“ВАТАНПАРВАР ЁШЛАР БИЛАН – УЧИНЧИ РЕНЕССАНС САРИ!” ШИОРИ ОСТИДА ҲАРБИЙ ВАТАНПАРВАРЛИК МАВЗУСИДА ТАРҒИБОТ ТАДБИРИ ЎТКАЗИЛДИ

Ёшларни ҳарбий ватанпарварлик руҳида тарбиялаш, улар қалбида ҳарбий ҳаётга бўлган қизиқиш ва меҳр-муҳаббат туйғуларини уйғотиш, шу билан бирга, тинчлик, бағрикенглик, халқлар дўстлигини мустаҳкамлашга ўз ҳиссаларини қўшишга даъват этиш мақсадида Ўзбекистон Республикаси Президенти ҳузуридаги Хавфсизлик Кенгашининг топшириғига кўра мамлакатимиз бўйлаб умумтаълим мактабларининг ўқувчи-ёшлари билан учрашув тадбирлари ўтказилмоқда.

Жорий йилнинг 6 март санасида Амударё тумани Маданият маркази биносида бўлиб ўтган учрашув тадбири ҳам ёшларни ватанпарварлик руҳида тарбиялашга қаратилгани билан муҳим аҳамият касб этди.

Ўзбекистон Республикаси Президенти ҳузуридаги Хавфсизлик Кенгашининг 2024 йил 12 январь кунги кенгайтирилган йиғилишида тасдиқланган “Йўл харитаси”да белгиланган чора-тадбирлар дастури ижросини таъминлаш мақсадида Амударё туманидаги Қиличбой, Дўрман Қангли, Назархон овуллари ҳамда Боғ, Хизр эли, Аёқчи, Бўз солма, Қумёп, Чордара, Дурунки маҳаллалари чегара ҳудудларида жойлашган 3-, 18-, 19-, 29-, 35-, 36-, 39-, 46-, 56-, 58-, 76-, 82-, 83-, 84-сонли умумтаълим мактаблари Нукус ҳарбий Прокуратурасига бириктирилган эди.

Шу муносабат билан “Ватанпарвар ёшлар билан – Учинчи Ренессанс сари!” шиори остида Қорақалпоғистон Республикаси Нукус ҳарбий Прокуратураси раҳбарлигида тарғибот-ташвиқот учрашув тадбири ўтказилиб, унда Қорақалпоғистон Республикаси Нукус ҳарбий прокурори ўринбосари Даврон Турумбаев, Қорақалпоғистон Республикаси Қўриқлаш бошқармаси бошлиғи ўринбосари Дилшод Муллабоев, шунингдек, Амударё тумани Мудофаа ишлари бўлими, Амударё тумани Миллий гвардия хизмати, Фавқулодда вазиятлар вазирлиги Амударё туман бўлими, Давлат хавфсизлик хизмати чегара қўшинлари масъул ходимлари, Мудофаа вазирлиги фахрийлари, собиқ Афғон уруши байналмилал жангчилари, умумтаълим мактабларининг чақириққа қадар бўлган тайёргарлик фани ўқитувчилари, бокс спорти бўйича Ўзбекистон чемпионлари ҳамда чегара ҳудудларида жойлашган умумтаълим мактабларининг юқори синф ўқувчилари иштирок этдилар.

Учрашув тадбирида Қорақалпоғистон Республикаси Нукус ҳарбий прокурори ўринбосари Даврон Турумбаев, Қорақалпоғистон Республикаси Қўриқлаш бошқармаси бошлиғининг ўринбосари Дилшод Муллабоев ва бошқалар сўзга чиқиб, мамлакатимизда ёшларга оид давлат сиёсатининг устувор вазифалари, ёшларни ҳарбий ватанпарварлик ғоялари асосида тарбиялаш борасида амалга оширилаётган кенг қамровли ишлар, айниқса, ўсиб келаётган ёш авлоднинг билим олиши, ўз қобилиятларини амалда намоён этишлари учун яратилган шарт-шароит ва имкониятлар хусусида сўз юритдилар. Шунингдек, бугунгидай тинч, фаровон ҳаётнинг қадрига етиш, миллий-маънавий қадриятларни асраб-авайлаш, айниқса, она Ватаннинг ҳар қарич ерига нисбатан меҳр ва дахлдорлик туйғуси билан яшаш ҳар бир Ўзбекистон фуқаросининг бурчи эканлигини таъкидладилар.

Тадбир давомида учрашув иштирокчилари бўлган ёшлар учун замонавий ҳарбий қурол-аслаҳалар кўргазмаси ҳам намойиш этилди. Унда ёшлар мамлакатимизнинг ҳарбий-техникавий салоҳияти, куч-қудрати хусусидаги маълумотларга эга бўлдилар. 250 нафарга яқин ўқувчи-ёшлар масъуллар ҳамда чақирувга қадар бошланғич тайёргарлик ўқитувчилари билан биргаликда кўргазмага қўйилган ҳарбий қурол-аслаҳаларнинг жанговарлик қудрати, уларни қўллаш бўйича зарур маълумотларга эга бўлдилар.

Айниқса, Давлат хавфсизлик хизмати чегара қўшинларида ўз ҳарбий хизмат бурчларини ўтаётган аскарларнинг кўргазмали чиқишлари, Шимоли-Ғарбий ҳарбий округ оркестри томонидан ижро этилган ватанпарварлик, тинчлик ва дўстлик ҳақидаги жанговар куй-қўшиқлар тадбир иштирокчиларига завқ-шавқ бағишлади.

“Ватанпарвар ёшлар билан – Учинчи Ренессанс сари!” шиори остида ўтказилган тарғибот-ташвиқот учрашув тадбири ёшларда катта таассурот қолдирди.

Робия ЙЎЛДОШЕВА.