ФАРЗАНД КАМОЛИ — ОТА-ОНАНИНГ БАХТИ

Тарбия энг аввало оиладан бошланади. Агар оилалардаги маънавий муҳит соғлом бўлса, фарзандлар ҳам келажакда соғлом фикрлай оладиган, жамиятимизга керакли комил инсонлар бўлиб вояга етишади. Оила муҳити носоғлом бўлса, бундай оилаларда тарбияланаётган фарзандлар ҳам жамиятимизга ҳеч қандай фойдаси тегмайдиган, ҳатто ота-оналарининг ҳам айтганини қилмайдиган тарбиясиз инсонлар бўлиб қоладилар. Демак, биз фарзанд тарбияси учун ҳар лаҳзада масъул эканлигимизни унутмаслигимиз керак.

Лекин мактабларда ўтказилаётган ота-оналар йиғилишига вақт топиб бормай қолаётган ота-оналар ҳам борки, улар ўзлари билмаган ҳолда фарзандлари тарбиясидан узоқлашиб кетаётганларини сезмайдилар. Ваҳоланки, бизнинг мамлакатимизда ёш авлод тарбиясига жуда катта эътибор қаратилган. Бепул умумий ўрта махсус таълим олиш ва балоғат ёшига етган коллеж ва лицей битирувчиларининг ўз бизнесини ташкил этишлари учун зарур ҳуқуқий асослар яратилган. Айниқса, ёшларнинг бирор тадбиркорлик тури билан шуғулланишлари учун давлатимиз томонидан имтиёзли кредитлар ажратилаётгани янада қувонарли.

2014 йилнинг октябрь ойида маҳалламизда яшовчи ёшлардан бир гуруҳи турли хил тадбиркорлик субъектларига ишга жойлашишди. Хусусан, Замира Жуматова, Севара Собирова, Гулнора Қурбонбоевалар ишли бўлганларидан хурсанд. Маҳалламизда маслаҳат маркази ташкил қилинган бўлиб, ҳар шанба куни соат 9 дан 12 гача ишлайди. Маслаҳат маркази аъзоси, бандликка кўмаклашиш маркази нозири Қ.Саидова келиб фуқароларни қизиқтирган саволларга жавоб беради. Ҳар ой бошида қаерда бўш иш ўрни борлиги тўғрисида маълумотлар бериб борилаётгани боис, маҳалламиз ёшларининг бандлиги кун сайин ошиб бормоқда.

Афсуски, баъзи ота-оналар пул топиш мақсадида чет элларга ишлаш учун кетиб, фарзандларини қаровсиз қолдиришади. Келганидан кейин бетартиб ўсаётган фарзандларини кўриб қийин аҳволда қолган ва оиласидан жудо бўлган аёллар ҳам борлиги сир эмас.

Халқимизда бир мақол бор: "Нимани эксанг, шуни ўрасан”. Ёш ниҳолни албатта яхшилаб парваришлаш керак. Фарзанд ҳам ниҳол. У парваришга муҳтож. Ўз вақтида назорат қилмасак, меҳр бермасак, ниҳол ё нимжон бўлиб қолади ё ривожланишдан тўхтайди.

Демак, ота-она мажбуриятлари ичида энг муҳими бурч масъулиятидир. Ана шу ота-оналик бурчини ҳар лаҳзада ҳис этиб яшашимиз, фарзандларимизнинг жамиятда ўз ўрнини топишларида сабр ва бардош ила уларни тарбия қилмоғимиз керак.

Маҳалламизда фарзандларини ўқитиб, яхши тарбия бериб, вояга етказаётган ота-оналар жуда кўп. Ж.Эримбетов, Б.Халиллаева, Р.Абдуллаева, Б.Ибрагимов, Б.Жумамуродов, Т.Рахматуллаев, О.Мадаминов, А.Оллоёров, Г.Отажоноваларнинг оилаларида тарбия топиб, эл-юртга қўшилаётган фарзандларнинг барчаси ҳавасга, эътиборга муносиб. Чунки бу оилаларда улғайган фарзандлар ўз илми, ақл-заковати ва инсоний фазилатлари билан болалигиданоқ маҳалладошлари ҳурматига сазовор бўлиб улгуришган. Шу баробарида улар эл-юрт хизматига ҳамиша камарбаста, фидойи ва меҳнаткаш, камтарин ёшлардир. Жамиятимиз эса ана шундай ёшлар билан обод ва фаровон бўлиб бораверади.

Гулбаҳор ЎРОЗОҚОВА,

"Чордара” МФЙ

диний маърифат ва маънавий-ахлоқий тарбия

масалалари бўйича маслаҳатчиси.

(Фото - http://xs.uz)