“ДОЛЗАРБ 40 КУНЛИК” КЕНГ КЎЛАМЛИ ПРОФИЛАКТИК ТАДБИРЛАРИ ЎТКАЗИЛМОҚДА

Ўзбекистон Республикаси Ички ишлар вазирининг тегишли буйруғига кўра Республика миқёсида жорий йилнинг 20 ноябрь кунидан 30 декабрь кунига қадар корхона-ташкилотлар, жамоат уюшмалари ва таълим муассасалари билан ҳамкорликда “Долзарб 40 кунлик” кенг кўламли профилактик тадбирини ўтказиш белгиланган бўлиб, шунга кўра барча ҳудудларда назорат ва рейд тадбирлари ташкил этилмоқда. 

Амударё тумани ҳудудида ҳам шунга мувофиқ жиноятчилик ва ҳуқуқбузарликларнинг барвақт олдини олиш мақсадида “Долзарб 40 кунлик” махсус профилактик тадбири ўтказилмоқда. Тадбир доирасида  туманда криминоген вазият барқарорлигини таъминлаш, ҳуқуқбузарлик ва жиноятларнинг олдини олиш асосий мақсад қилинган бўлиб, тегишли чора-тадбирлар белгилаб олинган. 

Жорий йилнинг 27 ноябрь куни туман Ички ишлар бўлими томонидан навбатдаги махсус профилактик тадбир ўтказилди ҳамда жиноятчилик, ҳуқуқбузарликларнинг олдини олиш бўйича тунги хизматга жалб қилинган ходимларга жамоат тартибини сақлаш, ҳуқуқбузарликлар, айниқса, тунги вақтда содир этилиши мумкин бўлган жиноятларнинг олдини олиш борасида амалга оширилиши лозим бўлган ишлар юзасидан йўриқнома берилиб, хизматга чиқарилди.  Шунингдек, “Долзарб 40 кунлик” махсус профилактик тадбирини ўтказишдан мақсад – фуқаролар хавфсизлиги ва жамоат тартибини сақлаш, ҳуқуқбузарлик ва жиноятчиликнинг барвақт олдини олиш эканлиги таъкидлаб ўтилди. Тунги хизматга жалб қилинган ходимларга жамоат жойлари, умумий овқатланиш, маиший хизмат кўрсатиш шохобчаларини кўздан кечириш, ичкиликбозлар, муқаддам судланганлар, пробация ҳисобида турганлар, профилактик ҳисобга олинганлар билан суҳбатлар ўтказиш, ҳуқуқбузарлик ва жиноятларни аниқлаш бўйича топшириқлар берилди.

Тадбир бошида тунги вақтларда бемақсад юрган фуқаролар билан профилактик суҳбат ўтказилди ва уларнинг шахсига ойдинлик киритилди. Жамоат тартибини бузган фуқаролар туман Ички ишлар бўлимига олиб келинди ва уларнинг шахси аниқланиб, тезкор-профилактик суҳбатлар ўтказилди. Улар ҳуқуқбузарлик ва жиноят содир этмасликлари тўғрисида расман огоҳлантирилди. Ундан ташқари, умумий овқатланиш шохобчалари, тумандаги истироҳат боғи, корхона-ташкилотлар, савдо ва маиший хизмат кўрсатиш объектлари текширилди. Тунги вақтларда ишлаётган турли объектларда фаолият олиб бораётган шахслар билан ҳам профилактик суҳбатлар ўтказилди.

Рейд тадбирида 17 нафар фуқаронинг спиртли ичимлик таъсирида жамоат жойида юрганлиги аниқланиб, ҳушёрхонага топширилди. Тунги вақт бўлишига қарамасдан бемақсад кўчада юрган 5 нафар вояга етмаганлар, уларнинг ота-оналари чақиртирилди ва бундай ҳолатни қайта такрорламаслик тушунтирилиб, огоҳлантирилди. Шунингдек, жамоат тартибини бузиб ҳуқуқбузарлик содир этган шахсларга нисбатан маъмурий баённомалар расмийлаштирилди.

Туман ҳудудида бўлиб ўтаётган бу каби рейдлар, “Долзарб 40 кунлик” кенг кўламли профилактик тадбирлари давомида тарғибот-ташвиқот ишлари олиб борилиб, фуқароларга жамоат жойларида белгиланган тартиб-қоидаларга қатъий риоя қилишлари лозимлиги тушунтирилмоқда. Шунингдек, тунги вақтда бемақсад юрган ёшларга ҳам ҳар қандай ҳуқуқбузарлик ва жиноят учун қонуний жазо муқаррарлиги тушунтирилиб, белгиланган жазо чоралари, қонунлар ҳақида батафсил маълумотлар берилмоқда. 

Инобат Ўрозматова, туман ИИБ ходими.