Ҳарбий хизматчиларнинг фарзандларига имтиёзли тавсияномалар топширилди
Мамлакатимизда ёш авлодни ҳар томонлама қўллаб-қувватлаш, уларнинг замонавий билим ва касб-ҳунар эгаллаши учун кенг имкониятлар яратиш давлат сиёсатининг устувор йўналишларидан биридир. Айниқса, Ватан тинчлиги ва халқ осойишталиги йўлида фидокорона хизмат қилаётган ҳарбий хизматчилар оилаларига кўрсатилаётган эътибор ва ғамхўрлик халқимизнинг юксак эҳтироми ифодасидир.
Маълумки, ҳарбий хизмат машаққатли ва шарафли касб бўлиб, бу йўлда нафақат ҳарбий хизматчининг ўзи, балки унинг оила аъзолари ҳам ўзига хос синовларни бошдан кечиради. Шу боис, уларнинг фарзандларини ижтимоий ҳимоя қилиш, келажакда етук мутахассис бўлиб етишишлари учун зарур шарт-шароитларни яратиб бериш давлатимиз олдидаги муҳим вазифалардан бири саналади.
Ана шундай эзгу мақсадлар йўлида Шимоли-ғарбий ҳарбий округида хизмат қилаётган ҳарбий хизматчилар фарзандларига олий таълим муассасаларига ўқишга кириш учун имтиёзли тавсияномаларни топшириш маросими бўлиб ўтди. Мазкур тадбир ёшларни илм-фан сари руҳлантириш, уларнинг келажакдаги улкан марралар сари дадил қадам ташлашига кучли мотивация бағишлади.
Кўтаринки руҳда ташкил этилган тантанали маросимда округ қўмондони, ҳарбий хизматчилар, уларнинг оила аъзолари ҳамда кенг жамоатчилик вакиллари иштирок этди. Тадбир давомида ҳарбий хизматчилар фарзандларига олий таълим муассасаларига кириш учун бериладиган имтиёзли тавсияномалар тантанали равишда топширилди. Бу эътибор ёшлар қалбида чексиз фахр, масъулият ва Ватанга муҳаббат туйғуларини янада мустаҳкамлади.
Тадбирда сўзга чиққанлар томонидан бугунги кунда мамлакат тараққиёти, юрт равнақи ва халқ фаровонлиги аввало билимли, салоҳиятли ва ватанпарвар ёшлар қўлида эканлиги алоҳида таъкидланди. Зеро, илмли авлод — миллат таянчи, давлатнинг эртанги куни ва тараққиётининг энг ишончли кафолатидир. Шу билан бирга, ёшларнинг замонавий билимларни пухта эгаллаши, илғор касб-ҳунарларни ўрганиши ҳамда келгусида жамиятнинг турли соҳаларида етук мутахассис бўлиб фаолият юритиши ниҳоятда муҳим эканлиги қайд этилди. Айниқса, Ватан сарҳадларини қўриқлаётган мард ва жасур ҳарбий хизматчиларнинг фарзандларига яратилаётган бундай имкониятлар уларнинг орзу-мақсадлари рўёбга чиқишида ҳал қилувчи омил бўлиб хизмат қилмоқда. Ушбу йўлланмалар орқали ҳарбийларнинг фарзандлари ўзлари қизиққан йўналишларда таълим олиш имкониятига эга бўладилар.
Тадбир давомида ёшларга яқинлашиб келаётган давлат имтиҳонларидан муваффақиятли ўтиш, келажакда халқ ва Ватанга садоқат билан хизмат қиладиган баркамол инсонлар бўлиб етишиш тилаклари билдирилди. Самимий ва тантанавор руҳда ўтган ушбу маросим ёшлар қалбида юртга дахлдорлик, фидойилик ва улкан масъулият ҳиссини янада кучайтирди.
Бугунги кунда мамлакатимизда ёшлар таълими учун яратилаётган кенг имкониятлар, замонавий шароит ва имтиёзлар келажагимиз эгалари бўлган ўғил-қизларнинг интеллектуал салоҳиятини юксалтиришга хизмат қилмоқда. Бу эса, ўз навбатида, Янги Ўзбекистоннинг кучли ва қудратли келажагини бунёд этишда муҳим омил бўлиб қолмоқда.
Ёш авлодга қаратилаётган бундай эътибор — келажак сари қўйилган мустаҳкам қадамдир. Чунки Ватан равнақи, халқ фаровонлиги ва мамлакат истиқболи айнан шундай билимли, фидойи ҳамда ватанпарвар ёшлар қўлидадир. Бу каби эзгу ташаббуслар эса ёш авлодни доимо олдинга интилишга, билим олишга ва янгидан-янги марраларни забт этишга ундайверади.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
