AMUDARYoDA OTA-ONA QARAMOGʻIDAN MAHRUM BOʻLGAN 3 NAFAR YoShLAR UY-JOY BILAN TAʼMINLANDI
Yurtimizda yetim va ota-ona qaramogʻidan mahrum boʻlgan yoshlarning huquq va erkinliklarini roʻyobga chiqarish, ijtimoiy himoyasini kuchaytirish, ularni davlat tomonidan qoʻllab-quvvatlashga alohida eʼtibor berilmoqda. Amudaryo tumani hokimligining Bolalarni himoya qilish shoʻʼbasi tomonidan ham tuman hududidagi yetim va ota-ona qaramogʻidan mahrum boʻlgan bolalarning muammolari oʻrganilib, bu borada qator ishlar amalga oshirilib kelinmoqda.
14-dekabr kuni shu toifadagi yana 3 nafar yoshlarga yangi xonadonlarning hujjatlari, kalitlari tantanali ravishda topshirildi. Shu munosabat bilan boʻlib oʻtgan marosimda tuman hokimi Sobir Xoʻjametov, sektorlar rahbarlari, hokim oʻrinbosarlari hamda hokimlikning Bolalarni himoya qilish shoʻʼbasi rahbari Jahongir Xolmurodovlar ishtirok etishdi.
Ota-onalari vafotidan soʻng, yaqin qarindoshlari vasiyligiga olingan, ayni paytda 18 yoshga toʻlgan M.Yoʻldosheva, D.Musina, S.Xudoyorovalar uy-joyga muhtoj sifatida roʻyxatda turgan edi. Shunga koʻra ularga Nukus shahridan 1 xonali, zamonaviy, qulay shart-sharoitlarga ega xonadonlar olib berilib, nomlariga rasmiylashtirildi.
Tadbirda tuman hokimi Sobir Xoʻjametov yoshlarga xonadonlar kalitlari, hujjatlari va 1 donadan televizorlarni tantanali ravishda topshirdi hamda ularni endilikda oʻz uylariga ega boʻlgani bilan tabriklab, kelgusi hayotida omadlar tiladi.
Taʼkidlab oʻtilganidek, tuman hokimligining Bolalarni himoya qilish shoʻʼbasi tomonidan yetim va ota-ona qaramogʻidan mahrum boʻlgan voyaga yetmagan 104 nafar bolaga vasiy va homiy tayinlangan. Ularning 60 nafari vasiylikka, 44 nafari homiylikka olingan boʻlib, 39 nafari chin yetimlar sifatida hisobga olingan. Oʻtgan 2022-yilda ham uy-joyga muhtojlar roʻyxatida turgan 3 nafar yoshlarga Oʻzbekiston Respublikasi Prezidentining 2021-yildagi “Yetim bolalar va ota-ona qaramogʻidan mahrum boʻlgan bolalarni davlat tomonidan qoʻllab-quvvatlashning yangi tizimini joriy etish chora-tadbirlari toʻgʻrisi”da Qarorga asosan Nukus shahridan xonadonlar xarid qilinib, nomlariga rasmiylashtirilib topshirilgan. Joriy yilda ham Vazirlar Mahkamasining 2022-yildagi “Yetim bolalar va ota-ona qaramogʻidan mahrum boʻlgan bolalarni har tomonlama qoʻllab-quvvatlashga qaratilgan “Mehr daftari” tizimini joriy etish chora-tadbirlari toʻgʻrisida”gi tegishli qarori ijrosi yuzasidan tumanda 19 nafar bolalar “Mehr daftari”ga kiritilgan.
Tadbir davomida ushbu daftar roʻyxatidagi 18 nafar bolalarning har biriga kompyuter jamlanmalari (monobloklar) topshirildi va 1 nafariga 2 mln. soʻmlik qishki kiyim-bosh olib berish choralari koʻrilishi maʼlum qilindi.
Oʻz xonadonlariga ega boʻlgan yoshlar mustaqil hayot ostonasida ota-onasidek gʻamxoʻrlik koʻrsatib, uy-joy bilan taʼminlagan davlatimizga, qolaversa, tuman hokimi, Bolalarni himoya qilish shoʻʼbasi masʼullariga oʻz minnatdorchiliklarini bildirishdi.
Ozoda Xudoyberganova.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
