“Bir bolaga yetti mahalla ham ota, ham ona” shiori ostida Arnaboʻyi mahallasida uchrashuv oʻtkazildi

Inson zoti borki, bolam deb yashaydi va oʻz farzandining odobli, aqlli, bilimdon va sogʻlom boʻlib ulgʻayishini istaydi. Fan-texnika jadal taraqqiy etib borayotgan hozirgi davrda yosh avlod tarbiyasi alohida ahamiyat kasb etadi. Ularning bilim saviyalari, kasb-u hunarlari bilan bir qatorda axloqiy fazilatlari ham oʻsib borishi zarur. Yosh avlod taʼlim-tarbiyasi toʻgʻrisida gʻamxoʻrlik qilish nafaqat hukumatimizning yoki maktablarning vazifasi, balki, har bir ota-onaning, keng jamoatchilikning ham vazifasi hamdir. Mahallada istiqomat qiluvchi har bir fuqaro oʻsha mahallada ulgʻayayotgan barcha yoshlar uchun ham masʼuldir. Xalqimizning “Bir bolaga yetti mahalla ota-ona” degan naqli bejiz aytilmagan.

Yoshlar – barchamizning kelajagimiz. Ularga loqayd qarab, oʻz holiga tashlab qoʻyish – qanday koʻngilsizliklarga sabab boʻlishini hayot tajribalari koʻrsatdi.

“Amudaryo televideniyesi” tahririyati amalga oshirayotgan “Yuksak maʼnaviyatli va axloqli yoshlar – kelajak poydevori” nomli grant loyihasida ham yoshlarning maʼnaviyatini yuksaltirish, ular ongida Vatanga muhabbat milliy va umuminsoniy qadriyatlarga sadoqat ruhini shakllantirish, ularni mafkura maydonining turli xurujlaridan himoya qilish nazarda tutilgan.

Shu yilning 28-dekabrida tahririyat xodimlari “Bir bolaga yetti mahalla ham ota, ham ona” shiori ostida yosh avlodni har tomonlama yetuk, maʼnaviyatli insonlar qilib voyaga yetkazish, ularni yot gʻoyalardan himoya qilish borasida amalga oshirilayotgan ishlar bilan tanishish maqsadida tumanimizning Arnaboʻyi mahallasida boʻldilar.

Mahallada 4350 nafar aholi istiqomat qiladi, shuning yarmidan ortigʻini yoshlar tashkil etadi. Hududda 2ta umumiy oʻrta taʼlim, 2ta maktabgacha taʼlim tashkilotlarida yoshlarga taʼlim-tarbiya berilmoqda. Bu ishlar maktab, oila, mahalla hamkorligida asosida amalga oshirilayapti. Shuningdek, yoshlarning odobli, axloqli, maʼnaviy barkamol boʻlib voyaga yetishida keng jamoatchilik ulkan rol oʻynamoqda.

Bu borada amalga oshirilayotgan ishlar, kelgusidagi vazifalar mahalla fuqarolari ishtirokida oʻtkazilgan yigʻilishda ham keng muhokama etildi.

Tadbirda grant loyihasi ijrochilaridan biri Oygul Rajabova, tuman Ichki ishlar boʻlimi voyaga yetmaganlar bilan ishlash guruhi inspektor-psixologi Nodira Erdosheva, profilaktika inspektori Davron Karimov, yigʻin masʼullari, faol fuqarolari, yoshlar vakillari ishtirok etdilar.

Tadbirda Oygul Rajabova, yigʻindagi hokim yordamchisi Siroj Oʻrozmatov, Davron Karimov, Nodira Erdoshevalar yosh avlodni barkamol qilib voyaga yetkazishda qadimiy urf-odatlarimiz, anʼanalarimizning tarbiyaviy ahamiyatidan keng foydalanish, ularning tartib intizomini qattiq nazorat qilgan holda oilasiga, mahalladoshiga, yurtiga mehrli, munosib qilib voyaga yetkazish lozimligi xususida gapirdilar. Mahalla nuroniylari Yoʻldosh Chovdirboyev, Hamro Ismoilovlar ham bu boradagi oʻz fikr-mulohazalarini bildirdilar.

Mahalla ham oila kabi. Uning tinch-totuvligi, osoyishtaligi, obodligi har bir fuqaroga bogʻliq. Demak, kelajagimiz egalari boʻlgan yosh avlod kamoli ham butun mahallaga daxldor vazifa boʻlib qolaveradi.

Sevara ISMOILOVA.