ЮРИДИК ХИЗМАТ КЎРСАТИШ СИФАТИ ЯХШИЛАНМОҚДА

Юртимизда Адлия вазирлиги тизимида Юридик хизмат кўрсатиш марказлари фаолиятининг йўлга қўйилиши ўзининг ижобий самарасини кўрсатмоқда. Айниқса, юридик хизмат кўрсатиладиган давлат идораларининг марказларга юбориладиган ҳужжатлари лойиҳаларини ҳуқуқий экспертизадан ўтказиш ва қабул қилиш жараёнларини электрон шаклга ўтказувчи “E-huquqshunos” электрон тизими яратилгани, иш юритуви тўлиқ рақамлаштирилиб, қоғозбозликка барҳам берилгани янада аҳамиятли бўлмоқда.

Амударё туманидаги Адлия бўлимининг Юридик хизмат кўрсатиш маркази қонунлар ижроси, ҳуқуқни қўллаш амалиётининг самарадорлиги, шубҳасиз, давлат ҳокимияти ва бошқаруви органлари томонидан тайёрланадиган норматив-ҳуқуқий ҳужжатлар, лойиҳаларнинг сифатига баҳо берадиган ягона тузилма сифатида танилишга улгурди.

Жорий йилнинг 10 ойи давомида Марказ томонидан марказлашган тизим орқали Ўзбекистон Республикаси Президентининг “Давлат органлари ва ташкилотларида юридик хизмат кўрсатиш фаолиятини янада такомиллаштириш чора-тадбирлари тўғрисида”ги Қарорига асосан тумандаги мавжуд 154та давлат органлари ва ташкилотларига сифатли ҳамда малакали юридик хизмат кўрсатилди.

Ўтган давр мобайнида Марказга «E-huquqshunos» электрон тизими орқали давлат органлари ва ташкилотлари томонидан келиб тушган 62746та ҳуқуқий ҳужжатлар ўрганиб чиқилди. Шундан 62425тасининг ижроси таъминланган бўлса, 59482тасига ижобий хулосалар берилган. Қолган 1788таси қонун ҳужжатларига мувофиқ ишлаб чиқилмагани сабабли қайта кўриб чиқиш учун рад жавоби берилиб, ташкилотларга қайтарилган. Шунингдек, 1155та ҳужжатларга ҳам қонунчиликка номувофиқлиги сабабли салбий хулосалар берилган, 59165та ҳуқуқий ҳужжатлар эса қонуний тартибга мувофиқлиги юзасидан берилган ижобий хулосалар асосида ташкилотлар томонидан имзоланган.

Бундан ташқари, Марказ томонидан давлат ташкилотларининг мулкий ҳамда бошқа ҳуқуқлари, қонуний манфаатларини ўз вақтида, ҳар томонлама ва самарали ҳимоя қилиш бўйича 131та талабнома, судларга эса 7та даъво аризалари киритилган. Киритилган даво аризалари юзасидан жами 1 млрд. 66 млн. сўмдан зиёд миқдордаги пуллар ташкилот фойдасига ундирилган.   

Мазкур ташкилот меҳнат тўғрисидаги қонунчиликка риоя этилишини таъминлашда ҳамда юридик ёрдам кўрсатиш борасида муҳим аҳамиятга эга тузилмага айланиб, юридик хизмат сифати янада яхшиланишини, шу билан бирга ривожланишини таъминламоқда. 

Озода Худойберганова.