“DOLZARB 40 KUNLIK” KENG KOʻLAMLI PROFILAKTIK TADBIRLARI OʻTKAZILMOQDA

Oʻzbekiston Respublikasi Ichki ishlar vazirining tegishli buyrugʻiga koʻra Respublika miqyosida joriy yilning 20-noyabr kunidan 30-dekabr kuniga qadar korxona-tashkilotlar, jamoat uyushmalari va taʼlim muassasalari bilan hamkorlikda “Dolzarb 40 kunlik” keng koʻlamli profilaktik tadbirini oʻtkazish belgilangan boʻlib, shunga koʻra barcha hududlarda nazorat va reyd tadbirlari tashkil etilmoqda. 

Amudaryo tumani hududida ham shunga muvofiq jinoyatchilik va huquqbuzarliklarning barvaqt oldini olish maqsadida “Dolzarb 40 kunlik” maxsus profilaktik tadbiri oʻtkazilmoqda. Tadbir doirasida  tumanda kriminogen vaziyat barqarorligini taʼminlash, huquqbuzarlik va jinoyatlarning oldini olish asosiy maqsad qilingan boʻlib, tegishli chora-tadbirlar belgilab olingan. 

Joriy yilning 27-noyabr kuni tuman Ichki ishlar boʻlimi tomonidan navbatdagi maxsus profilaktik tadbir oʻtkazildi hamda jinoyatchilik, huquqbuzarliklarning oldini olish boʻyicha tungi xizmatga jalb qilingan xodimlarga jamoat tartibini saqlash, huquqbuzarliklar, ayniqsa, tungi vaqtda sodir etilishi mumkin boʻlgan jinoyatlarning oldini olish borasida amalga oshirilishi lozim boʻlgan ishlar yuzasidan yoʻriqnoma berilib, xizmatga chiqarildi.  Shuningdek, “Dolzarb 40 kunlik” maxsus profilaktik tadbirini oʻtkazishdan maqsad – fuqarolar xavfsizligi va jamoat tartibini saqlash, huquqbuzarlik va jinoyatchilikning barvaqt oldini olish ekanligi taʼkidlab oʻtildi. Tungi xizmatga jalb qilingan xodimlarga jamoat joylari, umumiy ovqatlanish, maishiy xizmat koʻrsatish shoxobchalarini koʻzdan kechirish, ichkilikbozlar, muqaddam sudlanganlar, probatsiya hisobida turganlar, profilaktik hisobga olinganlar bilan suhbatlar oʻtkazish, huquqbuzarlik va jinoyatlarni aniqlash boʻyicha topshiriqlar berildi.

Tadbir boshida tungi vaqtlarda bemaqsad yurgan fuqarolar bilan profilaktik suhbat oʻtkazildi va ularning shaxsiga oydinlik kiritildi. Jamoat tartibini buzgan fuqarolar tuman Ichki ishlar boʻlimiga olib kelindi va ularning shaxsi aniqlanib, tezkor-profilaktik suhbatlar oʻtkazildi. Ular huquqbuzarlik va jinoyat sodir etmasliklari toʻgʻrisida rasman ogohlantirildi. Undan tashqari, umumiy ovqatlanish shoxobchalari, tumandagi istirohat bogʻi, korxona-tashkilotlar, savdo va maishiy xizmat koʻrsatish obʼektlari tekshirildi. Tungi vaqtlarda ishlayotgan turli obʼektlarda faoliyat olib borayotgan shaxslar bilan ham profilaktik suhbatlar oʻtkazildi.

Reyd tadbirida 17 nafar fuqaroning spirtli ichimlik taʼsirida jamoat joyida yurganligi aniqlanib, hushyorxonaga topshirildi. Tungi vaqt boʻlishiga qaramasdan bemaqsad koʻchada yurgan 5 nafar voyaga yetmaganlar, ularning ota-onalari chaqirtirildi va bunday holatni qayta takrorlamaslik tushuntirilib, ogohlantirildi. Shuningdek, jamoat tartibini buzib huquqbuzarlik sodir etgan shaxslarga nisbatan maʼmuriy bayonnomalar rasmiylashtirildi.

Tuman hududida boʻlib oʻtayotgan bu kabi reydlar, “Dolzarb 40 kunlik” keng koʻlamli profilaktik tadbirlari davomida targʻibot-tashviqot ishlari olib borilib, fuqarolarga jamoat joylarida belgilangan tartib-qoidalarga qatʼiy rioya qilishlari lozimligi tushuntirilmoqda. Shuningdek, tungi vaqtda bemaqsad yurgan yoshlarga ham har qanday huquqbuzarlik va jinoyat uchun qonuniy jazo muqarrarligi tushuntirilib, belgilangan jazo choralari, qonunlar haqida batafsil maʼlumotlar berilmoqda. 

Inobat Oʻrozmatova, tuman IIB xodimi.