“БЕШ МУҲИМ ТАШАББУС – ЁШЛАРГА ҚАНОТ” ГРАНТ ЛОЙИҲАСИ ДОИРАСИДА “КИТОБЛАР КАРВОНИ” ТАДБИРИ ТАШКИЛ ЭТИЛДИ

Мамлакатимизда ёшлар маънавиятини юксалтириш, уларнинг алоҳида иқтидор ва қобилиятларини юзага чиқариш мақсадида Президентимиз белгилаб берган беш муҳим ташаббус доирасида ўтказилаётган тадбирлар тобора кенг қамров касб этмоқда. Айниқса, ногиронлиги бўлган ёшларнинг ижтимоий фаоллигини оширишга қаратилган турли хил мавзулардаги кўнгилочар тадбирлар, учрашувлар, ижодий кўрик-танловлар, китобхонлик кечалари жойларда кўтаринки руҳда ўтказилмоқда. “Менинг оилам” газетаси таҳририяти томонидан ўтказилаётган “Беш муҳим ташаббус – ёшларга қанот” мавзусидаги грант-лойиҳаси доирасидаги ногиронлиги бўлган ёшларни қўллиб-қувватлаш, ёшлар орасида “беш ташаббус” тамойилларини кенг жорий этиш ва уларни ижтимоий-маънавий юксалтиришга хизмат қилувчи тадбирлар ўзининг мазмун-моҳияти билан муҳим аҳамият касб этмоқда.

Ана шундай тадбирлардан бири жорий йилнинг 11 октябрь санасида Амударё тумани Мактабгача ва мактаб таълими бўлими тасарруфидаги 31-сонли мактабда ҳам ўтказилди.

“Беш муҳим ташаббус – ёшларга қанот” ва “Беш ташаббус – беш имконият” мавзуларидаги грант лойиҳаси доирасида “Жайхун илҳомлари” ННТ ва “Менинг оилам” газетаси таҳририяти ижодий жамоаси ҳамкорлигида ташкиллаштирилган “Китоблар карвони” маънавий-маърифий тадбирида 31-сонли мактаб ўқитувчилари, китобхон ўқувчи-ёшлар иштирок этдилар.

Тадбирни мактаб директорининг маънавий-маърифий ишлар бўйича ўринбосари Дилбар Ўрозалиева очди ва “Китоблар карвони” тадбирини ташкил этиб, ўқувчи-ёшларга маънавий озиқ улашишни ният қилган лойиҳа ижодкорларига миннатдорчилик билдирди.

Мазкур таълим муассасасида айни пайтда 482 нафар ўқувчи замон талаблари даражасида таълим-тарбия олишади. мактабда 1150та китоб жамғармасига эга кутубхона мавжуд бўлиб, ўқувчиларнинг ўзлари қизиққан йўналишлар бўйича қўшимча илмий-назарий ва бадиий адабиётларни танлаб ўқишларида 61 нафар педагоглар жамоаси ҳамиша бош-қош, яқин маслаҳатгўй.

“Китоблар карвони” тадбирида “Беш муҳим ташаббус – ёшларга қанот” грант лойиҳаси ижодкорларидан бири Робия Йўлдошева ёшлар китобхонлигини ривожлантириш мақсадида “Менинг оилам” газетаси таҳририяти томонидан амалга оширилаётган кенг қамровли ишлар хусусида батафсил тўхталди. Шу билан бирга китоб мутолаасининг ёшлар камолотидаги ўрни ҳақида сўз юритиб, “Жайхун илҳомлари” ННТ кутубхонасининг бой китоб жамғармаси, ҳозирги замон ўзбек адабиёти ва мумтоз адабиёт намоёндаларининг машҳур асарларидан иқтибослар келтириб, ёшларни китоб ўқишга, шу орқали маънавий етукликка давъат этди.

Тадбир давомида “Китоблар карвони” тадбирининг ҳамкори, “Беш ташаббус – беш имконият” лойиҳаси координатори, “Жайхун илҳомлари” ННТ раиси Ўзбекистон журналистлари ижодий уюшмаси аъзоси, шоир Ўрозали Рейимов янги китоблар кўргазмасини ташкил этди ва мустақиллик йилларида ўзбек ёзувчи ва шоирлари ижод қилган асарлар тақдимотини ўтказди. Ўқувчи-ёшлар янги асарлар тақдимотида катта қизиқиш билан иштирок этдилар. Шу билан биргаликда “Жайхун илҳомлари” ННТ кутубхонасига аъзо бўлиш истагини билдирдилар.

Янги китоблар билан танишиш орқали қалбларида ушбу асарларни мутолаа қилиш истаги уйғонган ўқувчи-ёшлар ўзлари ўқиган бадиий асарлар ҳақида бир-бири билан фикр алмашдилар, ўқиган китобларидан олган таассуротлари ҳақида сўзлаб бердилар, таниқли шоирларнинг шеърларини ёддан, ифодали айтишиб, тадбир иштирокчиларини хурсанд қилдилар.

Робия ЙЎЛДОШЕВА