ҲУНАРИДАН РИЗҚ ТОПАЁТГАН АЁЛ
Олмазор маҳалласи туманимизнинг яшил тоифадаги тинч-осойишта, обод ва файзли гўшаларидан ҳисобланади. Маҳалла фуқаролар йиғини масъуллари ҳудуддаги хонадонларда тез-тез бўлишиб, ишсиз, ишга яроқли фуқароларнинг бандлигини таъминлашга, уларга муносиб турмуш шароитлари яратишга ҳаракат қилишади, айниқса манзилли қўллаб-қувватлаш дафтарларига кирилган ёшлар, аёлларнинг ҳолидан хабар олишиб, имкон қадар қўллаб-қувватлашга интилишади.
“Аёллар дафтари”нинг 6-тоифасига рўйхатга олинган Шаҳло Бекмуродова 5 нафар фарзанднинг онаси, 4 нафари ҳали вояга етмаган, кичкинаси эса 2 ёшда. У узоқ йиллар фарзандлари тарбияси билан шуғулланди. Турмуш ўртоғи Рустам Ўтабоев ўз хизмат лавозимида сидқидилдан ишлаб, оиласини таъминлаб қўйишга ҳаракат қилаётган бўлса-да, Шаҳло бекор ўтираверишни ўзига эп кўрмади.
Мамлакатимизда аёл-қизларни қўллаб-қувватлаш, уларнинг ҳеч кимдан кам бўлмай меҳнат қилишларига, ўз иқтидорини намоён этишларига шароит яратиш учун қилинаётган ғамхўрликлар унга далда бўлди. Ишлаш истагини, лекин фарзандларини қаровсиз қолдириб кета олмаслигини маҳалла фуқаролар йиғини масъулларига бориб айтди. Уларнинг маслаҳатига кўра, тикувчилик фаолиятини йўлга қўйиб, ўзини ўзи банд қилди.
Унинг айнан тикувчилик йўналишини танлагани бежиз эмасди. Чунки болалигида бувиси унга дўппи, кийимлар тикишни ўргатган, ҳар бир қизнинг қўлида ҳунари бўлса, ҳаётда қийналмайди, ҳунарли бўл, хор бўлмайсан, дея кўп насиҳат қиларди. Ўзи неварасининг қўлига нинани олиб, чокларни тикишини кузатиб ўтирар, эринмай хато қилган жойларини қайта тикишни буюрарди, улғайгач, ишни тикув машинада ишлайдиган бўлди. Шу тариқа йиллар ўтиб, бинойидай чевар бўлди. Ота уйида вақтида дастлаб Манғитдаги, кейинчалик Тошкентдаги тикув цехларида ишлади.
Шаҳло Бекмуродованинг бувисидан ўрганган бу ҳунари ҳаётида жуда асқотди. Ҳозирги кунда ҳам ўз оиласида, фарзандларига кўз-қулоқ бўлиб ўтириб тиккан кийимлари мижозларга жуда манзур бўлаётир. У буюртма асосида турли фасонларда аёллар, эркаклар ва болалар кийимларини тикишдан ташқари, турли ўлчамдаги кийимларни тикиб, бозорга ҳам чиқаради.
Ота-боболаримиз “ҳунар – ҳунардан ризқинг унар”, деб бежиз айтишмаган. Қолаверса, нечта ҳунаринг бўлса-да, кўплик қилмайди одамга. Буни жуда яхши ҳис қилган Шаҳло Бекмуродова маҳалла фуқаролар йиғини масъуллари кўмагида 5,5 миллион сўм имтиёзли кредит ҳисобига турли пишириқлар пиширадиган ускуна сотиб олди ва бу борада ҳам анча маҳоратга эга бўлди. Тиниб-тинчимас аёл яқинда тадбиркорлик асослари бўйича ўқув курсида ўқиб, махсус сертификат олди ва фаолиятини кенгайтириш, тадбиркор сифатида тикув цехи очиш ниятида.
Мамлакатимизда тадбиркорлик фаолиятини ташкил этиш ва амалга ошириш билан боғлиқ муносабатлар тартибга солиниб, тадбиркорларга кенг имкониятлар яратилаётгани уни улкан марраларга чорлайди, фуқароларнинг тадбиркорлик фаолиятида эркин иштирок этиши ва манфаатдорлиги учун шарт-шароитлар яратилганлиги, қонуний манфаатлари ҳимоя қилинаётганидан қувонади.
Юртимизда Шаҳло каби интилувчан, меҳнаткаш ва оиласига фидойи аёллар кўпаяверишини тилаб қоламиз.
Ойгул РАЖАБОВА
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
