VATANPARVARLIK OYLIGI DOIRASIDA QILIChBOY OVULIDAGI HARBIY QISMDA OʻTKAZILGAN TADBIRDA QUROLLI KUChLARIMIZ JANGOVAR SALOHIYaTI NAMOYISh ETILDI
Shu kunlarda mamlakatimizning barcha hududlarida “Vatanparvarlik oyligi” doirasida yoshlarni harbiy-vatanparvarlik ruhida tarbiyalash, ularning harbiy kasbga boʻlgan qiziqishini oshirish, Qurolli Kuchlarimiz jangovar salohiyatini namoyish etish maqsadida turli tadbirlar tashkil etilmoqda. Ushbu tadbirlar yoshlar qalbidagi vatanparvarlik tuygʻularini yanada mustahkamlab, yurt taqdiriga daxldorlik hissini oshirishga xizmat qilmoqda.
Joriy yilning 9-yanvar kuni mazkur oylik doirasida Oʻzbekiston Respublikasi Qurolli Kuchlari tashkil topganining 32 yilligi hamda Vatan himoyachilari kuni munosabati bilan Qilichboy ovulidagi Davlat xavfsizlik xizmati chegara qoʻshinlariga qarashli harbiy qismda Amudaryo tumani Mudofaa ishlari boʻlimi va boshqa tegishli tashkilotlar bilan hamkorlikda “Ochiq eshiklar” kuni tadbiri tashkil etildi.
“Yangi Oʻzbekiston armiyasi mamlakat qudrati, yuksak gʻurur va sadoqat timsolidir!” shiori ostida “Vatan muqaddas, uni himoya qilish sharafli burch” mavzusida boʻlib oʻtgan ushbu tadbirda Davlat xavfsizlik xizmati chegara qoʻshinlariga qarashli harbiy qismning maʼsul xodimlari, tuman Mudofaa ishlari boʻlimi boshligʻi, podpolkovnik Sherzod Murodov va umumtaʼlim maktablarining Chaqiriqqa qadar boshlangʻich taʼlim rahbarlari qatnashishdi. Shuningdek, ovul hududidagi 14 ta umumtaʼlim maktablarning 9-11-sinf oʻquvchilari hamda “Vatan tayanchi” otryadi aʼzolari ishtirok etishdi.
Vatanimiz madhiyasi bilan boshlangan ushbu tadbirni harbiy qism xizmatchisi Abbos Rustamov ochib berdi va barchani Vatan himoyachilari kuni bilan tabrikladi. Tadbirda soʻzga chiqqan tuman Mudofaa ishlari boʻlimi boshligʻi, podpolkovnik Sherzod Murodov ham harbiylar tomonidan oʻquvchi-yoshlarga mamlakatimizda harbiy sohada amalga oshirilayotgan islohotlar haqida maʼlumotlar berdi. Islohotlar natijasida Oʻzbekiston Respublikasi Qurolli Kuchlari harbiy qismlari tubdan yangicha koʻrinishga kelayotgani, Qurolli Kuchlarimizdagi barcha harbiy-texnikalar yangisiga almashtirilgani, harbiy shaharchalar barpo etilayotgani haqida soʻz yuritdi.
Shundan soʻng, yoshlar harbiylar tomonidan tayyorlangan qurol-aslaha va harbiy-texnikalar koʻrgazmasi bilan yaqindan tanishdilar. Harbiy mutaxassislar oʻquvchilarga koʻrgazmaga qoʻyilgan harbiy-texnikalar, oʻq otar qurollari, mudofaa vositalarining texnik-taktik xususiyatlarini tushuntirdilar. Shuningdek, harbiy askarlar tomonidan tayyorlangan kompozitsion koʻrinishlar, xizmat ot va itlar bilan birgalikdagi mashgʻulotlar namoyish etildi.
Taʼkidlanganidek, ushbu tadbirdan koʻzlangan asosiy maqsad, Oʻzbekiston manfaatlarini nafaqat harbiy sohada, balki hayotning barcha jabhalarda himoya qilishga tayyor turish, yoshlarda harbiy-vatanparvarlik tuygʻularini rivojlantirish, Vatanga muhabbat, harbiy xizmatga qiziqishlarini oshirish hisoblanadi. Shuningdek, bu kabi tadbirlar yoshlarda jahonda roʻy berayotgan siyosiy-ijtimoiy jarayonlarga milliy manfaatlarimizdan kelib chiqqan holda yondashish koʻnikmalarini shakllantirish hamda turli ichki va tashqi mafkuraviy immunitetni hosil qilishga qaratilgani bilan ahamiyatlidir. Zero har qanday murakkab vaziyatlarda tezkor va mustaqil qaror qabul qilish, zamonaviy harbiy-texnika vositalardan samarali foydalanish malakasiga ega yoshlarni tarbiyalash, yurt uchun fidoyi boʻlish bugungi kun talabi ekanini hayotiy misollar va taʼsirchan vositalar orqali yoshlar ongiga singdirib borish muhim ahamiyat kasb etadi.
Yoshlar harbiy qismda askarlarning yashash sharoitlari, harbiy tayyorgarlik borasidagi mashgʻulotlar jarayonlari bilan tanishdilar. Harbiy qism askarlarining harbiy-texnika va jangovar qurollar, xizmat hayvonlaridan foydalanish borasidagi koʻrgazmalari, yoshlar bilan oʻtkazilgan muloqot va suhbatlar yoshlarning harbiy burchga boʻlgan qiziqishini, ona Vatanga muhabbat va sadoqatini yanada mustahkamladi.
O.Xudoyberganova.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
