ЭР ЙИГИТ – ЮРТ ҚАЛҚОНИ

Умумий ўрта таълим муассасалари ўқувчиларига Ўзбекистон Қуролли  Кучларининг жанговор салоҳияти, тузилмалари ҳақида дастлабки ҳарбий таълимни ўргатиш, уларда Ватанга муҳаббат, юксак маънавий-руҳий фаол ҳаётий кўникма, ёт ғояларга қарши иммунитет ҳосил қилишда чақириққа қадар бошланғич тайёргарлик фанининг аҳамияти жуда муҳим.

Ўқувчиларда ҳарбий бурчни онгли равишда  бажаришга бўлган муносабатни шакллантириш, мамлакатда олиб борилаётган ислоҳотларнинг аниқ мақсади ва моҳиятини англаб етишларига эришиш, улар қалбида юрт келажаги ва тақдири учун юксак жавобгарлик ҳиссини тарбиялаш чақириққа қадар бошланғич тайёргарлик фани ўқитувчиси маҳорати, малакаси, билимига боғлиқ.

Туманимиздаги 69-сонли мактабнинг чақириққа қадар бошланғич тайёргарлик фани ўқитувчиси Икром Гулимметов зиммасидаги масъулиятли вазифасини сидқидилдан адо этишга интилаётган муаллимлардан бири.

У 1994 йилда Бухоро давлат педагогика институтининг бошланғич ҳарбий таълим ва жисмоний тарбия факультетини тугатиб, фаолиятини 35-сонли мактабда чақириққа қадар бошланғич тайёргарлик фани ўқитувчиси бўлиб ишлашдан бошлади. Кейинчалик Аёқчи маҳалла фуқаролар йиғинида котиб бўлди, 2020 йилдан бери эса 69-сонли мактабда ўқитувчи бўлиб ишлаб келаётир. Ушбу таълим муассасасида ҳозирги кунда 725 нафар ўқувчилар таълим-тарбия олишаяпти. 10-11-синфларда ўқиётган 5та синф ўқувчилари чақириққа қадар бошланғич тайёргарлик фанига қамраб олинган. Икром Гулимбетов уларга ҳафтасига 2 соат ушбу фандан сабоқ беради.

Тажрибали ўқитувчи ўқувчиларнинг машғулотлар давомида ўзлаштирган билимларини, кўникма ва маҳоратларини турли ҳарбий  ва спорт мусобақалари ўтказиш, муассасада турли саналар муносабати билан ўтказиладиган тадбирлардаги чиқишлари давомида мустаҳкамлаб боради. У ўғил болалар учун чақириққа қадар бошланғич тайёргарлик, ўғил болалар ва қизлар билан биргаликда фуқаро муҳофазасига доир, фақат қизлар билан эса тиббий билим асослари бўйича машғулотларни пухта тайёргарлик билан ўтказади ва ўқувчиларнинг диққат-эътиборини ўз машғулотларига қарата олади.

– Аскар бўлишни, ҳарбий кийимда мағрур юришни орзу қилмайдиган бола бўлмаса керак, – дейди у. – Бу орзулигича қолиб кетмаслиги, ўқувчиларимнинг муддатли ҳарбий хизматга қабул қилиниши учун жисмоний ва маънан етук бўлиб вояга етишларига интиламан. Уларга қурол-аслаҳаларни ишлатиш, жанг тактикалари, сафда юриш қоидаларини эринмай ўргатаман.

Ҳа, у ўқувчиларининг юртимизнинг ҳақиқий ўғлонлари бўлиб вояга етишлари учун интилади. Шу мақсадда ўқувчиларини ҳар йили Ўзбекистон Республикаси Мудофаа Вазирлиги тасарруфидаги Шимоли-Ғарбий ҳарбий округга қарашли полигонга олиб бориб, дала-ўқув машғулотлари давомида ҳарбий техникалар билан пухта таништиради. Нишонни ўққа тутиш машқида ўқувчилар ўзларига берилган учта имкониятда ҳам яхши натижа кўрсатганларида меҳнатлари зое кетмаётганига қувонади. Уларни муддатли ҳарбий хизматга, Олий ҳарбий таълим муассасаларига ўқишга кириб, ҳарбий соҳа мутахассислари бўлиб етишишга қизиқтира олаётганига кўнгли тоғдай кўтарилади. Ўқувчилари қалбида юртимизга содиқлик, ҳарбий хизматга ҳурмат, мардлик, жасурлик, Ватан ҳимояси учун шай туриш фазилатларини шакллантира олиш – аслида унинг асосий мақсадидир. Боиси, эр йигитлар – юрт қалқонларидир.

Ойгул РАЖАБОВА.