ER YIGIT – YuRT QALQONI

Umumiy oʻrta taʼlim muassasalari oʻquvchilariga Oʻzbekiston Qurolli  Kuchlarining jangovor salohiyati, tuzilmalari haqida dastlabki harbiy taʼlimni oʻrgatish, ularda Vatanga muhabbat, yuksak maʼnaviy-ruhiy faol hayotiy koʻnikma, yot gʻoyalarga qarshi immunitet hosil qilishda chaqiriqqa qadar boshlangʻich tayyorgarlik fanining ahamiyati juda muhim.

Oʻquvchilarda harbiy burchni ongli ravishda  bajarishga boʻlgan munosabatni shakllantirish, mamlakatda olib borilayotgan islohotlarning aniq maqsadi va mohiyatini anglab yetishlariga erishish, ular qalbida yurt kelajagi va taqdiri uchun yuksak javobgarlik hissini tarbiyalash chaqiriqqa qadar boshlangʻich tayyorgarlik fani oʻqituvchisi mahorati, malakasi, bilimiga bogʻliq.

Tumanimizdagi 69-sonli maktabning chaqiriqqa qadar boshlangʻich tayyorgarlik fani oʻqituvchisi Ikrom Gulimmetov zimmasidagi masʼuliyatli vazifasini sidqidildan ado etishga intilayotgan muallimlardan biri.

U 1994-yilda Buxoro davlat pedagogika institutining boshlangʻich harbiy taʼlim va jismoniy tarbiya fakultetini tugatib, faoliyatini 35-sonli maktabda chaqiriqqa qadar boshlangʻich tayyorgarlik fani oʻqituvchisi boʻlib ishlashdan boshladi. Keyinchalik Ayoqchi mahalla fuqarolar yigʻinida kotib boʻldi, 2020-yildan beri esa 69-sonli maktabda oʻqituvchi boʻlib ishlab kelayotir. Ushbu taʼlim muassasasida hozirgi kunda 725 nafar oʻquvchilar taʼlim-tarbiya olishayapti. 10-11-sinflarda oʻqiyotgan 5ta sinf oʻquvchilari chaqiriqqa qadar boshlangʻich tayyorgarlik faniga qamrab olingan. Ikrom Gulimbetov ularga haftasiga 2 soat ushbu fandan saboq beradi.

Tajribali oʻqituvchi oʻquvchilarning mashgʻulotlar davomida oʻzlashtirgan bilimlarini, koʻnikma va mahoratlarini turli harbiy  va sport musobaqalari oʻtkazish, muassasada turli sanalar munosabati bilan oʻtkaziladigan tadbirlardagi chiqishlari davomida mustahkamlab boradi. U oʻgʻil bolalar uchun chaqiriqqa qadar boshlangʻich tayyorgarlik, oʻgʻil bolalar va qizlar bilan birgalikda fuqaro muhofazasiga doir, faqat qizlar bilan esa tibbiy bilim asoslari boʻyicha mashgʻulotlarni puxta tayyorgarlik bilan oʻtkazadi va oʻquvchilarning diqqat-eʼtiborini oʻz mashgʻulotlariga qarata oladi.

– Askar boʻlishni, harbiy kiyimda magʻrur yurishni orzu qilmaydigan bola boʻlmasa kerak, – deydi u. – Bu orzuligicha qolib ketmasligi, oʻquvchilarimning muddatli harbiy xizmatga qabul qilinishi uchun jismoniy va maʼnan yetuk boʻlib voyaga yetishlariga intilaman. Ularga qurol-aslahalarni ishlatish, jang taktikalari, safda yurish qoidalarini erinmay oʻrgataman.

Ha, u oʻquvchilarining yurtimizning haqiqiy oʻgʻlonlari boʻlib voyaga yetishlari uchun intiladi. Shu maqsadda oʻquvchilarini har yili Oʻzbekiston Respublikasi Mudofaa Vazirligi tasarrufidagi Shimoli-Gʻarbiy harbiy okrugga qarashli poligonga olib borib, dala-oʻquv mashgʻulotlari davomida harbiy texnikalar bilan puxta tanishtiradi. Nishonni oʻqqa tutish mashqida oʻquvchilar oʻzlariga berilgan uchta imkoniyatda ham yaxshi natija koʻrsatganlarida mehnatlari zoye ketmayotganiga quvonadi. Ularni muddatli harbiy xizmatga, Oliy harbiy taʼlim muassasalariga oʻqishga kirib, harbiy soha mutaxassislari boʻlib yetishishga qiziqtira olayotganiga koʻngli togʻday koʻtariladi. Oʻquvchilari qalbida yurtimizga sodiqlik, harbiy xizmatga hurmat, mardlik, jasurlik, Vatan himoyasi uchun shay turish fazilatlarini shakllantira olish – aslida uning asosiy maqsadidir. Boisi, er yigitlar – yurt qalqonlaridir.

Oygul RAJABOVA.