АМУДАРЁДА ОТА-ОНА ҚАРАМОҒИДАН МАҲРУМ БЎЛГАН 3 НАФАР ЁШЛАР УЙ-ЖОЙ БИЛАН ТАЪМИНЛАНДИ
Юртимизда етим ва ота-она қарамоғидан маҳрум бўлган ёшларнинг ҳуқуқ ва эркинликларини рўёбга чиқариш, ижтимоий ҳимоясини кучайтириш, уларни давлат томонидан қўллаб-қувватлашга алоҳида эътибор берилмоқда. Амударё тумани ҳокимлигининг Болаларни ҳимоя қилиш шўъбаси томонидан ҳам туман ҳудудидаги етим ва ота-она қарамоғидан маҳрум бўлган болаларнинг муаммолари ўрганилиб, бу борада қатор ишлар амалга оширилиб келинмоқда.
14 декабрь куни шу тоифадаги яна 3 нафар ёшларга янги хонадонларнинг ҳужжатлари, калитлари тантанали равишда топширилди. Шу муносабат билан бўлиб ўтган маросимда туман ҳокими Собир Хўжаметов, секторлар раҳбарлари, ҳоким ўринбосарлари ҳамда ҳокимликнинг Болаларни ҳимоя қилиш шўъбаси раҳбари Жаҳонгир Холмуродовлар иштирок этишди.
Ота-оналари вафотидан сўнг, яқин қариндошлари васийлигига олинган, айни пайтда 18 ёшга тўлган М.Йўлдошева, Д.Мусина, С.Худоёровалар уй-жойга муҳтож сифатида рўйхатда турган эди. Шунга кўра уларга Нукус шаҳридан 1 хонали, замонавий, қулай шарт-шароитларга эга хонадонлар олиб берилиб, номларига расмийлаштирилди.
Тадбирда туман ҳокими Собир Хўжаметов ёшларга хонадонлар калитлари, ҳужжатлари ва 1 донадан телевизорларни тантанали равишда топширди ҳамда уларни эндиликда ўз уйларига эга бўлгани билан табриклаб, келгуси ҳаётида омадлар тилади.
Таъкидлаб ўтилганидек, туман ҳокимлигининг Болаларни ҳимоя қилиш шўъбаси томонидан етим ва ота-она қарамоғидан маҳрум бўлган вояга етмаган 104 нафар болага васий ва ҳомий тайинланган. Уларнинг 60 нафари васийликка, 44 нафари ҳомийликка олинган бўлиб, 39 нафари чин етимлар сифатида ҳисобга олинган. Ўтган 2022 йилда ҳам уй-жойга муҳтожлар рўйхатида турган 3 нафар ёшларга Ўзбекистон Республикаси Президентининг 2021 йилдаги “Етим болалар ва ота-она қарамоғидан маҳрум бўлган болаларни давлат томонидан қўллаб-қувватлашнинг янги тизимини жорий этиш чора-тадбирлари тўғриси”да Қарорга асосан Нукус шаҳридан хонадонлар харид қилиниб, номларига расмийлаштирилиб топширилган. Жорий йилда ҳам Вазирлар Маҳкамасининг 2022 йилдаги “Етим болалар ва ота-она қарамоғидан маҳрум бўлган болаларни ҳар томонлама қўллаб-қувватлашга қаратилган “Меҳр дафтари” тизимини жорий этиш чора-тадбирлари тўғрисида”ги тегишли қарори ижроси юзасидан туманда 19 нафар болалар “Меҳр дафтари”га киритилган.
Тадбир давомида ушбу дафтар рўйхатидаги 18 нафар болаларнинг ҳар бирига компьютер жамланмалари (моноблоклар) топширилди ва 1 нафарига 2 млн. сўмлик қишки кийим-бош олиб бериш чоралари кўрилиши маълум қилинди.
Ўз хонадонларига эга бўлган ёшлар мустақил ҳаёт остонасида ота-онасидек ғамхўрлик кўрсатиб, уй-жой билан таъминлаган давлатимизга, қолаверса, туман ҳокими, Болаларни ҳимоя қилиш шўъбаси масъулларига ўз миннатдорчиликларини билдиришди.
Озода Худойберганова.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
