Muddatli harbiy xizmatni tugatgan yigitlar tantanali kutib olindi

Harbiy xizmat – yosh yigitlarning irodasini toblaydigan, masʼuliyat va intizomini oshiradigan, ularni mardlik va jasorat sinovidan oʻtkazadigan hayot maktabidir. Harbiy libos kiyib, Vatan himoyasiga bel bogʻlash – faqat burch emas, balki yuksak sharaf hamdir. Vatan sarhadlarida harbiy xizmatni oʻtagan yigitlar nafaqat yurt himoyachilari sifatida tarbiya topadi, balki mustahkam iroda, qatʼiyat va sadoqat tamoyillarini oʻz hayot tarziga aylantiradi.

Shu maʼnoda, Prezidentimizning 2025-yil 29-yanvarda qabul qilingan “Oʻzbekiston Respublikasi fuqarolarining muddatli harbiy xizmatga navbatdagi chaqiruvi hamda xizmat muddatini oʻtab boʻlgan harbiy xizmatchilarni Qurolli Kuchlar rezerviga boʻshatish toʻgʻrisida”gi Qarori bilan yurtimiz boʻylab bir qator tadbirlar tashkil etilmoqda. Yaqinda Amudaryo tuman Mudofaa ishlari boʻlimi binosida ham harbiy xizmatni sharaf bilan ado etib qaytgan yigitlarni tantanali kutib olish marosimi boʻlib oʻtdi.

Tadbirda tuman Mudofaa ishlari boʻlimi boshligʻi, mayor Shuhrat Mamatov hamda masʼullar ishtirok etishdi. Shuhrat Mamatov xizmatni sharaf bilan tugatgan yigitlarni samimiy tabriklab, harbiy xizmat orqali orttirilgan bilim va tajriba ularning kelajagiga mustahkam poydevor boʻlishini taʼkidladi.

Yigitlar oʻz soʻzlarida muddatli harbiy xizmat davomida oʻrgangan bilimlari, hayotiy tajribalari, harbiy intizom va jismoniy tayyorgarlikning ahamiyati haqida gapirib, ular uchun yaratilgan sharoitlar uchun minnatdorlik bildirishdi.

Harbiy xizmatni oʻtab qaytgan yigitlarning ota-onalari ham tadbirda ishtirok etib, oʻz farzandlari bilan faxrlanishlarini, ular qatʼiyatli, vatanparvar, irodali va tartibli yoshlar sifatida uylariga qaytganidan mamnun ekanliklarini taʼkidlab, davlat tomonidan harbiy xizmatchilar uchun yaratilgan sharoitlar uchun minnatdorchilik bildirishdi.

Prezident qaroriga muvofiq 2025-yil mart-aprel oylarida Oʻzbekiston Respublikasining chaqiruv yoshidagi fuqarolari navbatdagi muddatli harbiy xizmatga chaqiriladi. Harbiy xizmatga yaroqli, shu jumladan, cheklovlar bilan yaroqli boʻlgan, biroq ushbu chaqiruv davrida Qurolli Kuchlar safiga chaqirilmaydigan yoshlar esa safarbarlik chaqiruvi rezervi xizmatiga olinadi.

Shuningdek, Qoraqalpogʻiston Respublikasi Vazirlar Kengashi, viloyatlar va Toshkent shahri hokimliklari belgilangan tartibda harbiy xizmatga chaqirilgan yigitlarning oʻz vaqtida hozir boʻlishlarini taʼminlash hamda ularni tantanali kuzatish va xizmatni oʻtab qaytganlarni munosib kutib olish tadbirlarini yuqori saviyada tashkil etishga masʼul hisoblanadi.

Harbiy xizmat – jasur va sadoqatli yigitlarni tarbiyalaydigan oliy maktabdir. Vatan himoyasi – muqaddas burch. Bu burchni sharaf bilan ado etayotgan barcha harbiy xizmatchilarimizga chuqur minnatdorchilik bildiramiz!

Shohzod Qurbonboyev.