ВАТАНПАРВАРЛИК ОЙЛИГИ ДОИРАСИДА ҚИЛИЧБОЙ ОВУЛИДАГИ ҲАРБИЙ ҚИСМДА ЎТКАЗИЛГАН ТАДБИРДА ҚУРОЛЛИ КУЧЛАРИМИЗ ЖАНГОВАР САЛОҲИЯТИ НАМОЙИШ ЭТИЛДИ
Шу кунларда мамлакатимизнинг барча ҳудудларида “Ватанпарварлик ойлиги” доирасида ёшларни ҳарбий-ватанпарварлик руҳида тарбиялаш, уларнинг ҳарбий касбга бўлган қизиқишини ошириш, Қуролли Кучларимиз жанговар салоҳиятини намойиш этиш мақсадида турли тадбирлар ташкил этилмоқда. Ушбу тадбирлар ёшлар қалбидаги ватанпарварлик туйғуларини янада мустаҳкамлаб, юрт тақдирига дахлдорлик ҳиссини оширишга хизмат қилмоқда.
Жорий йилнинг 9 январь куни мазкур ойлик доирасида Ўзбекистон Республикаси Қуролли Кучлари ташкил топганининг 32 йиллиги ҳамда Ватан ҳимоячилари куни муносабати билан Қиличбой овулидаги Давлат хавфсизлик хизмати чегара қўшинларига қарашли ҳарбий қисмда Амударё тумани Мудофаа ишлари бўлими ва бошқа тегишли ташкилотлар билан ҳамкорликда “Очиқ эшиклар” куни тадбири ташкил этилди.
“Янги Ўзбекистон армияси мамлакат қудрати, юксак ғурур ва садоқат тимсолидир!” шиори остида “Ватан муқаддас, уни ҳимоя қилиш шарафли бурч” мавзусида бўлиб ўтган ушбу тадбирда Давлат хавфсизлик хизмати чегара қўшинларига қарашли ҳарбий қисмнинг маъсул ходимлари, туман Мудофаа ишлари бўлими бошлиғи, подполковник Шерзод Муродов ва умумтаълим мактабларининг Чақириққа қадар бошланғич таълим раҳбарлари қатнашишди. Шунингдек, овул ҳудудидаги 14 та умумтаълим мактабларнинг 9-11-синф ўқувчилари ҳамда “Ватан таянчи” отряди аъзолари иштирок этишди.
Ватанимиз мадҳияси билан бошланган ушбу тадбирни ҳарбий қисм хизматчиси Аббос Рустамов очиб берди ва барчани Ватан ҳимоячилари куни билан табриклади. Тадбирда сўзга чиққан туман Мудофаа ишлари бўлими бошлиғи, подполковник Шерзод Муродов ҳам ҳарбийлар томонидан ўқувчи-ёшларга мамлакатимизда ҳарбий соҳада амалга оширилаётган ислоҳотлар ҳақида маълумотлар берди. Ислоҳотлар натижасида Ўзбекистон Республикаси Қуролли Кучлари ҳарбий қисмлари тубдан янгича кўринишга келаётгани, Қуролли Кучларимиздаги барча ҳарбий-техникалар янгисига алмаштирилгани, ҳарбий шаҳарчалар барпо этилаётгани ҳақида сўз юритди.
Шундан сўнг, ёшлар ҳарбийлар томонидан тайёрланган қурол-аслаҳа ва ҳарбий-техникалар кўргазмаси билан яқиндан танишдилар. Ҳарбий мутахассислар ўқувчиларга кўргазмага қўйилган ҳарбий-техникалар, ўқ отар қуроллари, мудофаа воситаларининг техник-тактик хусусиятларини тушунтирдилар. Шунингдек, ҳарбий аскарлар томонидан тайёрланган композицион кўринишлар, хизмат от ва итлар билан биргаликдаги машғулотлар намойиш этилди.
Таъкидланганидек, ушбу тадбирдан кўзланган асосий мақсад, Ўзбекистон манфаатларини нафақат ҳарбий соҳада, балки ҳаётнинг барча жабҳаларда ҳимоя қилишга тайёр туриш, ёшларда ҳарбий-ватанпарварлик туйғуларини ривожлантириш, Ватанга муҳаббат, ҳарбий хизматга қизиқишларини ошириш ҳисобланади. Шунингдек, бу каби тадбирлар ёшларда жаҳонда рўй бераётган сиёсий-ижтимоий жараёнларга миллий манфаатларимиздан келиб чиққан ҳолда ёндашиш кўникмаларини шакллантириш ҳамда турли ички ва ташқи мафкуравий иммунитетни ҳосил қилишга қаратилгани билан аҳамиятлидир. Зеро ҳар қандай мураккаб вазиятларда тезкор ва мустақил қарор қабул қилиш, замонавий ҳарбий-техника воситалардан самарали фойдаланиш малакасига эга ёшларни тарбиялаш, юрт учун фидойи бўлиш бугунги кун талаби эканини ҳаётий мисоллар ва таъсирчан воситалар орқали ёшлар онгига сингдириб бориш муҳим аҳамият касб этади.
Ёшлар ҳарбий қисмда аскарларнинг яшаш шароитлари, ҳарбий тайёргарлик борасидаги машғулотлар жараёнлари билан танишдилар. Ҳарбий қисм аскарларининг ҳарбий-техника ва жанговар қуроллар, хизмат ҳайвонларидан фойдаланиш борасидаги кўргазмалари, ёшлар билан ўтказилган мулоқот ва суҳбатлар ёшларнинг ҳарбий бурчга бўлган қизиқишини, она Ватанга муҳаббат ва садоқатини янада мустаҳкамлади.
О.Худойберганова.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
