ВОЯГА ЕТМАГАНЛАР ДОИМИЙ ЭЪТИБОРДА

Ўзбекистон Республикаси Президентининг “Ички ишлар органларининг жамоат хавфсизлигини таъминлаш ва жиноятчиликка қарши курашиш соҳасидаги фаолиятини янада такомиллаштириш бўйича қўшимча ташкилий чора-тадбирлар тўғрисида”ги Қарорига асосан туман, шаҳар ички ишлар органлари таркибида вояга етмаганлар масалалари бўйича шуғулланувчи инспектор-психолог лавозимлари жорий этилиб, уларнинг хизмат ўташ жойи этиб умумий ўрта таълим муассасалари белгиланган эди.

            Қарорга мувофиқ туман Ички ишлар бўлимида ҳам Жамоат хавфсизлиги хизмати ҳуқуқбузарликлар профилактикаси бўлинмасида вояга етмаганлар масалалари билан шуғулланувчи 10 нафар инспектор-психологлар фаолият бошлашди. Улар туманимиз ҳудудида ёшларнинг бўш вақтларини мазмунли ташкил этиш, миллий халқ ўйинлари  ва спорт  турларини ёшлар орасида оммалаштириш, “Беш муҳим ташаббус” лойиҳалари, ёшлар фестиваллари ва бошқа маданий-маърифий тадбирларни амалга ошириш бўйича овул ва маҳалла ёшлар етакчилари билан кенг қамровли ишлар олиб боришаяпти. Ўқув масканларида вояга етмаганларнинг ҳуқуқ ва қонуний манфаатларини ҳимоя қилиш, улар ўртасида ҳуқуқбузарликларга қарши курашиш, ватанпарварликни тарғиб этиш, оммавий маданият таъсирига тушишининг олдини олиш борасида мунтазам равишда давра суҳбатлари, профилактик тадбирлар ўтказиб келишаяпти.

Туманимизда вояга етмаганлар  72 662 нафарни ташкил этади. Мавжуд умумий ўрта таълим муассасаларида ҳозирги кунда 38412 нафар ўқувчилар, 51та мактабгача таълим муассасаларида 10312 нафар жажжи болажонлар таълим-тарбия олишаяпти. Улар орасида дарсларни пухта ўзлаштириб, интеллектуал қобилиятини намойиш этиб, билимлар синовларида, шунингдек, турли ижодий танловларда, спорт мусобақаларида юқори натижаларни қайд этаётганлари талайгина.

Мактабгача таълим, мактаб таълими муассасаларида уларга яратилаётган шароитлар ҳам ҳавас қилишга арзигулик. Бироқ боланинг дунёқараши энг аввало оилада шаклланишини ҳисобга олсак, фарзанд камолида ота-она тарбияси нечоғлик муҳим эканлиги аён бўлади. Таассуфки, аҳоли орасида ичкиликка ружу қўйган ё хулқ-атвори билан ўз фарзанди тарбиясига салбий таъсир кўрсатувчи шахслар ҳам учраб туради. Фарзандини мунтазам назорат қилмайдиган, уларнинг нима билан машғул эканлигига қизиқмайдиган, таълим олишига бепарво ота-оналар ҳам бор. Инспектор-психологлар улар билан манзилли иш олиб боришаяпти ва бола тарбиясидаги масъулиятини тушунтиришаяпти.

Вояга етмаганлар орасида инспектор-психологлар ҳудудлар профилактика инспекторлари, фуқаролар йиғинлари “бешлиги” ва таълим муассасалари ходимлари билан ҳамкорликда таълим-тарбия борасида мунтазам иш олиб боришаётганлигига қарамасдан 2023 йилнинг 10 ойи давомида вояга етмаганлар томонидан 7та жиноят содир этилди, икки нафар вояга етмаганлар ўз жонига қасд қилиб, вафот этди.

Вояга етмаган ўғил-қизларнинг интилувчан, илмли  ва мустақил ҳаётга мослаша оладиган интеллектуал салоҳиятли бўлиб улғайишлари йўлида меҳнат қилаётган инспектор-психологлар орасида лейтенант Ҳусниддин Сафарбоевнинг фаолияти, айниқса, самарали бўлаётир. У махсус гуруҳ сафида вояга етмаганларнинг назоратсиз ва қаровсиз қолишининг олдини олиш мақсадида ўтказилаётган “Тунги рейд”, “Ўқувчи”, “Давомат”, “Тиғ” профилактик тадбирларида фаол қатнашиб, уларнинг бемақсад юришларининг олди олинишига ҳисса қўшаяпти.

Вояга етмаганлар масалалари билан шуғулланувчи инспектор-психологлар Улуғбек Йўлдошев бошчилигида профилактика инспекторлари ва ҳамкор ташкилотлар билан бирга туманимиз оилаларидаги ўғил-қизларнинг оқил, юртига содиқ, ўз Ватанининг қонун-қоидаларини ҳурмат қиладиган, баркамол инсонлар бўлиб шаклланишига, уларнинг қонуний ҳуқуқ ва манфаатлари ҳимоя қилинишига хизмат қилмоқдалар.      

Ойгул РАЖАБОВА.

Суратда: Ҳусниддин Сафарбоев ўқувчилар билан

китоб мутолааси хусусида суҳбатлашмоқда.