Аёл-қизлар бандлигини таъминлаш йўлида

Амударё туманида фаолият юритаётган “Жайхун илҳомлари” нодавлат нотижорат ташкилоти томонидан аҳоли маънавиятини юксалтириш, фуқароларнинг иш билан таъминланишига кўмаклашиш, иқтидорли ёшларнинг ижодий салоҳиятларини юзага чиқариш, уларни турли зарарли иллатлардан ишончли ҳимоя қилиш мақсадида турли ташкилотларда, овул фуқаролар йиғинларида, таълим масканларида учрашувлар, давра суҳбатлари, танловлар ўтказилиб келинмоқда. Ташкилотнинг “Беш ташаббус – беш имконият!” номли давлат гранти лойиҳаси доирасида ҳам бу борадаги ишлар узлуксиз давом эттирилмоқда.

Ўтган йилнинг ноябрь ойидан буён мазкур лойиҳа асосида иш фаолиятини олиб бораётган ташкилот манзилли қўллаб-қувватлаш дафтарларига киритилган вояга етмаганларни, оилалар ҳамда ушбу тоифадаги оналарнинг фарзандларини Президентимизнинг ёшлар тарбиясига оид беш муҳим ташаббуси доирасидаги тадбирларга ҳам жалб қилиб келмоқда.

Ташкилот ходимлари бешинчи ташаббус доирасида манзилли қўллаб-қувватлаш дафтарларига киритилган хотин-қизларнинг бандлигига кўмаклашиш мақсадида ўзини-ўзи банд қилган ҳолда уй шароитида меҳнат қилиб даромад топаётган Бўстон маҳалласида истиқомат қилаётган аёл-қизлар фаолияти билан яқиндан танишди.

Ҳозирги кунда Бўстон маҳалласидаги 780та хонадонда 4 мингдан зиёд аҳоли истиқомат қилади. Айни кунда маҳаллада “Ёшлар дафтари”га киритилган 45 нафар, “Темир дафтар”га киритилган 24 нафар, “Аёллар дафтари”га киритилган 86 нафар фуқаро билан тизимли ишлар олиб борилмоқда.

Маҳалла ҳудудида кўплаб ишлаб чиқариш корхоналари, савдо-сотиқ шохобчалари фаолият кўрсатмоқда. Ҳудудда хусусий тадбиркорлик ишлари ҳам яхши йўлга қўйилган.

Маҳаллада яшовчи Гулжон Отажонова ўз уйида тикув цехи ташкил қилиб, ўз чеварлик ҳунарини кўпгина ёшларга ўргатиб келмоқда. Буюртма асосида тикилаётган ҳар бир кийим-бошлар ва уй анжомлари, тўй либослари харидоргирлиги билан чеварларни янги иш унумига чорламоқда.

Маҳалланинг яна бир ишбилармон аёли Гулчеҳра Султонова эса мана ўттиз йилдирки, нонвойлик касбини ардоқлаб келмоқда. Шу йиллар ичида Гулчеҳра опадан ҳунар ўрганган шогирдлар сони 100 нафардан ошиб кетди. Маҳалла ҳудудида ҳунармандлар, хусусий тадбиркорлар сафи кун сайин кўпайиб бормоқда.

Айтиш жоизки, грант лойиҳаси иш режасига асосан бешта муҳим ташаббуснинг бешинчи ташаббуси доирасида аёл-қизларни ишга жойлаштириш мақсадида учрашувлар ташкил қилиниб, ўзини-ўзи банд қилган ва тадбиркорлик билан шуғулланиб, даромад топаётган аёл-қизларнинг иш тажрибалари оммалаштириб борилиши натижасида туманимизда уларнинг издошлари кун сайин кўпайиб бормоқда.

Лойиҳа доирасида амалга оширилаётган ҳар бир тадбирнинг оммавий ахборот воситалари орқали ёритиб борилиши омма эътиборини ўзига тортиб ижобий натижалар қўлга киритилмоқда.

Ҳозирги кунда республикамизнинг барча жойларида бўлгани каби Амударё туманида ҳам аҳолининг, айниқса ёшлар ва аёл-қизларнинг иш билан бандлигини таъминлашга улкан эътибор қаратилмоқда. Бу борада давлатимиз томонидан турли қонун ҳужжатлари қабул қилиниб, аҳоли ўртасида тушунтириш ишлари олиб борилмоқда.

Уқувли, ишга лаёқатли ёшлар, аёл-қизларга давлатимиз томонидан ёрдам берилиб, уларга янги тикув машиналари, замонавий иш қуроллари олиб берилаётгани тадбиркор ва ишбилармон аёллар сафи кенгайишига замин яратмоқда.

Натижада аёлларнинг ҳам иш билан бандлиги таъминланиб, уларнинг меҳнатлари оиланинг қўшимча даромад манбаига айланмоқда.

Ўрозали РЕЙИМОВ.