“Rahbar va yoshlar” uchrashuvida amudaryolik yigit-qizlarning muammolariga yechim izlandi

Mamlakatimizda yoshlar masalalari davlat siyosati darajasiga koʻtarilgan boʻlib, ularning huquqlari, manfaatlari va tashabbuslarini qoʻllab-quvvatlash yoʻlida keng koʻlamli ishlar amalga oshirilmoqda. Xususan, kelajagimiz egalarining taʼlim olishi, tadbirkorlik bilan shugʻullanishi, kasb-hunar oʻrganishi va ularning ijtimoiy faolligini oshirish uchun yaratilayotgan imkoniyatlar yoshlarning barcha sohalardagi faol ishtirokiga keng yoʻl ochmoqda. Shu maqsadda tashkil etilgan “Rahbar va yoshlar” uchrashuvi yoshlar bilan bevosita muloqot qilish, ularning muammolari va takliflarini oʻrganish, shuningdek, yangi tashabbuslarni qoʻllab-quvvatlash uchun muhim platforma boʻlib xizmat qilyapti.

22-yanvar kuni Amudaryo tuman Madaniyat boʻlimi binosida ham Yoshlar ishlari agentligi tuman boʻlimi tashabbusi bilan shunday uchrashuv tashkil qilindi. Uchrashuv yoshlarning murojaatlarini qabul qilish, shuningdek, 2025-yilda yoshlar siyosati sohasida amalga oshiriladigan chora-tadbirlarni ishlab chiqish uchun ularning takliflarini oʻrganish maqsadida tashkil qilindi.

Tadbirda Amudaryo tumani hokimining yoshlar siyosati, ijtimoiy rivojlantirish va maʼnaviy-maʼrifiy ishlar boʻyicha oʻrinbosari Nodirbek Kamolov, Oʻzbekiston Yoshlar ishlari agentligining mahalladagi yoshlar yetakchilari faoliyatini muvofiqlashtirish va metodologik taʼminlash boʻlimi bosh mutaxassisi Shahzod Qayumov, agentlikning Qoraqalpogʻiston boʻlimi bosh mutaxassisi Anvar Maratov, Yoshlar ishlari agentligi tuman boʻlimi boshligʻi Bekzod Oʻrinboyev, ovul va mahallalardagi yoshlar yetakchilari hamda tumanning barcha ovul va mahallalaridan yoshlar ishtirok etdilar.

Muloqot davomida tuman hokimining oʻrinbosari Nodirbek Kamolov soʻzga chiqib, tumanimizda yoshlar uchun yaratilayotgan keng imkoniyatlar va davlat siyosatining yoshlarni har tomonlama qoʻllab-quvvatlashdagi ahamiyati haqida soʻz yuritdi. Hokim oʻrinbosari har bir rahbar yoshlar muammolariga yechim topishga masʼul ekanligini taʼkidlab, bu kabi muloqotlar yoshlarning tashabbuslarini roʻyobga chiqarishga zamin yaratishini qayd etdi.

Tadbir davomida yoshlar oʻz muammolari va takliflari bilan masʼullarga murojaat qilishdi. Murojaatlar asosan yosh tadbirkorlarni qoʻllab-quvvatlash, biznes uchun yer hamda imtiyozli kreditlar ajratish masalalarida boʻldi.

Shuningdek, tumanda xizmat koʻrsatish sohasini rivojlantirish maqsadida Call Center loyihasini amalga oshirish taklifi ilgari surildi. Bu orqali turli xizmat koʻrsatuvchi xodimlarni bir tizimga jamlash va aholiga qulay xizmat koʻrsatish imkoniyatini yaratish koʻzda tutilgan.

Infratuzilmani yaxshilash boʻyicha ham bir qator takliflar berildi. Xususan, Ayoqchi mahallasidagi sanoat inshootlarini xususiylashtirish va taʼmirlash orqali yangi ish oʻrinlarini yaratish, shuningdek, 63-sonli maktabga sport zal qurib, yoshlarning boʻsh vaqtlarini mazmunli oʻtkazishi uchun sharoit yaratish kabi takliflar ilgani surildi.

Bundan tashqari, IT sohasini rivojlantirish maqsadida malakali mutaxassislarni jalb qilish, Oʻzbekistondagi IT parklari bilan hamkorlik oʻrnatish va yangi startap loyihalarini amalga oshirish takliflari bildirildi. Bu takliflar yoshlarning IT sohasiga qiziqishini kuchaytirishga xizmat qilishi taʼkidlandi.

Shuningdek, tadbir davomida masʼullar yoshlar tomonidan bildirilgan har bir masala va taklifni oʻrganilib, ularni amaliyotga joriy etish uchun zarur choralar koʻrilishini maʼlum qilishdi. Mazkur loyiha va tashabbuslarning amalga oshirilishi tumandagi ijtimoiy-iqtisodiy rivojlanishga katta hissa qoʻshishi alohida qayd qilindi. Qolaversa, munosib takliflar bilan chiqqan yoshlar ragʻbatlantirilib, qoʻllab-quvvatlanishi taʼkidlandi.

Bundan tashqari, shu kuni tadbir doirasida tuman Kambagʻallikni qisqartirish va bandlik boʻlimi tomonidan boʻsh ish oʻrinlari mehnat yarmarkasi ham tashkil etildi. Mehnat yarmarkasida yoshlar turli soha va kasblardagi boʻsh ish oʻrinlari bilan tanishish imkoniyatiga ega boʻlishdi. Shuningdek, tuman Adliya boʻlimi yoshlarning huquqiy masalalarini oʻrganish va ularga huquqiy maslahatlar berish maqsadida uchrashuv oʻtkazdi.

Shubhasiz, bu kabi muloqotlar kelgusida yoshlarning ijtimoiy va iqtisodiy faolligini yanada oshirishga xizmat qiladi.

Shohzod Qurbonboyev