FARZAND KAMOLI — OTA-ONANING BAXTI
Tarbiya eng avvalo oiladan boshlanadi. Agar oilalardagi maʼnaviy muhit sogʻlom boʻlsa, farzandlar ham kelajakda sogʻlom fikrlay oladigan, jamiyatimizga kerakli komil insonlar boʻlib voyaga yetishadi. Oila muhiti nosogʻlom boʻlsa, bunday oilalarda tarbiyalanayotgan farzandlar ham jamiyatimizga hech qanday foydasi tegmaydigan, hatto ota-onalarining ham aytganini qilmaydigan tarbiyasiz insonlar boʻlib qoladilar. Demak, biz farzand tarbiyasi uchun har lahzada masʼul ekanligimizni unutmasligimiz kerak.
Lekin maktablarda oʻtkazilayotgan ota-onalar yigʻilishiga vaqt topib bormay qolayotgan ota-onalar ham borki, ular oʻzlari bilmagan holda farzandlari tarbiyasidan uzoqlashib ketayotganlarini sezmaydilar. Vaholanki, bizning mamlakatimizda yosh avlod tarbiyasiga juda katta eʼtibor qaratilgan. Bepul umumiy oʻrta maxsus taʼlim olish va balogʻat yoshiga yetgan kollej va litsey bitiruvchilarining oʻz biznesini tashkil etishlari uchun zarur huquqiy asoslar yaratilgan. Ayniqsa, yoshlarning biror tadbirkorlik turi bilan shugʻullanishlari uchun davlatimiz tomonidan imtiyozli kreditlar ajratilayotgani yanada quvonarli.
2014-yilning oktyabr oyida mahallamizda yashovchi yoshlardan bir guruhi turli xil tadbirkorlik subʼektlariga ishga joylashishdi. Xususan, Zamira Jumatova, Sevara Sobirova, Gulnora Qurbonboyevalar ishli boʻlganlaridan xursand. Mahallamizda maslahat markazi tashkil qilingan boʻlib, har shanba kuni soat 9 dan 12 gacha ishlaydi. Maslahat markazi aʼzosi, bandlikka koʻmaklashish markazi noziri Q.Saidova kelib fuqarolarni qiziqtirgan savollarga javob beradi. Har oy boshida qayerda boʻsh ish oʻrni borligi toʻgʻrisida maʼlumotlar berib borilayotgani bois, mahallamiz yoshlarining bandligi kun sayin oshib bormoqda.
Afsuski, baʼzi ota-onalar pul topish maqsadida chet ellarga ishlash uchun ketib, farzandlarini qarovsiz qoldirishadi. Kelganidan keyin betartib oʻsayotgan farzandlarini koʻrib qiyin ahvolda qolgan va oilasidan judo boʻlgan ayollar ham borligi sir emas.
Xalqimizda bir maqol bor: "Nimani eksang, shuni oʻrasan”. Yosh niholni albatta yaxshilab parvarishlash kerak. Farzand ham nihol. U parvarishga muhtoj. Oʻz vaqtida nazorat qilmasak, mehr bermasak, nihol yo nimjon boʻlib qoladi yo rivojlanishdan toʻxtaydi.
Demak, ota-ona majburiyatlari ichida eng muhimi burch masʼuliyatidir. Ana shu ota-onalik burchini har lahzada his etib yashashimiz, farzandlarimizning jamiyatda oʻz oʻrnini topishlarida sabr va bardosh ila ularni tarbiya qilmogʻimiz kerak.
Mahallamizda farzandlarini oʻqitib, yaxshi tarbiya berib, voyaga yetkazayotgan ota-onalar juda koʻp. J.Erimbetov, B.Xalillayeva, R.Abdullayeva, B.Ibragimov, B.Jumamurodov, T.Raxmatullayev, O.Madaminov, A.Olloyorov, G.Otajonovalarning oilalarida tarbiya topib, el-yurtga qoʻshilayotgan farzandlarning barchasi havasga, eʼtiborga munosib. Chunki bu oilalarda ulgʻaygan farzandlar oʻz ilmi, aql-zakovati va insoniy fazilatlari bilan bolaligidanoq mahalladoshlari hurmatiga sazovor boʻlib ulgurishgan. Shu barobarida ular el-yurt xizmatiga hamisha kamarbasta, fidoyi va mehnatkash, kamtarin yoshlardir. Jamiyatimiz esa ana shunday yoshlar bilan obod va farovon boʻlib boraveradi.
Gulbahor OʻROZOQOVA,
"Chordara” MFY
diniy maʼrifat va maʼnaviy-axloqiy tarbiya
masalalari boʻyicha maslahatchisi.
(Foto - http://xs.uz)
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
