“ЁНҒИН ХАВФСИЗЛИГИ ОЙЛИГИ” ДОИРАСИДА ПРОФИЛАКТИК ТАДБИРЛАР ЎТКАЗИЛМОҚДА

Куз-қиш мавсумида ҳаво ҳароратининг кескин совиб кетиши муносабати билан юртимизда иситиш мосламаларига эҳтиёж ортиб боради. Шу баробарида табиий газ ёки муқобил ёқилғи маҳсулотларидан фойдаланиш ҳажми кескин ошиб кетиши туфайли ёнғин хавфсизлиги қоидаларига амал қилиш долзарб вазифага айланади. Чунки мамлакатимизнинг турли ҳудудларида ўтган йиллар  куз-қиш мавсумида ёнғинлар билан боғлиқ кўнгилсиз ҳодисалар, ис газидан заҳарланиш ҳолатлари содир бўлиб турганлиги ҳеч кимга сир эмас.

Шуларни эътиборга олган ҳолда бир неча йиллардан бери қиш мавсумида ёнғинлар билан боғлиқ бахтсиз ҳодисаларнинг олдини олиш мақсадида “Ёнғин хавфсизлиги ойлиги” ўтказиб келинмоқда.

Жорий йилнинг 15 ноябридан 15 декабригача “Ёнғин хавфсизлиги ойлиги”ни ўтказиш белгиланган эди ва ўтган кунлар давомида туман Фавқулодда вазиятлар бўлими томонидан иқтисодиёт тармоқлари, ижтимоий соҳа объектлари ҳамда хонадонларда ёнғин хавфининг олдини олиш борасида профилактик тадбирлар режага мувофиқ олиб борилди.

Режа бўйича Амударё туман ихтисослаштирилган мактабида ҳам ўқитувчилар, ўқувчилар учун ёнғинга қарши профилактик тадбир ўтказилди.

Тадбирда дастлаб мактаб ҳовлисида ёнғин содир бўлганда ишлатиладиган асбоб-ускуналар, техника воситалари кўргазмаси намойиш этилди ва мутахассислар томонидан уларни ишлатиш йўл-йўриқлари тушунтирилди. Мактаб ҳовлисида тадбирда намойиш этилган ва қай тарзда ишлатилиши тушунтирилган асбоб-анжомлардан фойдаланган ҳолда, ёнғин содир бўлганда  қандай ҳаракатланиш бўйича ўқувчиларнинг билим  ва кўникмаларини синовдан ўтказиш мақсадида шартли содир бўлган ёнғинни ўчириш тажрибаси намойиш этилди.

Шундан сўнг, ихтисослаштирилган мактаб кутубхонасида ўқитувчилар учун “Ёнғин хавфсизлиги ойлиги”ни ўтказишнинг мазмун-моҳияти, ойлик доирасида амалга  оширилаётган чора-тадбирлар, ёнғин хавфининг олдини олишда ҳар бир фуқаронинг бурчи ва вазифалари хусусида зарур тавсиялар берилди.

Тадбир сўнгида мактаб ўқувчилари истиқомат қилувчи ётоқхонадан шартли равишда ёнғин хабари келди ва туман Фавқулодда вазиятлар бўлими ходимлари кўргазмада қўйилган ёнғин-қутқарув воситалари билан хавфни бартараф этишга тезкорлик билан жалб этилди. Ходимларнинг шиддатли ҳаракатлари ва аниқ амалга оширган чоралари туфайли шартли ёнғин ўчирилди, ҳеч бир ўқувчи тан жароҳати олмаганлиги қайд этилди.

Мазкур тадбирда туман Ихтисослаштирилган мактаби ўқитувчи ва ўқувчилари ёнғин хавфсизлиги  қоидалари, кутилмаганда ёнғин келиб чиққан вазиятда қандай ҳаракатларни амалга ошириш лозимлиги борасида кенг тушунча ва малакага эга бўлдилар.

Ш.Эркинбоев,

туман Фавқулодда вазиятлар бўлими

Профилактика ва назорат бўлинмаси инспектори.