“Бир болага етти маҳалла ҳам ота, ҳам она” шиори остида Арнабўйи маҳалласида учрашув ўтказилди

Инсон зоти борки, болам деб яшайди ва ўз фарзандининг одобли, ақлли, билимдон ва соғлом бўлиб улғайишини истайди. Фан-техника жадал тараққий этиб бораётган ҳозирги даврда ёш авлод тарбияси алоҳида аҳамият касб этади. Уларнинг билим савиялари, касб-у ҳунарлари билан бир қаторда ахлоқий фазилатлари ҳам ўсиб бориши зарур. Ёш авлод таълим-тарбияси тўғрисида ғамхўрлик қилиш нафақат ҳукуматимизнинг ёки мактабларнинг вазифаси, балки, ҳар бир ота-онанинг, кенг жамоатчиликнинг ҳам вазифаси ҳамдир. Маҳаллада истиқомат қилувчи ҳар бир фуқаро ўша маҳаллада улғаяётган барча ёшлар учун ҳам масъулдир. Халқимизнинг “Бир болага етти маҳалла ота-она” деган нақли бежиз айтилмаган.

Ёшлар – барчамизнинг келажагимиз. Уларга лоқайд қараб, ўз ҳолига ташлаб қўйиш – қандай кўнгилсизликларга сабаб бўлишини ҳаёт тажрибалари кўрсатди.

“Амударё телевидениеси” таҳририяти амалга ошираётган “Юксак маънавиятли ва ахлоқли ёшлар – келажак пойдевори” номли грант лойиҳасида ҳам ёшларнинг маънавиятини юксалтириш, улар онгида Ватанга муҳаббат миллий ва умуминсоний қадриятларга садоқат руҳини шакллантириш, уларни мафкура майдонининг турли хуружларидан ҳимоя қилиш назарда тутилган.

Шу йилнинг 28 декабрида таҳририят ходимлари “Бир болага етти маҳалла ҳам ота, ҳам она” шиори остида ёш авлодни ҳар томонлама етук, маънавиятли инсонлар қилиб вояга етказиш, уларни ёт ғоялардан ҳимоя қилиш борасида амалга оширилаётган ишлар билан танишиш мақсадида туманимизнинг Арнабўйи маҳалласида бўлдилар.

Маҳаллада 4350 нафар аҳоли истиқомат қилади, шунинг ярмидан ортиғини ёшлар ташкил этади. Ҳудудда 2та умумий ўрта таълим, 2та мактабгача таълим ташкилотларида ёшларга таълим-тарбия берилмоқда. Бу ишлар мактаб, оила, маҳалла ҳамкорлигида асосида амалга оширилаяпти. Шунингдек, ёшларнинг одобли, ахлоқли, маънавий баркамол бўлиб вояга етишида кенг жамоатчилик улкан роль ўйнамоқда.

Бу борада амалга оширилаётган ишлар, келгусидаги вазифалар маҳалла фуқаролари иштирокида ўтказилган йиғилишда ҳам кенг муҳокама этилди.

Тадбирда грант лойиҳаси ижрочиларидан бири Ойгул Ражабова, туман Ички ишлар бўлими вояга етмаганлар билан ишлаш гуруҳи инспектор-психологи Нодира Эрдошева, профилактика инспектори Даврон Каримов, йиғин масъуллари, фаол фуқаролари, ёшлар вакиллари иштирок этдилар.

Тадбирда Ойгул Ражабова, йиғиндаги ҳоким ёрдамчиси Сирож Ўрозматов, Даврон Каримов, Нодира Эрдошевалар ёш авлодни баркамол қилиб вояга етказишда қадимий урф-одатларимиз, анъаналаримизнинг тарбиявий аҳамиятидан кенг фойдаланиш, уларнинг тартиб интизомини қаттиқ назорат қилган ҳолда оиласига, маҳалладошига, юртига меҳрли, муносиб қилиб вояга етказиш лозимлиги хусусида гапирдилар. Маҳалла нуронийлари Йўлдош Човдирбоев, Ҳамро Исмоиловлар ҳам бу борадаги ўз фикр-мулоҳазаларини билдирдилар.

Маҳалла ҳам оила каби. Унинг тинч-тотувлиги, осойишталиги, ободлиги ҳар бир фуқарога боғлиқ. Демак, келажагимиз эгалари бўлган ёш авлод камоли ҳам бутун маҳаллага дахлдор вазифа бўлиб қолаверади.

Севара ИСМОИЛОВА.