам, Амир Темур номли овул ҳудудидаги Минг ярим шаҳид, Қиличбой  мавзесидаги Ёқуб Эшон бобо, Куюк кўпир ва Хитой қишлоқларидаги Ҳақ Саиджон бобо, Қумсангар, Жумуртов шаҳарчаси ҳудудидаги Саломат бобо, Назархон қишлоғидаги Бес мулла каби тумандаги барча қабристонлар турли шох-шаббалардан, қуриган ўт-ўланлардан, ортиқча чиқиндилардан тозаланди. Тумандаги 1та зиёратгоҳда ҳам кенг миқёсли ишлар олиб борилди. Шу билан бирга, мазкур қабристонларда руҳлари  мангу қўним топган инсонлар хотираларига қуръон оятларидан тиловатлар қилинди.

Амударё туман Ободонлаштириш бошқармаси ишчилари томонидан бажарилган ишлар янада самарали бўлди. Мазкур корхона ишчи-ходимларининг саъй-ҳаракатлари туфайли Манғит шаҳрининг марказий кўчалари бўйларидаги дов-дарахтлар оҳакланди, йўл четларидаги бетон тўсиқлар ва устунлар оқ, қора рангларда бўялиб, безак берилди. Деҳқон бозори атрофидаги тадбиркорлик субъектлари тартибга келтирилиб, Деҳқон бозорининг ички ва ташқи қисмлари турли маиший чиқиндилардан тозаланди ва йиғилган чиқиндилар махсус техникалар ёрдамида шаҳар ташқарисидаги чиқинди полигонига чиқариб ташланди.

Туман ҳудудидаги қишлоқлар ва маҳаллаларни оқар сув билан таъминловчи ариқлар ҳудудлар аҳолиси ва ёшлар ташаббуслари билан тозаланиб, айрим ҳудудларда қазув ишлари ҳам амалга оширилди.

Умумхалқ хайрия ҳашари муносабати билан олиб борилган ободонлаштириш ва кўкаламзорлаштириш ишлари туфайли Амударё туманидаги 49та қишлоқ ва маҳаллалар ҳудудлари янада гўзал ва кўркамлик касб этди.

Шунингдек, Манғит шаҳрининг Навоий номли, Ойбек номли, Чордара, Дурунки, Дўстлик, Янгиобод, Фаровон маҳаллалари ҳудудларидаги ҳар бир кўча, ҳар битта хонадон ва мазкур маҳаллалар ҳудудида фаолият олиб борувчи идора ва ташкилотлар атрофлари умумхалқ ҳашаридан сўнг янада обод ва кўркам қиёфага кирди. Хонадонларнинг фасад қисмлари оҳакланиб, кўчалар четидаги бетон ариқлар тозаланди. Умумхалқ ҳашари туфайли Аму элининг ҳар бир гўшаси аҳолиси Наврўз тараддудини бошлаб юбордилар.

Янги кун – янги деҳқончилик фаслини чор-атрофни ободонлаштириш, кўкаламзорлаштириш тадбирлари билан бошлашга одатланган амударёликлар 17 март – умумхалқ хайрия ҳашарида ҳамжиҳатлик билан иштирок этишди. “Обод ва файзли маҳалла – юрт кўрки” шиори остида ўтказилган ушбу умумхалқ хайрия ҳашарида 48 минг 325 нафар киши иштирок этишди. Иштирокчиларнинг 12 минг 566 нафари ёшлар бўлиб, уларнинг саъй-ҳаракатлари билан 297 гектар майдон турли хас-хашак ва чиқиндилардан тозаланиб, 227 тонна чиқинди чиқинди полигонига чиқариб ташланди. 238 км. узунликдаги ариқ-зовурлар тозаланди ва 36та қабристонда ободонлаштириш ишлари амалга оширилди, 415та кўчалар ободонлаштирилди ҳамда аҳоли томонидан кўчалар, йўллар бўйларига мевали ва манзарали дарахт кўчатлари экилди. Ушбу кенг кўламли ободонлаштириш ишларини амалга оширишда 34та техника воситалари жалб этилди.

Умумхалқ хайрия ҳашарида ижтимоий ҳимояга муҳтож, кам таъминланган фуқароларга хайр-саховат кўрсатилиб, улардан уй-жойлари таъмирга муҳтож бўлган 43 нафарининг  иморатлари таъмирлаб берилди.

Шуниси эътиборлики, оддий фуқаролар, уй бекаларидан  тортиб, Амударё тумани ҳокими Собир Хўжаметов ва ҳокимлик бош мутахассислари ҳам фаол иштирок этган умумхалқ хайрия ҳашари туфайли Амударё туманининг барча қишлоқ ва маҳаллалари ҳақиқатан ҳам янада обод ва файзли масканларга айланди.

Робия ЙЎЛДОШЕВА.